កូរ៉េខាងជើងត្រៀមក្រឡុកស្ថានការណ៍នៅពេលបោះឆ្នោតនៅអាមេរិក និងកូរ៉េខាងត្បូង
ទីក្រុងសេអ៊ូល៖ ទីភ្នាក់ងារស៊ើបការណ៍សម្ងាត់កូរ៉េខាងត្បូងថ្លែងថាកូរ៉េខាងជើងតាមមើលទៅអាច
ទីក្រុងសេអ៊ូល៖ ទីភ្នាក់ងារស៊ើបការណ៍សម្ងាត់កូរ៉េខាងត្បូងថ្លែងថាកូរ៉េខាងជើងតាមមើលទៅអាចនឹងធ្វើអ្វីម្យ៉ាងជាការបង្កហេតុជាសកម្មភាពយោធា ឬការវាយប្រហារតាមប្រព័ន្ធព័ត៌មានវិទ្យានាឆ្នាំ២០២៤។ មូលហេតុព្រោះរបបដឹកនាំរបស់លោកគីម ជុងអ៊ុន ចង់ទាក់ទាញការចាប់អារម្មណ៍ទៅលើរបបរបស់គាត់នៅពេលបោះឆ្នោតនៅអាមេរិក និងនៅកូរ៉េខាងត្បូង។
របបក្រុងព្យុងយ៉ាងចង់ឱ្យគេចាប់អារម្មណ៍ទៅលើកម្លាំងយោធារបស់ខ្លួននៅពេលកូរ៉េខាងត្បូងរៀបចំការបោះឆ្នោតជ្រើសតាំងអ្នកតំណាងរាស្ត្រនាខែមេសា ឆ្នាំ២០២៤ និងនៅពេលអាមេរិករៀបចំការបោះឆ្នោតប្រធានាធិបតីកនាថ្ងៃទី៥ ខែវិច្ឆិកា ឆ្នាំ២០២៤។ ខាងលើនេះជារបាយការណ៍របស់ទីភ្នាក់ងារស៊ើបការណ៍កូរ៉េខាងត្បូងដែលចេញផ្សាយកាលពីថ្ងៃទី២៨ ខែធ្នូ។
ការចេញរបាយការណ៍នេះចំពេលកូរ៉េខាងជើងកំពុងកោះប្រជុំមហាសន្និបាតបក្សពលករកូរ៉េក្រោមអធិបតីភាពរបស់លោកគីមជុងអ៊ុន និងផ្ដោតសំខាន់ទៅលើការដាក់ចេញកម្មវិធីនយោបាយសម្រាប់ពេលអនាគត។ លោកគីមធ្លាប់សន្យាថានឹងខិតខំផលិតអាវុធនុយក្លេអ៊ែរឱ្យបានច្រើន។ ស្ថាប័នស៊ើបការណ៍ដដែលនេះរៀបរាប់ថាដោយយោងទៅលើទង្វើរបស់កូរ៉េខាងជើងពីអតីតកាល និងការគំរាមកំហែងកូរ៉េខាងត្បូងកាន់តែខ្លាំង យើងនឹងសហការជាមួយក្រសួងពាក់ព័ន្ធដើម្បីបង្កើតប្រព័ន្ធប្រកាសអាសន្ន និងការត្រៀមខ្លួនទប់ទល់។ គេរំពឹងថានៅដើមឆ្នាំ២០២៤ ព្យុងយ៉ាងនឹងធ្វើសកម្មភាពបង្កហេតុជាបណ្ដើរៗ។
ជិតដល់រដូវកាលបោះឆ្នោតនៅកូរ៉េខាងត្បូង ព្យុងយ៉ាងមានទម្លាប់បាញ់មីស៊ីល និងឧបករណ៍បាញ់នុយក្លេអ៊ែរ ព្រោះពួកគេចង់ផ្ញើសារទៅបណ្ដាអ្នកនយោបាយអភិរក្សនិយមដែលប្រឆាំងនឹងរបបក្រុងព្យុងយ៉ាង។ កូរ៉េខាងជើងរហូតដល់ទៅហ៊ាននិយាយថាប្រធានាធិបតីកូរ៉េខាងត្បូងសព្វថ្ងៃនេះជាអាយ៉ងរបស់គេ។ របបនេះធ្លាប់គំរាមបើកឆាកបង្ហូរឈាមនៅមហាសមុទ្ទប៉ាស៊ីហ្វិចដើម្បីឆ្លើយតបទៅនឹងការធ្វើសមយុទ្ធយោធារួមគ្នារវាងទាហានអាមេរិក ជប៉ុន និងកូរ៉េខាងត្បូង។
កាលពីជំនាន់លោកមូនជែអ៊ីនជាប្រធានាធិបតីកូរ៉េខាងត្បូង ព្យុងយ៉ាងអាចទទួលបានសម្បទានខ្លះៗ និងការសន្យាសហការគ្នា។ ប៉ុន្តែការសន្យានេះមិននៅគង់វង្សយូរអង្វែងទេ។ កូរ៉េខាងជើងចាត់ទុកលោកមូនជាមេដឹកនាំដែលចូលចិត្តការសម្រុះសម្រួលគ្នា។ ប៉ុន្តែមិនយូរប៉ុន្មាន ព្យុងយ៉ាងច្រានចោលសំណើចរចាសន្តិភាពរបស់លោកមូន និងដាក់គ្រាប់បែកកម្ទេចការិយាល័យទំនាក់ទំនងរវាងប្រទេសទាំងពីរដែលមានទីតាំងនៅជាប់នឹងព្រំដែន។
រយៈពេលជាងពីរឆ្នាំនៃការកាន់អំណាចរបស់លោកមូនជែអ៊ីន និងលោកយូនសុខយូល កូរ៉េខាងជើងបាញ់មីស៊ីលជាង១រយគ្រាប់។ វឌ្ឍនភាពសំខាន់គឺការធ្វើតេស្តគ្រាប់មីស៊ីលកាលពីខែធ្នូ ដែលអាចហោះបានចម្ងាយជាង១៤០០០គីឡូម៉ែត្រ ហើយអាចបាញ់គ្រប់ទីកន្លែងទូទាំងប្រទេសអាមេរិក។ វឌ្ឍនភាពមួយទៀតគឺការបើកដំណើរការម៉ាស៊ីនប្រតិកម្មនុយក្លេអ៊ែរ (reactor) ដែលអាចពន្លឿនការចម្រាញ់សារធាតុភ្លុយតូនីញ៉ូម (plutonium) សម្រាប់ផលិតក្បាលគ្រាប់នុយក្លេអ៊ែរ៕ (ប្រភព៖ Bloomberg)
ចែករំលែកព័តមាននេះ