ពិធីមង្គលការរបស់តារាសម្តែងនាង ហ៊ិន ច័ន្ទនីរ័ត្ន បានរៀបចំឡើងយ៉ាងឱឡារឹក និងអធិកអធមនាថ្ងៃទី២២ ខែធ្នូ ឆ្នាំ២០២៣នេះ នៅមជ្ឈមណ្ឌលសន្និបាត និងពិព័រណ៍កោះពេជ្រ ដោយនៅក្នុងនោះសម្តេចតេជោ ហ៊ុន សែន ប្រធានឧត្តមក្រុមប្រឹក្សាព្រះមហាក្សត្រ ក៏បានផ្តល់កិត្តិយស
រាជធានីភ្នំពេញ ៖ ពិធីមង្គលការរបស់តារាសម្តែងនាង ហ៊ិន ច័ន្ទនីរ័ត្ន បានរៀបចំឡើងយ៉ាងឱឡារឹក និងអធិកអធមនាថ្ងៃទី២២ ខែធ្នូ ឆ្នាំ២០២៣នេះ នៅមជ្ឈមណ្ឌលសន្និបាត និងពិព័រណ៍កោះពេជ្រ ដោយនៅក្នុងនោះសម្តេចតេជោ ហ៊ុន សែន ប្រធានឧត្តមក្រុមប្រឹក្សាព្រះមហាក្សត្រ ក៏បានផ្តល់កិត្តិយសដ៏ខ្ពង់ខ្ពស់ចូលរួមនៅក្នុងពិធីនោះផងដែរ។
នេះគឺជាការផ្តល់កិត្តិយសដ៏ខ្ពង់ខ្ពស់ និងឧដុង្គឧត្តមបំផុតពីសំណាក់សម្តេចតេជោ ក្នុងនាមសម្តេចជាឪពុកធំរបស់កូនកំលោះ គឺលោក ឌី ពេជ្រ ដែលជាស្វាមីរបស់ស្រីស្អាត ហ៊ិន ច័ន្ទនីរ័ត្ន ។ សម្តេចតេជោ បានផ្តល់កិត្តិយសថតរូបជុំគ្នាជាមួយនឹងកូនកំលោះ និងកូនក្រមុំ ព្រមទាំងសាច់ញាតិទាំងសងខាងប្រកបដោយភាពសប្បាយរីករាយផងដែរ ។
ជាការកត់សម្គាល់ មង្គលការរវាងលោក ឌី ពេជ្រ និងស្រីស្អាត ហ៊ីន ច័ន្ទនីរ័ត្ន នាពេលនេះ បានកើតឡើងក៏ដោយសារការចេញមុខផ្សំផ្គុំពីសម្តេចតេជោផងដែរ បន្ទាប់ពីមានការចុះផ្សាយព័ត៌មានជាបន្តបន្ទាប់ជុំវិញចំណងស្នេហារបស់អ្នកទាំងពីរដែលបន្តនូវការលាក់បាំង ។
តាមបណ្តាញសង្គម កាលពីថ្ងៃទី២៦ ខែតុលា ឆ្នាំ២០២៣ សម្តេចតេជោ ហ៊ុន សែន បានលើកឡើងថា «ដើម្បីចៀសវាងមាត់ចាបមាត់ព្រាប ដូចពាក្យចាស់លោកពោលថា មាត់វែងជាងផ្លូវ ជុំវិញកូនប្រុស ឌី ពេជ្រ និងកូនស្រី ហ៊ិន ច័ន្ទនីរ័ត្ន។ ក្នុងឋានៈជាឪពុកធំកូនពេជ្រ ខ្ញុំត្រូវតែចូលរួមរៀបចំឲ្យកូនទាំងពីរ បានចូលរោងការតាមប្រពៃណី។
សម្តេចតេជោបញ្ជាក់ថា ថ្ងៃស្អែក (ថ្ងៃទី២៧ ខែតុលា ឆ្នាំ២០២៣) ឪពុកម្តាយខាងប្រុសចូលស្តីដណ្តឹងកូនស្រី។ ថ្ងៃទី២២ ខែធ្នូ ឆ្នាំ២០២៣ កំណត់ជាថ្ងៃរៀបការ ដែលគ្រួសារទាំងសងខាង និងសាមីខ្លួនបានយល់ស្របតាមខ្ញុំ ដែលជាអាចារ្យធំរៀបចំពេលវេលាបែបនេះ។ ឈា.មច្បាស់ជាខាប់ជាងទឹក និងសង្ឃឹមថា ពុំមានអ្នកធ្វើអត្ថាធិប្បាយណា យកទៅបកស្រាយផ្សេងពីនេះទៀតឡើយ»។
ដូចការគ្រោងទុក តារាសម្តែងនាង ហ៊ិន ច័ន្ទនីរ័ត្ន បានចូលរោងការនៅថ្ងៃទី២១-២២ ខែធ្នូ ឆ្នាំ២០២៣ ជាមួយអនាគតស្វាមី គឺលោក ឌី ពេជ្រ ដែលជាក្មួយសម្ដេចតេជោ បន្ទាប់ពីអ្នកទាំងពីរបានភ្ជាប់ពាក្យកាលពីចុងខែតុលាកន្លងទៅ ។ ពិធីជួបជុំពិសារអាហារពេលល្ងាច នៃពិធីមង្គលការរបស់ស្រីស្អាត ហ៊ិន ច័ន្ទនីរ័ត្ន រៀបចំនៅថ្ងៃទី២២ ខែធ្នូ ឆ្នាំ២០២៣ នៅមជ្ឈមណ្ឌលសន្និបាត និងពិព័រណ៍កោះពេជ្រ ដែលភ្ញៀវភាគច្រើនជាអ្នកសិល្បៈ ចំណែកភ្ញៀវខាងស្វាមីនាងវិញ ភាគច្រើនជាអ្នកមន្ដ្រីរាជការ ឧកញ៉ា និងអ្នកជំនួញធំៗ។
មង្គលការរបស់តារាស្រី ហ៊ិន ច័ន្ទនីរ័ត្ន មានការតុបតែងយ៉ាងប្រណីត ហើយពិធីអាពាហ៍ពិពាហ៍មួយនេះ អាចនិយាយបានថា ជាមង្គលការដ៏ធំសម្រាប់តារានៅឆ្នាំ២០២៣ ។ យ៉ាងណាម៉ិញ ក្នុងពេលដែលស្រីស្អាត ហ៊ិន ច័ន្ទនីរ័ត្ន សម្រេចបញ្ចប់ភាពនៅនៅលីវចូលរោងការមានស្វាមីនាពេលនេះ គេនៅមិនទាន់ដឹងនៅឡើយទេថា តើអាជីពសិល្បៈរបស់នាងនៅបន្តទៀតឬយ៉ាងណា? ក្នុងពេលដែលមានស្វាមីសំបូរទ្រព្យ ហើយអាចឲ្យនាងរស់នៅយ៉ាងមានក្តីសុខ និងសុភមង្គលហើយនោះ ។
ទោះបីជាបែបណា នៅក្នុងរយៈពេលប៉ុន្មានឆ្នាំចុងក្រោយនេះ ស្រីស្អាត ហ៊ិន ច័ន្ទនីរ័ត្ន ក៏ហាក់មិនបានប្រឡូកក្នុងអាជីពសម្តែងឲ្យបានជាប់លាប់ដូចមុនឡើយ ពោលគឺនាងត្រឹមតែធ្វើជាពិធីការិនីប្រចាំស្ថានីយទូរទស្ស៍បាយ័ន និងពិធីមង្គលការធំៗប៉ុណ្ណោះ ។
ស្រីស្អាត ហ៊ិន ច័ន្ទនីរ័ត្ន បានភ្ជាប់ពាក្យជាមួយលោក ឌី ពេជ្រ កាលពីថ្ងៃទី២៧ ខែតុលា ឆ្នាំ២០២៣ ពោលគឺក្រោយក្លាយទៅជាគូរដណ្ដឹងគ្នាជិត២ខែ មុនពេលពួកគេដល់វេលាក្រាបផ្ទឹមនាពេលនេះ។ ការរៀបការមង្គលការ តាមគន្លងប្រពៃណីខ្មែរ និងក្លាយទៅជាប្ដីប្រពន្ធគ្នាស្របច្បាប់នេះ នឹងអាចធ្វើឲ្យចំណងស្នេហ៍របស់ស្រីស្អាត ហ៊ិន ច័ន្ទនីរ័ត្ន និងស្វាមី កាន់តែរឹងមាំ និងមានសុភមង្គល។
គួររំលឹកថា ៖ សាទរ! ស្រីស្អាត ហ៊ិន ច័ន្ទនីរ័ត្ន ចូលរោងការជាមួយក្មួយប្រុសសម្ដេចតេជោថ្ងៃនេះហើយ៕
ចែករំលែកព័តមាននេះ