ខេត្តស្ទឹងត្រែង ៖ បុរសម្នាក់ត្រូវបានកម្លាំងចម្រុះឃាត់ខ្លួនជាមួយនឹងគ្រឿងចក្រមួយគ្រឿង កាលពីវេលាម៉ោង១៦និង៥០នាទីល្ងាច ថ្ងៃទី១៩ ខែធ្នូ ឆ្នាំ២០២៣ ខណៈពេលកំពុងប្រើប្រាស់គ្រឿងចក្រឈូសឆាយដីព្រៃខុសច្បាប់ ស្ថិតនៅក្នុងភូមិអូរគ្រៀង ឃុំអូរគ្រៀង ស្រុកអូរគ្រៀងសែនជ័យ ខេត្តក្រចេះ។
តាមប្រភពព័ត៌មាន បានប្រាប់ឲ្យដឹងថា កាលពីរសៀលថ្ងៃទី១៩ ខែធ្នូ ឆ្នាំ២០២៣ កម្លាំងមូលដា្ឋនកងរាជអាវុធហត្ថស្រុកអូរគ្រៀងសែនជ័យ សហការជាមួយកម្លាំងកងរាជអាវុធហត្ថលើផ្ទៃប្រទេស កម្លាំងដែនជម្រកសត្វព្រៃសំបូរ មន្ត្រីរដ្ឋបាលព្រៃឈើអូរគ្រៀង បានចុះបង្ក្រាបការឈូសឆាយរានដីព្រៃខុសច្បាប់ នៅចំណុច UTM (៦២៨៦០១.១៤៤០២៤៦) ស្ថិតក្នុងភូមិអូរគ្រៀង ឃុំអូរគ្រៀង ស្រុកអូរគ្រៀងសែនជ័យ ខេត្តក្រចេះ។
ប្រភពដដែលបន្តថា ជាលទ្ធផល កម្លាំងចម្រុះបានចាប់ឃាត់ខ្លួនជនសង្ស័យម្នាក់មានឈ្មោះ រស់ យិន ភេទប្រុស អាយុ២៥ឆ្នាំ មុខរបរបើកបរត្រាក់ទ័រ មានទីលំនៅភូមិអូរគ្រៀង ឃុំអូរគ្រៀង ស្រុកអូរគ្រៀងសែនជ័យ ខេត្តក្រចេះ។ ហើយដកហូតវត្ថុតាង អាប៊ុលចំនួន១គ្រឿង ម៉ាកKOMAT SU ពណ៌លឿង។
បច្ចុប្បន្ន ជនសង្ស័យ រួមនឹងវត្ថុតាងខាងលើ ត្រូវបានប្រគល់ជូនសង្កាត់រដ្ឋបាលព្រៃឈើអូរគ្រៀង ដើម្បីចាត់នីតិវិធីនៃច្បាប់បន្ដ៕
ចែករំលែកព័តមាននេះ