យានជំនិះរបស់ព្រះនារាយណ៍គឺស្ដេចបក្សីគ្រុឌ
- ភ្នំពេញ
ព្រះនារាយណ៍ជាអាទិទេពសំខាន់មួយក្នុងព្រហ្មញ្ញសាសនាដែលតំណាងឲ្យការថែរក្សានិងការពារលោក ។ លក្ខណៈសម្គាល់របស់ព្រះអង្គគឺជាទេវរូបភេទប្រុសមានព្រះហស្តកាន់កេតនភណ្ឌចំនួនបួន
ព្រះនារាយណ៍ជាអាទិទេពសំខាន់មួយក្នុងព្រហ្មញ្ញសាសនាដែលតំណាងឲ្យការថែរក្សានិងការពារលោក ។ លក្ខណៈសម្គាល់របស់ព្រះអង្គគឺជាទេវរូបភេទប្រុសមានព្រះហស្តកាន់កេតនភណ្ឌចំនួនបួន សំខាន់ៗដូចជាខ្យងស័ង្ខ កងចក្រ ដុំមូល និងដំបង ។ ព្រះអង្គយាងទៅទីផ្សេងៗដោយគង់លើសត្វគ្រុឌ ដែលជាស្តេចបក្សីមានរូបរាងពាក់កណ្តាលមនុស្ស ពាក់កណ្តាលសត្វ ។
បើតាមឯកសារសារមន្ទីរជាតិ ផ្តែរដែលកំពុងបង្ហាញនេះ ជាប្រភេទចម្លាក់ក្រឡោតទាបឆ្លាក់ក្នុងលក្ខណៈជាចម្លាក់ ជ្រៅៗចូលក្នុងថ្មលម្អដោយក្បាច់ចង្វាយ មើលទៅហាក់ដូចជាក្បាច់ចម្លាក់ក្នុងរចនាបថបន្ទាយស្រី និងមានប្រភពមកពីប្រាសាទស្រឡៅ នាសតវត្សទី១០ ។
ចម្លាក់នៅលើផ្តែរបានរំលេចតួអង្គព្រះនារាយណ៍គង់លើគ្រុឌនៅចំកណ្តាលនៃអ័ក្សព័ទ្ធជុំវិញដោយស៊ុមទ្រវែងមួយ។ ផ្នែកសំខាន់នៃផ្តែរមានលម្អជាក្បាច់អង្កត់រាងដងធ្នូ លយចេញពីចំណុចកណ្តាលនៃផ្តែរ និងបញ្ចប់នៅផ្នែកសងខាងទៅដោយចម្លាក់រូបគ្រុឌកំពុងលេបឬខ្ជាក់នាគ ។
អង្កត់នេះចែកផ្តែរជាពីរផ្នែកគឺ ផ្នែកខាងលើជាសន្លឹកផុសចេញឡើងទៅលើ ដោយឡែកផ្នែកខាងក្រោមជាសន្លឹកធ្លាក់រយោង។ នៅផ្នែកខាងលើបង្អស់នៃផ្តែរមានលម្អជារូបគ្រុឌមួយជួរដោយ ម្ខាងៗមានគ្រុឌចំនួនប្រាំមួយបែរមករកគ្នា ។
ផ្តែរដែលមានប្រភពមកពីប្រាសាទស្រឡៅនេះ បានយកមករក្សាទុកនៅសារមន្ទីរជាតិនាថ្ងៃទី២៩ ខែមេសា ឆ្នាំ១៩៥២ សព្វថ្ងៃកំពុងដាក់តាំងបង្ហាញនៅរបៀងខាងក្រៅនៃសាលក្រោយសម័យអង្គរនៃសារមន្ទីរជាតិកម្ពុជា ។ ផ្តែរនេះធ្លាប់យកទៅតាំងពិព័រណ៍នៅបណ្តាប្រទេសជាច្រើនដូចជាប្រទេសបារាំង សហរដ្ឋអាមេរិក ជប៉ុន អាល្លឺម៉ង់ ៕ ដោយ ៖ ស.ភ.រ
ចែករំលែកព័តមាននេះ