រាជធានីភ្នំពេញ ៖ អ្នកច្នៃម៉ូតដ៏ល្បីមួយរូបនៅក្នុងប្រទេសកម្ពុជា គឺលោក ម៉ែន សីហា ហៅ អូ លីវ៉ាគង់ បានសម្តែងក្តីរំភើបរហូតស្រក់ទឹកភ្នែក បន្ទាប់ពីលោកបានសម្រេចក្តីស្រមៃនៅក្នុងការច្នៃម៉ូតសម្លៀកបំពាក់បែបបុរាណ និងចំនួន៤១ឈុត ដើរបង្ហាញនៅពីមុខប្រាសាទបុរាណខ្មែរជាលើកដំបូង។
លោក អូ លីវ៉ាគង់ បានរៀបចំច្នៃម៉ូតយ៉ាងស្រស់ស្អាតបង្ហាញឲ្យភ្ញៀវជាតិ និងអន្តរជាតិបានទស្សនាក្នុងកម្មវិធីរាត្រីសមោសរសប្បុរសធម៌ ខាងមុខប្រាសាទបាភួន ខេត្តសៀមរាប កាលពីរាត្រីថ្ងៃទី១៣ ខែធ្នូ ឆ្នាំ២០២៣ ដែលរៀបចំដោយក្រសួងវប្បធម៌ និងវិចិត្រសិល្បៈ ដើម្បីស្វែងរកថវិកាសប្បុរសធម៌ជួយដល់កុមារកម្ពុជា ។
ទោះបីជាលោកធ្លាប់បានចូលរួមបង្ហាញម៉ូតសម្លៀកបំពាក់ច្រើនក្នុងកម្មវិធីអន្តរជាតិ ប៉ុន្តែការបង្ហាញម៉ូតសម្លៀកបុរាណនៅខាងមុខប្រាសាទបុរាណនេះ គឺជាលើកដំបូងរបស់លោក Oliva Kong ហើយរឿងនោះបានធ្វើឲ្យលោករំភើបចិត្តស្ទើរតែស្រក់ទឹកភ្នែក ខណៈពេលលោកតែងជឿជាក់ថា ខ្មែរអាចធ្វើបាន ។
លោក អូ លីវ៉ាគង់ បានបង្ហោះសារអមជាមួយវីដេអូដែលលោកបង្ហូរទឹកភ្នែកក្នុងចំណោមអ្នកសិល្បៈជាច្រើនតាមបណ្តាញសង្គម ក្រោយកម្មវិធីបានបញ្ចប់ថា «ខ្ញុំយំ គឺយំរំភើបចិត្តដែលបានសំរេចក្ដីសុបិន្តដ៏ធំក្នុងឆាកជីវិ.ត យំព្រោះតែខ្មែរអាចធ្វើបាន »។
លោកបញ្ជាក់ថា «គោលបំណងទី១ ៖ ខ្ញុំបាទ ចង់បង្ហាញពីការដឹងគុណដល់បុព្វបុរសខ្មែរដែលបានបន្សល់ទុកនូវស្នាដៃដល់មហាសច្ចា ដល់កូនចៅជំនាន់ក្រោយ ហើយខ្ញុំបាទ ក៏ចង់បន្តការគោរពថែរក្សា និងផ្សព្វផ្សាយ អភិវឌ្ឍន៍សម័យអភិរក្សបុរាណផងដែរ។ គោលបំណងទី២ ៖ ខ្ញុំបាទ ចង់ផ្សព្វផ្សាយនូវសិល្បៈវប្បធម៌ អរិយធម៌ដ៏ល្អផូរផង់របស់ប្រទេសកម្ពុជា តាមរយៈការច្នៃប្រឌិតខ្ពស់បែបសម័យថ្មី ដែលប្រកបដោយការគិត និងការអនុវត្ត ព្រមទាំងមានទឹកតាងដែលច្បាស់លាស់ចេញពីទឹកដីកំណើតរបស់យើងផ្ទាល់»។
លោកបញ្ជាក់ទៀតថា «គោលបំណងទី៣ ៖ ខ្ញុំបានមើលឃើញនូវពន្លឺដ៏អស្ចារ្យ ហើយពន្លឺនោះក៏មាននៅក្នុងខ្លួនរបស់ខ្ញុំផងដែរ ក្នុងនាមជាកូនខ្មែរជំខាន់ក្រោយមួយរូប ។ ដូច្នេះខ្ញុំចង់យកពន្លឺនោះ មកបំភ្លឺដល់ក្មេងៗជំនាន់ក្រោយឲ្យបានដឹងថា ប្រទេសកម្ពុជាយើង ត្រូវការធនធានមនុស្សសំខាន់ៗ ដើម្បីអភិវឌ្ឍ និងអភិរក្សប្រទេសជាតិយើងឲ្យកាន់តែរីកចម្រើន។ គោលបំណងទី៤ ៖ ខ្ញុំចង់លើកទឹកចិត្តដល់ក្មេងៗជំនាន់ក្រោយ ដែលគាត់កំពុងស្ថិតនៅក្នុងសម័យកាលទំនើប ដែលអ្នកច្នៃប្រឌិតក្ដី ឬជាអ្នកច្នៃម៉ូតក្ដី ឬក៏ជាសិល្បករ សិល្បការិនីទាំងឡាយឲ្យបានយល់ថា នេះជាការចាប់ផ្ដើមថ្មីមួយរបស់កម្ពុជា យើងរួបរួមគ្នាដើម្បីប្រទេសជាតិយើងរីកចម្រើន»។
លោកបន្ថែមថា «សម្រាប់គោលបំណងចុងក្រោយ ដែលជាគោលបំណងទី៥ ៖ ខ្ញុំបាទ ចង់លុបបំបាត់នូវការបំបា.ក់ទឹកចិត្ត ការរិះគន់ដោយខ្វះនូវការគិតពិចារណា ហើយខ្វះខាតនូវការស្រាវជ្រាវ មកកាន់វិស័យសិល្បៈ ឬវិស័យដើរម៉ូត ច្នៃម៉ូត គ្រប់ទម្រង់នៅក្នុងប្រទេសកម្ពុជា ពីព្រោះខ្ញុំបាទយល់ឃើញថា ខ្ញុំបាទក៏ដូចជាយុវជន យុវតីជំនាន់ក្រោយ បាននិងកំពុងនាំយកប្រទេសកម្ពុជា ទៅកាន់ពិភពលោកឲ្យបានស្គាល់ពីខ្មែរកាន់តែទូលំទូលាយ»។
យ៉ាងណាម៉ិញ លោកពិតជាមានសេចក្តីរំភើបរីករាយយ៉ាងខ្លាំង និងជាកិត្តិយសដែលបានចូលរួមការងារសប្បុរសធម៌ក្នុងកម្មវិធីរាត្រីចងចាំ ហើយក៏ទទួលបានការកោតសរសើរយ៉ាងខ្លាំងពីលោកជំទាវបណ្ឌិតសភាចារ្យ ភឿន សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ។
លោកបញ្ជាក់ថា «លោកពិតជារំភើបចិត្ត និងអរគុណយ៉ាងក្រៃលែង ក្ដីសុបិន្តជាង១០ឆ្នាំហើយ ពេលនេះបានក្លាយជាការពិត សូមអរគុណដល់គណៈរដ្ឋមន្ត្រីគ្រប់ជាន់ថ្នាក់ និងក្រុមម៉ូតដែរ ព្រមទាំងក្រុមការងារទាំងមូលយ៉ាងក្រៃលែងនារាត្រីនេះ»៕
ចែករំលែកព័តមាននេះ