រាជធានីភ្នំពេញ ៖ ស្ងាត់ៗស្រាប់តែបែកធ្លាយរឿងលោក ហុង ពិសិដ្ឋ អធិការនៃអធិការដ្ឋាននគរបាលខណ្ឌកំបូល ត្រូវបានមន្ត្រីក្រោមឱវាទរបស់ខ្លួនចាប់ពីថ្នាក់ប៉ុស្តិ៍រដ្ឋបាល រហូតដល់គ្រប់ផ្នែកទាំងអស់ រួមគ្នាធ្វើលិខិតប្ដឹងសុំការអន្តរាគមន៍ពីសំណាក់លោកឧត្ដមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនៃស្នងការដ្ឋាននគរបាលរាជធានីភ្នំពេញ ដើម្បីជួយពិនិត្យ និងដោះស្រាយ ចាប់តាំងតែពីពេលដែលលោកអធិការរូបនោះ ប្រកាសចូលកាន់តំណែង ទើបតែបានជាង១ខែមកម្ល៉េះ។
យោងតាមលិខិតខាងលើនោះ លោកវរសេនីយ៍ឯក ហុង ពិសិដ្ឋ បានចូលមកកាន់តំណែងជាអធិការនគរបាលខណ្ឌកំបូល កាលពីថ្ងៃទី១៨ ខែសីហា ឆ្នាំ២០២៣ ហើយក្រោយកាន់តំណែងបានត្រឹមតែជាង១ខែប៉ុណ្ណោះ គឺនៅថ្ងៃទី៣០ ខែកញ្ញា ឆ្នាំ២០២៣ ក៏កើតមានរឿងអាស្រូ.វ ត្រូវបានមន្ត្រីក្រោមឱវាទមិនពេញចិត្ត ហើយក៏នាំគ្នាធ្វើលិខិតប្ដឹងយ៉ាងព្រោងព្រាត។ ហើយលិខិតនោះ បានចូលដល់ស្នងការដ្ឋាននគរបាលរាជធានីភ្នំពេញ នៅវេលាម៉ោង២រសៀល ថ្ងៃទី១០ ខែតុលា ឆ្នាំ២០២៣កន្លងទៅនេះ ប៉ុន្តែនៅពុំទាន់មានដំណោះស្រាយនៅឡើយទេ។
មន្ត្រីនគរបាលនៃអធិការដ្ឋានខណ្ឌកំបូល បាននិយាយប្រាប់ឱ្យដឹងថា គ្មាននរណាចង់ប្ដឹងមេកើយខ្លួនឯងនោះទេ ប៉ុន្តែមកពីមេធ្វើបាប គាបសង្កត់កូនចៅខ្លាំងពេក ។ ដោយមិនអាចទទួលយកបាន និងអត់ទ្រាំលែងបានដែរ ទើបឈានដល់ការប្ដឹងរកដំណោះស្រាយ។ ហើយគ្រាន់តែបានចូលកាន់តំណែងជាអធិការភ្លាម លោកអធិការរូបនោះដឹកនាំបញ្ជាមិនបានល្អឡើយ និងបានបង្កើតនូវបាតុភាពជាច្រើន ព្រមទាំប្រព្រឹត្តអំពើពុ.ករលួ.យ គាបសង្កត់កូនចៅ គ្មានការយោគយល់ដល់ប្រជាពលរដ្ឋ។ លោកអធិការរូបនេះ ធ្វើអ្វីៗគិតតែពីផលប្រយោជន៍ផ្ទាល់ខ្លួន គិតប្រាក់ជាធំ ដែលទង្វើទាំងអស់នោះបានធ្វើឲ្យប៉ះពាល់ដល់សតិអារម្មណ៍កងកម្លាំង និងប្រជាពលរដ្ឋក្នុងមូលដ្ឋានយ៉ាងខ្លាំង។
នៅក្នុងលិខិតដែលដាក់ជូនលោកស្នងការនគរបាលរាជធានីភ្នំពេញនោះ មន្ត្រីនគរបាលនៃអធិការដ្ឋាននគរបាលខណ្ឌកំបូល បានរៀបរាប់ពីភាពមិនប្រក្រតី និងការប្រព្រឹត្តអំពើពុ.ករលួ.យរបស់លោកអធិការ ហុង ពិសិដ្ឋ ចំនួន១៨ចំណុច គឺ ៖
១- ស្នើសុំតែងតាំងតួនាទី ឋានន្តរស័ក្តិមន្ត្រីនគរបាល នៃអធិការដ្ឋាននគរបាលខណ្ឌកំបូល ដោយគ្មានការប្រជុំ វាយតម្លៃត្រឹមត្រូវ ដោយថ្នូរជាប្រាក់ចាប់ពី ៨០០ដុល្លារ ទៅ ១.០០០ដុល្លារ (តួនាទីនាយរងប៉ុស្តិ៍ និងនាយរងផ្នែក) ដោយគ្រាន់តែហៅ លោក-លោកស្រីអធិការរងមកចុះហត្ថលេខា ជាការស្រេច។
២- ស្នើសុំតែងតាំងលោកអនុសេនីយ៍ឯក ស៊ុំ សុផានិត នាយរងប៉ុស្តិ៍នគរបាលរដ្ឋបាលភ្លើងឆេះរទេះ ទៅជានាយប៉ុស្តិ៍នគរបាលរដ្ឋបាលកំបូល ជំនួសលោកនាយប៉ុស្តិ៍ចាស់ ដែលត្រៀមចូលនិវត្តន៍ ជាថ្នូរនឹងប្រាក់ ដោយមិនគិតពីអតីតភាពការងារ ។
៣- ប្រើប្រាស់កម្លាំងស៊ីវិល មកត្រួតត្រាលើកងកម្លាំងនគរបាលខណ្ឌកំបូល។
៤- កងកម្លាំងអន្តរាគមន៍គ្មានរបបឧបត្ថម្ភ គ្មានរបបបាយ (បើអ្នកណាហ៊ានតវ៉ា ហៅមកសរសេរស្វ័យរបាយការណ៍) ។
៥- ចាប់តាំងពីលោកអធិការចូលមក គាត់បានឲ្យកងកម្លាំងអន្តរាគមន៍ រើកន្លែងស្នាក់នៅចំនួនពីរដង តាមតែចិត្តគាត់ គ្មានស្ដាប់យោបល់របស់លោក-លោកស្រីអធិការរងណាម្នាក់ឡើយ ។
៦- ការងារសវនកម្ម បានប្រមូលលុយពីប៉ុស្តិ៍ ក្នុងមួយប៉ុស្តិ៍ ១០០ដុល្លារ ចំនួន៧ប៉ុស្តិ៍ ស្មើនឹង ៧០០ដុល្លារ។ ផ្នែកចរាចរណ៍ ២០០ដុល្លារ, ផ្នែកអន្តោប្រវេសន៍ ១០០ដុល្លារ, ផ្នែកព្រហ្មទណ្ឌ ១០០ដុល្លារ, ផ្នែកគ្រឿ.ងញៀ.ន ១០០ដុល្លារ, ផ្នែកសន្តិសុខ ១០០ដុល្លារ។
៧- បង្ខំឲ្យនាយប៉ុស្តិ៍ពីររូប ប៉ុស្តិ៍ប្រទះឡាង និងប៉ុស្តិ៍បឹងធំ ចេញថ្លៃធ្វើទ្វារបន្ទប់អស់ប្រាក់ចំនួន ១.៥០០ដុល្លារ (មួយពាន់ប្រាំរយដុល្លារ) ជាថ្នូរនឹងការប្រកាសចូលកាន់តួនាទីជានាយប៉ុស្តិ៍ប្រទះឡាង និងប៉ុស្តិ៍បឹងធំ។
៨- បានបញ្ជាឲ្យលោកនាយប៉ុស្តិ៍ទាំង៧ ចុះស្រង់ម៉ុងខ្មោ.ច (ស្រង់ឈ្មោះខ្មោ.ចដែលបានស្លា.ប់ ស្វែងរកសាច់ញាតិ កូនចៅ និងលេខទូរស័ព្ទរបស់សាច់ញាតិកូនចៅខ្មោ.ចដែលស្លា.ប់)។
៩- ដាក់គំនាបឲ្យអធិការរងដឹកនាំកម្លាំងផ្នែក និងប៉ុស្តិ៍ពាក់ព័ន្ធ ចុះចាប់ឲ្យបាន (ម៉ូតូអត់ស្លាកលេខ ជនសង្ស័យ ប្រើប្រាស់គ្រឿ.ងញៀ.ន យកមកអធិការដ្ឋាន ទោះមាន ឬមិនមានសារធាតុញៀ.នក៏តម្រូវឲ្យបង់ប្រាក់ចាប់ពី ១០០ដុល្លារ ទៅ ៣០០ដុល្លារ ជាថ្នូរនឹងការដោះលែង។
១០- ចុះចាប់ប្រជាពលរដ្ឋតាមដងផ្លូវដោយខ្លួនឯង ទោះបីជាមិនដឹងថា ជាបទល្មើសអ្វីឲ្យប្រាកដ ដោយគ្មានការអនុញ្ញាតពីព្រះរាជអាជ្ញា នៅចំណុចមុខខ្លោងទ្វាវត្តស្ងួនពេជ្រ ។
១១- នៅថ្ងៃទី៣ ខែកញ្ញា ឆ្នាំ២០២៣ មានករណីឆ.ក់ត្រី (ឆ.ក់គ្រាន់តែមួយហូបក្នុងគ្រួសារ) ស្ថិតនៅភូមិអង្គជ័យ សង្កាត់ស្ងោរ ខណ្ឌកំបូល រាជធានីភ្នំពេញ ឃាត់បានប្រជាជនចំនួនពីរនាក់ ទី១-ឈ្មោះ អ៊ុំ តូច ភេទប្រុស អាយុ៤៣ឆ្នាំ មុខរបរកម្មករ ទី២-ឈ្មោះ ភួង វណ្ណៈ ភេទប្រុស អាយុ៣២ឆ្នាំ មុខរបរកម្មករ ឃុំខ្លួនពួកគាត់មួយយប់ ដោយទារលុយពីពួកគាត់ចំនួន ១.០០០ដុល្លារ (មួយពាន់ដុល្លារ) ជាថ្នូរនឹងការដោះលែង និងមិនបានឆ្លងព្រះរាជអាជ្ញាឡើយ។
១២- នៅថ្ងៃទី៣ ខែកញ្ញា ឆ្នាំ២០២៣ ករណីរកលោ.តពីលើផ្ទះ នៅភូមិតាកេរ្តិ៍ សង្កាត់កំបូល ខណ្ឌកំបូល រាជធានីភ្នំពេញ ដោយជនរងគ្រោះមានសតិមិនគ្រប់ ឈ្មោះ ជូរ ភន អាយុ៤៥ឆ្នាំ ភេទប្រុស ឃាត់យកមកឃុំខ្លួនមួយយប់ នៅអធិការដ្ឋានខណ្ឌកំបូល ដោយគ្មានការឯកភាពពីព្រះរាជអាជ្ញា ។
១៣- នៅថ្ងៃទី៨ ខែកញ្ញា ឆ្នាំ២០២៣ កម្លាំងប៉ុស្តិ៍បឹងធំ បានឃាត់ជនសង្ស័យចំនួនបីនាក់ ដោយពិនិត្យទឹកនោមមានសារធាតុញៀ.នតែមួយនាក់ (ពីរនាក់គ្មានសារធាតុញៀ.ន) ប៉ុស្តិ៍បានឆ្លងទៅលោកអធិការ គាត់បានឲ្យឃាត់ទាំងបីនាក់យកទៅផ្នែកជំនាញ ឃុំខ្លួនមួយយប់ ព្រឹកឡើងឲ្យថៅកែមកដោះស្រាយ ។
១៤- នៅថ្ងៃទី៩ ខែកញ្ញា ឆ្នាំ២០២៣ មានករណីបូមប្រេង ស្ថិតនៅភូមិកប់ភ្លុក សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ បានឃាត់ខ្លួនជនសង្ស័យចំនួនពីរនាក់ ទី១-ឈ្មោះ យិន សាវឌី ភេទប្រុស អាយុ២៦ឆ្នាំ មុខរបរប៉ះកង់ឡាន ទី២-ឈ្មោះ រស់ សុធា ភេទប្រុស អាយុ៣៤ឆ្នាំ មុខរបរបើកឡានដឹកប្រេង ដោយចោទប្រកាន់ថា «ករណីលួ.ចបូមប្រេងសាំងលក់ឲ្យអ្នកប៉ះកង់ឡាន» ដោយក្រុមហ៊ុនមិនបានប្ដឹងទេ។ ក្រុមហ៊ុនថា «ជាប្រេងរបស់អ្នកបើកបរឡានទេ» តែលោកអធិការនៅតែមិនស្តាប់ និងទារលុយបាន ៧៥០ដុល្លារ (ប្រាំពីររយហាសិបដុល្លារ) ជាថ្នូរនឹងការដោះលែងវិញ។
១៥- នៅថ្ងៃទី១៣ ខែកញ្ញា ឆ្នាំ២០២៣ មានករណីឆ.ក់ត្រី (ឆ.ក់គ្រាន់តែមួយហូបក្នុងគ្រួសារ) នៅភូមិទួលតាឡាត់ សង្កាត់កំបូល ខណ្ឌកំបូល រាជធានីភ្នំពេញ ឃាត់បានទី១.ឈ្មោះ អ៊ុក លីន ភេទប្រុស អាយុ៤៧ឆ្នាំ មុខរបរកម្មករ សំណង់ ទី២.ឈ្មោះ កង សារ៉ាត់ ភេទប្រុស អាយុ៤២ឆ្នាំ មុខរបរយោធាឆ័ត្រយោង៩១១ ដោយបានឃុំខ្លួនពួកគាត់មួយយប់ ទាំងគាត់ជាយោធា ហើយដោយមិនមានការឯកភាពពីព្រះរាជអាជ្ញា។
១៦- នៅថ្ងៃទី១៥ ខែកញ្ញា ឆ្នាំ២០២៣ មានករណីចាប់ឡានអ្នកដឹកគ្រែលក់ ឃាត់ទុកនៅប៉ុស្តិ៍នគរបាលរដ្ឋបាលភ្លើងឆេះរទេះមួយយប់ ដោយគ្នាគ្មានលុយ ភ្លឺឡើងទើបលោកអធិការឲ្យចេញទៅវិញ។
១៧- នៅថ្ងៃទី១៩ ខែកញ្ញា ឆ្នាំ២០២៣ មានករណីលួ.ចកាបូបស្ពាយក្នុងឡានមិនបានសម្រេច ឃាត់បានជនសង្ស័យឈ្មោះ កែវ ប៉ៃលិន ភេទប្រុស អាយុ៣៩ឆ្នាំ ជនជាតិខ្មែរ មុខរបរមិនពិតប្រាកដ ដោយលោកអធិការបញ្ជាឲ្យនាយប៉ុស្តិ៍នគរបាលរដ្ឋបាលប្រទះឡាងបញ្ចប់រឿង និងទារប្រាក់ពីជនសង្ស័យបានចំនួន ១.០០០ដុល្លារ (មួយពាន់ដុល្លារ) ជាថ្នូរនឹងការដោះលែង។
១៨- នៅថ្ងៃ២០ ខែកញ្ញា ឆ្នាំ២០២៣ មានករណីស្រវឹងស្រា កាន់កាំបិ.តឡូឡាឈ្លោះគ្នា នៅភូមិតាជេត សង្កាត់បឹងធំ ខណ្ឌកំបូល ដោយភាគីរងគ្រោះមិនបានប្តឹងប្តល់ទេ សុំឲ្យប៉ុស្តិ៍ធ្វើកិច្ចសន្យាអប់រំ តែលោកអធិការបានបញ្ជាគាត់ឲ្យជួយលុយចំនួន ៥០០ដុល្លារ (ប្រាំរយដុល្លារ) ទើបដោះលែងគាត់ឲ្យទៅផ្ទះវិញ។
បន្ទាប់ពីរងនូវបណ្ដឹងចោទប្រកាន់ពីសំណាក់មន្ត្រីនគរបាលក្រោមឱវាទទាំងអស់បែបនេះ លោក ហុង ពិសិដ្ឋ អធិការនគរបាលខណ្ឌកំបូល បានប្រាប់អ្នកកាសែតក្នុងស្រុកមួយនាព្រឹកថ្ងៃទី៧ ខែធ្នូ ឆ្នាំ២០២៣នេះថា «ការមិនពេញចិត្តជារឿងបុគ្គល ហើយការចោទប្រកាន់ចេះតែចោទទៅ ចំពោះរូបលោកមិនបានធ្វើដូចជាការចោទប្រកាន់នោះឡើយ»។
លោកបានបញ្ជាក់បន្ថែមទៀតថា «នេះគឺជាការចោទប្រកាន់ដែលគ្មានមូលដ្ឋានច្បាស់លាស់ ហើយគឺជាសិទ្ធិបុគ្គល ចំពោះសកម្មភាពដែលលោកធ្វើ គឺគិតគូរពីសន្តិសុខជូនប្រជាពលរដ្ឋ ធ្វើទៅតាមបញ្ជារបស់ថ្នាក់ដឹកនាំឲ្យបម្រើប្រជាពលរដ្ឋនៅក្នុងមូលដ្ឋានតែប៉ុណ្ណោះ។ អ្វីដែលជាមូលដ្ឋានពិតប្រាកដនោះ គឺស្ថិតនៅលើចំណាត់ការបស់ថ្នាក់ដឹកនាំ ក៏ដូចជាវិន័យកងកម្លាំង ហើយចំពោះការកោះហៅឲ្យចូលបំភ្លឺបែបណានោះ គឺស្ថិតលើបទបញ្ជាផ្ទៃក្នុងរបស់ថ្នាក់ដឹកនាំ»៕
ចែករំលែកព័តមាននេះ