សូមវាងផ្លូវ មុខ​វិមាន៧មករា ចាប់ពីស្តុប​ជលផល-ចំការមន ដល់ស្ពានក្បាល​ថ្នល់-ច្បារអំពៅ នៅ​ថ្ងៃ ៩-១០ធ្នូ

ភ្នំពេញ៖ សាលារាជធានីភ្នំពេញ បានប្រកាសថា នៅថ្ងៃទី៩ និងថ្ងៃទី១០ ខែធ្នូ ឆ្នាំ២០២៣ វេលាម៉ោង ៧ព្រឹក គណៈកម្មាធិការកណ្តាលគណបក្ស​ប្រជាជនកម្ពុជា នឹងរៀបចំមហាសន្និបាត​វិសាមញ្ញតំណាង​ទូទាំងប្រទេស​របស់​គណបក្ស​ប្រជាជនកម្ពុជា នៅវិមាន ៧មករា ស្ថិត​ក្នុងសង្កាត់​ទន្លេបាសាក់ ខណ្ឌចំការមន រាជធានីភ្នំពេញ ក្រោមអធិបតីភាពដ៏ខ្ពង់ខ្ពស់របស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា។

ដើម្បី​ឱ្យកម្មវិធីខាងលើ ប្រព្រឹត្តទៅដោយ​រលូន រក្សាបាននូវសន្តិសុខ សុវត្ថិភាព សណ្តាប់ធ្នាប់​ និងរបៀបរៀបរយ​សាធារណៈ ព្រមទាំង​បញ្ចៀសបាននូវការកកស្ទះចរាចរ រដ្ឋបាលរាជធានី​ភ្នំពេញ នឹង​បញ្ចៀស​ចរាចរចំពោះយានយន្ត​គ្រប់ប្រភេទ លើកំណាត់មហាវិថី​ព្រះនរោត្តម ចាប់ពីស្តុប​ជលផល ដល់ស្ពានអាកាសក្បាលថ្នល់ និងបរិវេណជុំវិញទីតាំងប្រារព្ធពិធី នៅថ្ងៃទី៩ និងថ្ងៃទី១០ ខែធ្នូ ឆ្នាំ២០២៣ ចាប់ពីវេលាម៉ោង ៥ព្រឹក រហូតដល់បញ្ចប់កម្មវិធីនៃថ្ងៃនិមួយៗ​។