អ្នកធាក់ស៊ីក្លូមានកម្លាំងចិត្តបន្តិច ក្រោយភ្ញៀវទេសចរកម្រើកឡើងវិញ
- ភ្នំពេញ
ក្រុមអ្នកធាក់ស៊ីក្លូ ដែលកាលពីអំឡុងពេលកូវីដ១៩វា.យលុក មានដល់អ្នកខ្លះដេកអត់បាយ នៅពេលនេះហាក់មានកម្លាំងចិត្តឡើងវិញ ដើម្បីបន្តរបរនេះ
ក្រុមអ្នកធាក់ស៊ីក្លូ ដែលកាលពីអំឡុងពេលកូវីដ១៩វា.យលុក មានដល់អ្នកខ្លះដេកអត់បាយ នៅពេលនេះហាក់មានកម្លាំងចិត្តឡើងវិញ ដើម្បីបន្តរបរនេះ ពីព្រោះភ្ញៀវទេសចរបានកម្រើកឡើងវិញបន្តិច ។
លោកតា ញឹក ប៊ុនធឿន អាយុ៦៨ឆ្នាំ ជាអ្នកធាក់ស៊ីក្លូតាំងពីឆ្នាំ១៩៩៣ បានប្រាប់អោយកម្មវិធី លុយដឹងថា «ក្រោយស្ងាត់សឹងដាច់បាយ នៅពេលនេះ ជាពិសេសនៅពេលដែលភ្ញៀវទេសចរកម្រើកឡើងវិញបន្តិច ស្ថានភាពរបរប្រើកម្លាំងនេះ ហាក់មានចំណូលរើបៗឡើងវិញដែរ»។
លោកតា ញឹក ប៊ុនធឿន បានបន្តថា «ខ្ញុំមានម៉ូយដឹកមួយៗ ក្នុងមួយថ្ងៃបានប្រហែល៥ទៅ៦នាក់ដែរ ក្នុងនោះតម្លៃនៃការដឹកមួយជើងចន្លោះ៥០០០រៀលឡើងទៅ តាមទីតាំងជិត ឬឆ្ងាយ » ។
ស្រដៀងគ្នានេះដែរ លោកតា សូរ ម៉ុច បានប្រាប់អោយដឹងដែរថា «ជាក់ស្តែងកាលពីអំឡុងពេលរៀបចំពិធីបុណ្យអុំទូកកន្លងទៅនេះ អ្នករកជិះស៊ីក្លូ ដូចជាកើនឡើងគួរអោយកត់សម្គាល់ ក្នុងនោះលោកតាអាចរកប្រាក់កម្រៃច្រើនជាងពេលធម្មតាៗ ហើយក្រោយអុំទូកក៏នៅតែមានអ្នកទេសចរ ជិះកម្សាន្តមួយៗឥតដែលដាច់ដូចពីមុនទេ»។
ជុំវិញបញ្ហានៃរបរធាក់ស៊ីក្លូនេះ លោកស្រី ឡុង សុខហ៊ួយ ប្រធានសមាគមស៊ីក្លូកម្ពុជា បាន ប្រាប់អោយកម្មវិធីលុយដឹងថា «ក្នុងពេលព្រះរាជពិធីបុណ្យអុំទូកឆ្នាំនេះ មានភ្ញៀវទេសចរជិះកម្សាន្តស៊ីក្លូសប្បាយច្រើន។ អ្នកមក នៅតែមក អ៊ីចឹងដោយសារគាត់អញ្ជើញមកស្រុកខ្មែរយើង យើងមានកម្មវិធីសប្បាយៗច្រើនដែរ ដូចជាចូលឆ្នាំខ្មែរ ចូលឆ្នាំចិន បុណ្យភ្ជុំបិណ្ឌជាដើម ។ ដូច្នេះរបរនេះនៅតែដំណើរការ »។
លោកស្រី ឡុង សុខហ៊ួយ បានបន្តថា «ក្នុងរយៈពេល៣ថ្ងៃនេះ អ្នកធាក់ស៊ីក្លូទទួលបានភ្ញៀវទៅតាមចំនួនជើងដែលពួកគាត់ធាក់ និងភ្ញៀវទេសចរជិះកម្សាន្ត ដែលក្នុងម្នាក់អាចដឹកភ្ញៀវតិចបំផុតក៏២នាក់ក្នុងមួយថ្ងៃ»។
លោកស្រី ឡុង សុខហ៊ួយ បន្តថា «ជាក់ស្តែង យើងអត់ច្បាស់ទេ ព្រោះចំណូលរបស់គាត់ យើងមិនត្រួតពិនិត្យទេ។ ជួនកាលគាត់អាចទទួលលុយធីបពីភ្ញៀវទេសចរបន្ថែមទៀតក៏មាន។ ការងារនេះ គាត់មិនអាចប្រាប់យើងបាន។ យើងអត់ឆែកប្រាក់ចំណូលគាត់ទេ»។
លោកស្រី ឡុង សុខហ៊ួយ បន្ថែមថា «ទោះបីជាស្ថានភាពកម្ពុជាទទួលរងឥទ្ធិពលពីជំងឺកូវីដ១៩យ៉ាងណាក៏ដោយ ក៏វត្តមានស៊ីក្លូនៅតែមានចលនា ក្នុងនោះក្រៅពីដឹកភ្ញៀវទេសចរ អ្នកធាក់ស៊ីក្លូក៏ដឹកជញ្ជូនអីវ៉ាន់ក្នុងរាជធានីភ្នំពេញផងដែរ»។
លោកស្រី ឡុង សុខហ៊ួយ បន្តថា «រាល់ថ្ងៃ ពួកគាត់ដឹកភ្ញៀវតាមផ្សារ តែប្រសិនបើភ្ញៀវតាមផ្សារមិនជិះ ពួកគាត់ក៏រំពឹងលើភ្ញៀវទេសចរដែរ។ ភ្ញៀវមានរប៉ះរប៉ោះ ពួកគាត់អាចប្រកបអាជីវកម្ម គាត់អាចរស់បានអត់អីទេ គ្រាន់តែថា មិនបរបូរ តែក៏គ្រប់គ្រាន់សម្រាប់គាត់ម្នាក់ៗ»។
លោកស្រី ឡុង សុខហ៊ួយ បន្ថែមថា «ក្នុងសមាគមស៊ីក្លូនេះ មានសមាជិកចំនួន១២០នាក់ ដែលមានភាគច្រើនមកពីខេត្តព្រៃវែង និងខេត្តស្វាយរៀង។ អ្នកធាក់ស៊ីក្លូ នៅក្នុងសមាគម សុទ្ធសឹងតែជាមនុស្សវ័យចំណាស់ ដោយសារពួកគាត់មិនអាចធ្វើការងារផ្សេងបាន។ ពួកគាត់ភាគច្រើនមកពីបណ្តាខេត្ត ដោយពុំមានកន្លែងស្នាក់នៅពិតប្រាកដ។ ដូច្នេះពួកគាត់សម្រាកនៅតាមសំយ៉ាបផ្ទះរបស់ប្រជាពលរដ្ឋ ឬតាមផ្សារជាដើម»។
លោកស្រី សុខហ៊ួយ មានប្រសាសន៍ថា «ស៊ីក្លូ ជាផ្ទះរបស់គាត់ ជាកន្លែងញ៉ាំ ជាកន្លែងគេង ជាកន្លែងអ្វីទាំងអស់របស់ពួកគាត់»។
អត្ថបទដោយ ៖ ស នីត
ចែករំលែកព័តមាននេះ