ក្រសួងធនធានទឹក និងឧតុនិយម នៅព្រឹកថ្ងៃទី៣ រហូតដល់ថ្ងៃទី៥ ខែធ្នូ ឆ្នាំ២០២៣នេះ បានចេញសេចក្ដីជូនដំណឹង ស្ដីអំពីស្ថានភាពធាតុអាកាសនៅព្រះរាជាណាចក្រកម្ពុជា ក្នុងនោះបានឱ្យដឹងថា នៅខេត្តកែប និងខេត្តកំពត
រាជធានីភ្នំពេញ ៖ ក្រសួងធនធានទឹក និងឧតុនិយម នៅព្រឹកថ្ងៃទី៣ រហូតដល់ថ្ងៃទី៥ ខែធ្នូ ឆ្នាំ២០២៣នេះ បានចេញសេចក្ដីជូនដំណឹង ស្ដីអំពីស្ថានភាពធាតុអាកាសនៅព្រះរាជាណាចក្រកម្ពុជា ក្នុងនោះបានឱ្យដឹងថា នៅខេត្តកែប និងខេត្តកំពត មានភ្លៀងធ្លាក់ លាយឡំទៅដោយផ្គរ និងរន្ទះ ដែលអាចគ្របដណ្តប់ទៅលើផ្ទៃដីចាប់ពី៤០%ទៅ៥០% ។
យោងតាមរយៈសេចក្ដីជូនដំណឹង បានឱ្យដឹងថា ប្រព័ន្ធសម្ពាធខ្ពស់ពីប្រទេសចិន មានឥទ្ធិពលខ្សោយ មកលើភាគខាងជើង និងភាគឦសាននៃប្រទេសកម្ពុជា ជាមួយនឹងខ្យល់មូសុងឦសានបក់ពីខ្សោយទៅមធ្យម។
ក្រសួងបានគូសបញ្ជាក់ថា ស្ថានភាពបែបនេះ នឹងធ្វើឱ្យធាតុអាកាស ចាប់ពីថ្ងៃទី៣ រហូតដល់ថ្ងៃទី៥ ខែធ្នូ ឆ្នាំ២០២៣ នៅតំបន់វាលទំនាប មានសីតុណ្ហភាពអប្បបរមាចាប់ពី២៤°C -២៦°C និងសីតុណ្ហភាពអតិបរមាចាប់ពី៣៣°C -៣៥°C ហើយខ្យល់បក់មកពីទិសឦសាន ក្នុងល្បឿនចាប់ពី១ម៉ែត្រ-៣ម៉ែត្រ/វិនាទី។ ថ្ងៃទី៣ ខែធ្នូ នៅរាធានីភ្នំពេញ និងបណ្តាខេត្តនៅប៉ែកខាងត្បូង មានភ្លៀងធ្លាក់ខ្សោយ ដែលអាចគ្របដណ្តប់លើផ្ទៃដីចាប់ពី២០%-៣០%។
ក្រសួងបន្តទៀតថា ចំណែកនៅតំបន់ខ្ពង់រាប មានសីតុណ្ហភាពអប្បបរមាចាប់ពី២២°C -២៤°C និងសីតុណ្ហភាពអតិបរមាពី៣១°C -៣៣°C ហើយខ្យល់បក់មកពីទិសឦសាន ក្នុងល្បឿនចាប់ពី២ម៉ែត្រ-៤ម៉ែត្រ/វិនាទី។ ដោយឡែក តំបន់មាត់សមុទ្រ មានសីតុណ្ហភាពអប្បបរមាចាប់ពី២៤°C -២៦°C និងសីតុណ្ហភាពអតិបរមាចាប់ពី២៩°C -៣១°C ហើយខ្យល់បក់មកពីទិសឦសានក្នុងល្បឿនចាប់ពី៣ម៉ែត្រ-៥ម៉ែត្រ/វិនាទី។ ថ្ងៃទី៣ ខែធ្នូ នៅខេត្តកែប និងខេត្តកំពត នឹងមានភ្លៀងធ្លាក់ លាយឡំទៅដោយផ្គរ និងរន្ទះ ដែលអាចគ្របដណ្តប់លើផ្ទៃដីចាប់ពី៤០%ទៅ ៥០% ។ ហើយរលកសមុទ្រ នឹងមានកម្ពស់ចាប់ពី០,៥០ម៉ែត្រ-១,២៥ម៉ែត្រ៕
ចែករំលែកព័តមាននេះ