ខេត្តមណ្ឌលគិរី ៖ បន្ទាប់ពីអាជ្ញាធរខេត្តរៀបចំទីតាំងលេងកម្សាន្តជាច្រើនកន្លែង ខេត្តមណ្ឌលគិរី ដែលធ្លាប់តែស្ងប់ស្ងាត់អស់មួយរយៈពេលធំនោះ ពេលនេះចាប់ផ្តើមមានភ្ញៀវទេសចរយ៉ាងច្រើនសន្ធឹកសន្ធាប់សម្រុកទៅកម្សាន្ត នៅក្នុងអំឡុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុកហើយ។
ដោយគ្រាន់តែថ្ងៃទី១ នៃព្រះរាជពិធីបុណ្យអុំទូក គឺមានភ្ញៀវទេសចរជិត១ម៉ឺននាក់ចូលមកកម្សាន្តលំហែកាយ ខណៈពេលដែលអាជ្ញាធរខេត្តមណ្ឌលគិរី ក៏បានរៀបចំកម្មវិធីសប្បាយរីករាយជាច្រើនបែបចាំទទួលស្វាគមន៍ភ្ញៀវទេសចរ ក៏ដូចជា ប្រជាពលរដ្ឋនៅចំណុចទំនប់សែនសុខដុម និងទំនប់សែនមនោរម្យ ស្ថិតក្នុងក្រុងសែនមនោរម្យផ្ទាល់តែម្ដង ។
ឯកឧត្ដម សាន់ ដារិទ្ធ អភិបាលរងខេត្តមណ្ឌលគិរី បានមានប្រសាសន៍ឱ្យដឹងថា ពិតជាប្លែកសម្រាប់ឆ្នាំនេះ ព្រោះមានភ្ញៀវទេសចរយ៉ាងកុះករបានទៅកម្សាន្តលំហែកាយតាមរមណីយដ្ឋានទេសចរណ៍នានាជាច្រើនក្នុងខេត្ត។ ហើយនេះ ក៏ជាប្រវត្តិសាស្ត្រសម្រាប់ខេត្តមណ្ឌលគិរី ដែលមានការបណ្ដែតប្រទីប ខណៈកន្លងមក ពុំធ្លាប់មាននោះទេ ។ ចំណែកតាមបណ្ដាស្រុកក៏មានរៀបចំពិធីកម្សាន្តសប្បាយដូចគ្នាដែរ តួយ៉ាងដូចស្រុកកោះញែក មានការរៀបចំពិធីប្រណាំងទូក ដែលបង្ហាញឲ្យពីភាពអភិវឌ្ឍន៍ទៅមុខម្ដងបន្តិចៗសម្រាប់ខេត្តមណ្ឌលគិរី ។
ឯកឧត្ដមបន្តថា នៅចំណុចទំនប់សែនសុខដុម ទំនប់សែនមនោរម្យ ក៏មានរៀបចំកម្មវិធីកម្សាន្តជាច្រើនបែបជូនពុកម៉ែបងប្អូនលេងសប្បាយ ប៉ុន្តែយ៉ាងណាក៏ដោយ លោកសូមអំពាវនាវឲ្យមានការទុកដាក់សំរាមឲ្យបានត្រឹមត្រូវ និងសូមគោរពច្បាប់ចរាចរណ៍ ។
បើតាមអ្នកទេសចរដែលមកលេងខេត្តមណ្ឌលគិរី បានលើកឡើងដែរថា លោកបានមកកម្សាន្តខេត្តមណ្ឌលគិរីច្រើនលើកមកហើយ ប៉ុន្តែនៅតែចង់មកកម្សាន្តម្ដងហើយម្ដងទៀត ព្រោះនៅទីនោះមានទេសភាពស្អាត រមណីយដ្ឋានទេសចរណ៍សម្បូរបែប ហើយចំណុចពិសេសរបស់ខេត្តមណ្ឌលគិរី ដែលលោកពេញចិត្តបំផុត គឺរដូវកាលដែលមានទេសភាពវាលស្មៅពណ៌បៃតង ។
សូមបញ្ជាក់ដែរថា នៅក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅខេត្តមណ្ឌលគិរី ទាក់ទាញចំណាប់អារម្មណ៍អ្នកទេសចរយ៉ាងច្រើនលើសលុបមកលេងកម្សាន្តលំហែកាយ ដោយតាមបណ្ដាផ្ទះសំណាក់ សណ្ឋាគារ និងរីសត ភ្ញៀវទេសចរបានទំនាក់ទំនងកក់បន្ទប់ស្នាក់នៅសឹងតែពេញបន្ទប់អស់ទៅហើយ។ ហើយភ្ញៀវទេសចរដែលមកកម្សាន្តក៏មិនខកបំណងដែរ ពីព្រោះរដូវកាលនេះ នៅខេត្តមណ្ឌលគិរី ចាប់ផ្ដើមធ្លាក់ខ្យល់រងារ ខ្យល់អាកាសល្អបរិសុទ្ធ ទេសភាពស្រស់បំព្រង ទាំងនេះហើយដែលអ្នកទេសចរត្រូវការបំផុតពីខេត្តមណ្ឌលគិរី៕
ចែករំលែកព័តមាននេះ