ខេត្តកំពង់ឆ្នាំ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានគូសបញ្ជាក់ថា រាជរដ្ឋាភិបាល អាណត្តិទី៧ បានដាក់គោលដៅសំខាន់ គឺជំរុញកំណើនសេដ្ឋកិច្ច និងលើកទឹកចិត្តឲ្យមានការវិនិយោគទៅកាន់ខេត្ត ដើម្បីធ្វើយ៉ាងណាឲ្យមានការអភិវឌ្ឍ ប្រកបដោយចីរភាព ។
ការគូសបញ្ជាក់របស់សម្ដេចធិបតី នាយករដ្ឋមន្ដ្រី បែបនេះ ក្នុងពិធីសម្ពោធបើកឱ្យប្រើប្រាស់ជាផ្លូវការ “កំណាត់ផ្លូវជាតិលេខ៥ ចាប់ពីព្រែកក្តាម ទៅដល់បាត់ដំបង ប្រវែងសរុប ២៤៦,១៥គីឡូម៉ែត្រ និងបើកការដ្ឋានសាងសង់កំណាត់ផ្លូវជាតិលេខ៥ ចាប់ពីសិរីសោភ័ណ្ឌ ទៅដល់ប៉ោយប៉ែត ប្រវែងសរុប ៣៥,១៤គីឡូម៉ែត្រ” ក្រោមឥណទានសម្បទានពីរដ្ឋាភិបាល នៃប្រទេសជប៉ុន នាព្រឹកថ្ងៃទី២២ ខែវិច្ឆិកា ឆ្នាំ២០២៣ ស្ថិតក្នុងខេត្ដកំពង់ឆ្នាំង ។
សម្ដេចធិបតី នាយករដ្ឋមន្ត្រី បានលើកឡើងថា ការដាក់គោលដៅនេះ គឺបង្កើតការងារច្រើនជូនប្រជាពលរដ្ឋ ការងារដែលមានគុណភាព ការងារ ដែលមានបៀវត្សរ៍ និងអត្ថប្រយោជន៍ និងជំនាញផ្សេងៗឱ្យប្រជាពលរដ្ឋ ការងារ ដែលផ្ដល់នូវការគាំពារសិទ្ធិ ការគាំពារសុខុមាល ភាពជូនប្រជាពលរដ្ឋ និងសមធម៌ គឺការចែករំលែកនៅក្នុងផលទាំងអស់ ហើយក៏មិនមែន សម្រាប់ក្រុងណាមួយ មិនមែនតែភ្នំពេញ តែឱ្យរីកទៅតាមខេត្តផ្សេងៗ ។
សម្តេចធិបតី បានថ្លែងបន្តថា អាទិភាពរបស់យើង នៅក្នុងការធ្វើផ្លូវ គឺជាអាទិភាពគន្លឹះមួយនៅក្នុងអាទិភាព ចំនួន៥ ដែលរួមមាន មនុស្ស ផ្លូវ ទឹក ភ្លើង និងបច្ចេកវិទ្យា ។
សម្តេចធិបតី នាយករដ្ឋមន្ដ្រី បានបញ្ជាក់ផងដែរ ការកសាងហេដ្ឋារចនាសម្ព័ន្ធ បើយើងនិយាយពីផ្លូវ គឺយើងមិនមែននិយាយតែផ្លូវគោកតែមួយទេ យើងនិយាយអំពីផ្លូវទឹក ផ្លូវអាកាស ហើយឥឡូវ មានផ្លូវឌីជីថលមួយទៀត ។
ជាមួយគ្នានោះដែរ សម្តេចធិបតី ក៏បានបញ្ជាក់ថា ៖ «ថ្ងៃនេះយើងបានសម្ពោធ នៅផ្លូវជាតិលេខ៥ ដែលជាសរសៃឈាមមួយដ៏វែង ភ្ជាប់ពីតំបន់មួយទៅតំបន់មួយ ហើយមានការប្រទាក់ក្រឡាជាមួយនឹងតំបន់ទីប្រជុំផ្សេងៗ និងផ្លូវជាតិផ្សេងៗ ដែលផ្តល់អត្ថប្រយោជន៍សេដ្ឋកិច្ចយ៉ាងច្រើនដល់ប្រជាពលរដ្ឋ ដែលរស់នៅតាមដងផ្លូវនេះ» ៕
ចែករំលែកព័តមាននេះ