រាជធានីភ្នំពេញ ៖ សម្តេចធិបតីហ៊ុន ម៉ាណែត នាយករដ្ឋមន្ត្រីកម្ពុជា បានអំពាវនាវដល់កម្មករ កម្មការិនីទាំងអស់ ត្រូវរួមគ្នាចាប់យកឱកាសការងារ ដែលរាជរដ្ឋាភិបាល បានខិតខំគៀងគរមកឲ្យនៅក្នុងប្រទេសមានសុខសន្តិភាព…
រាជធានីភ្នំពេញ ៖ សម្តេចធិបតីហ៊ុន ម៉ាណែត នាយករដ្ឋមន្ត្រីកម្ពុជា បានអំពាវនាវដល់កម្មករ កម្មការិនីទាំងអស់ ត្រូវរួមគ្នាចាប់យកឱកាសការងារ ដែលរាជរដ្ឋាភិបាល បានខិតខំគៀងគរមកឲ្យនៅក្នុងប្រទេសមានសុខសន្តិភាព ស្ថេរភាព ដែលមិនចាំបាច់រត់កាត់គ្រាប់ផ្លោងដូចជំនាន់ឪពុកម្តាយរបស់យើងនោះទេ ។
ការអំពាវនាវរបស់សម្តេចធិបតី ធ្វើឡើងក្នុងឱកាសអញ្ជើញជួបសំណេះសំណាលជាមួយកម្មករ និយោជិត ជិត២ម៉ឺននាក់ នៅតាមបណ្តារោងចក្រ សហគ្រាស ដែលមានមូលដ្ឋាន ក្នុងខណ្ឌកំបូល រាជធានីភ្នំពេញ នាថ្ងៃទី២១ ខែវិច្ឆិកា ឆ្នាំ២០២៣ ។
ក្នុងឱកាសនោះ សម្តេចធិបតី បានលើកឡើងយ៉ាងដូច្នេះថា ៖ “រាជរដ្ឋាភិបាល បានខិតខំប្រឹងប្រែង នឹងបន្តខិតខំប្រឹងប្រែង ដើម្បីបង្កើនបរិស្ថានការងារ ប្រកាន់ជំហរគោលនយោបាយទីផ្សារសេរី បើកវិស័យឯកជន លើកទឹកចិត្តវិនិយោគក្នុងប្រទេស និងក្រៅប្រទេស លើកទឹកចិត្តឲ្យបងប្អូនអាចប្រកបអាជីវកម្មខ្លួនឯងបាន ទៅធ្វើអ្វីខ្លួនឯងបាន ដើម្បីឲ្យសិទ្ធិសេរីភាព ខំប្រឹងបើកវគ្គបណ្តុះបណ្តាល ហើយឲ្យរៀនសូត្រ តាំងពីមត្តេយ្យរហូតដល់មធ្យម ដល់ឧត្តមទៀត បង្កើនសមត្ថភាពឲ្យខំទៅទាក់ទាញវិនិយោគ មកបង្កើតការងារឲ្យ រៀបចំគោលនយោបាយ ដើម្បីឲ្យអភិវឌ្ឍន៍ ដូចបេឡាជាតិសន្តិសុខសង្គម (ប.ស.ស) កាន់តែល្អ ប្រាក់សោធនយើងមាន យើងដើរហើយ រោងចក្រសហគ្រាសបានមកហើយ” ។
ជាមួយគ្នានោះដែរ សម្តេចនាយករដ្ឋមន្ត្រី បានបញ្ជាក់ថា ៖ «អ្វីដែលសំខាន់ គឺបងប្អូនផ្ទាល់តែម្តង ដែលត្រូវផ្តល់មកវិញ គឺរួមគ្នាចាប់យកឱកាស ដែលផ្តល់ឲ្យនេះ នៅក្នុងសុខសន្តិភាព ស្ថេរភាព ដែលយើងមិនចាំបាច់រត់កាត់គ្រាប់ផ្លោង ដូចជំនាន់ឪពុកម្តាយយើង មានឱកាសធ្វើការងារនៅទីនេះ ហើយមានឱកាសកាន់តែប្រសើរ សូមចាប់យកឱកាសទាំងអស់នេះ ដើម្បីពង្រឹងខ្លួនឯង និងដើម្បីចូលរួមនៅក្នុងការជំរុញអភិវឌ្ឍន៍ សេដ្ឋកិច្ចប្រទេសជាតិយើង ដូចបងប្អូនបានធ្វើមកដល់ម៉ោងនេះ» ។
សម្តេចធិបតី បានបន្តថា ប្រទេសយើង មិនអាចដើរមកដល់ម៉ោងនេះ បើគ្មានបងប្អូនខិតខំប្រឹងប្រែងនោះទេ បើបងប្អូនមិនខំប្រឹងប្រែងធ្វើការ រហូតទៅដល់ថែមម៉ោងថែមទៀត ដើម្បីជំរុញផលិតភាពរបស់យើងពិតណាស់បងប្អូនបានចំណូលបន្ថែម ។
ក្នុងនោះដែ សម្តេចធិបតី ក៏បានលើកឡើងពីចំណុចមួយចំនួន ដែលធ្លាប់មានកាលពីពេលមុន ដោយបានមានប្រសាសន៍ថា ៖ “កន្លែងខ្លះ មានបែបនេះ ដែលខ្ញុំដឹង កន្លងទៅនៅ កន្លែងខ្លះ ឧទាហរណ៍មកធ្វើការងារ ក្នុងការងារសំណង់ បងប្អូនកន្លែងខ្លះ គាត់ទៅធ្វើការមួយខែ បើកបានប្រាក់ខែហើយ គាត់យកទៅចាយសិន អស់បានមកធ្វើការងារទៀត កាលមុនមាន! តែឥឡូវប្រែប្រួលច្រើន” ៕
ចែករំលែកព័តមាននេះ