រាជធានីភ្នំពេញ ៖ គិតមកទល់នាពេលនេះ ចំណងអាពាហ៍ពិពាហ៍រវាងលោក ជា វិបុល និងអ្នកនាង គង់ សុជាតិ បានអូសបន្លាយរយៈពេល១០ឆ្នាំមកហើយ ខណៈពេលចំណងស្នេហ៍របស់អ្នកទាំងពីរបានចំណងដៃកូនស្រីម្នាក់ហើយដែរ។
នៅថ្ងៃទី៩ ខែវិច្ឆិកា ឆ្នាំ២០២៣នេះ ពិធីករលោក ជា វិបុល បានប្រកាសជាថ្ងៃខួបអាពាហ៍ពិពាហ៍របស់លោកជាមួយភរិយាអ្នកនាង គង់ សុជាតិ បានចំនួន១០ឆ្នាំ ហើយលោកក៏បានរៀបចំការញ៉ាំអាហារពិសេសមួយលក្ខណៈគ្រួសារទៀតផង។
អ្វីជាការកត់សម្គាល់ នៅក្នុងថ្ងៃដ៏ពិសេសនោះ លោក ជា វិបុល បានសន្យាធ្វើរឿងពិសេសមួយសម្រាប់អ្នកនាង គង់ សុជាតិ និងគ្រួសារ នោះគឺលោកនឹងខិតខំថែរក្សាគ្រួសារតូចមួយនេះអោយបានល្អប្រសើរ បើទោះបីជាលោកមិនមែនជាមនុស្សល្អឥតខ្ចោះក៏ដោយ។
លោក ជា វិបុល បានបង្ហោះសារនៅលើបណ្តាញសង្គមថា «៩ វិច្ឆិកា ២០១៣- ៩ វិច្ឆិកា ២០២៣ ខួបអាពាហ៍ពិពាហ៍១០ឆ្នាំ»។ លោកបញ្ជាក់ថា «ថ្វីត្បិតតែបងមិនមែនជាមនុស្សល្អឥតខ្ចោះ ប៉ុន្តែបងនឹងខិតខំមើលថែក្រុមគ្រួសារតូចយើងមួយនេះអោយបានល្អ»។
ដោយឡែកនៅក្នុងថ្ងៃដ៏ពិសេសនេះដែរ ពិធីការិនីចាស់វស្សា អ្នកនាង គង់ សុជាតិ ក៏បានបញ្ចេញសារលើបណ្តាញសង្គមទៅកាន់ស្វាមីលោក ជា វិបុល ដែរថា «ពេលវេលាបណ្តាលអោយយើងជួបគ្នា ពេលវេលាមិនយូរមិនឆាប់ យើងបានចាប់ដៃគ្នាអស់រយៈពេល១០ឆ្នាំហើយក៏អរគុណសម្រាប់ក្តីស្រលាញ់ដ៏ធំធេងរបស់បងចំពោះអូន និងគ្រួសារ ធ្វើអោយស្នេហាមួយនេះ វាកាន់តែមានន័យខ្លាំងក្លា និងពោរពេញដោយសុភមង្គល !! Happy 10th Year Anniversary»។
ជាការកត់សម្គាល់ ក្រោយពីឃើញលោក ជា វិបុល និងអ្នកនាង គង់ សុជាតិ បង្ហោះសារខាងលើ ដោយអមជាមួយនឹងរូបភាពជុំគ្រួសារដ៏ផ្អែមល្ហែមនោះ គេក៏ឃើញមានមហាជន ជាពិសេសបណ្តាអ្នកគាំទ្របានចូលទៅធ្វើការខំមិន ដោយម្នាក់ៗបានសម្តែងការរីករាយ អបអរ និងជូនពរពួកគេអោយមានសុភមង្គលក្នុងរង្វង់គ្រួសារ។
យ៉ាងណា កន្លងមក លោក ជា វិបុល និងអ្នកនាង គង់ សុជាតិ ក៏ធ្លាប់ជួបរឿងប្រេះស្រាំក្នុងគ្រួសារផងដែរ បន្ទាប់ពីលោក ជា វិបុល បានផ្ទុះរឿងអាស្រូ.វស្នេហាជាមួយនឹងពិធីការិនីរួមទ្រនំមួយរូប។
ទោះជាយ៉ាងណា ក្រោយរលកកំដៅនូវរឿងអាស្រូ.វខាងលើ បានស្ងប់ស្ងាត់ លោក ជា វិបុល បានព្យាយាមដោះស្រាយកែប្រែ និងរឹតចំណងស្នេហ៍រវាងលោក និងអ្នកនាង គង់ សុជាតិ ឡើងវិញ។ ដោយមួយរយៈចុងក្រោយនេះ លោកតែងតែបញ្ចេញរូបភាពតាមបណ្តាញសង្គមយ៉ាងផ្អែមល្ហែមជាមួយភរិយា និងគ្រួសារ ក្នុងពេលដែលពួកគេដើរលេងកម្សាន្តនៅទីកន្លែងនានា ។
គួរបញ្ជាក់ផងដែរថា លោក ជា វិបុល និងអ្នកនាង គង់ សុជាតិ បានសម្រេចចិត្តរៀបការជាមួយគ្នានៅថ្ងៃទី៩ ខែវិច្ឆិកា ឆ្នាំ២០១៣ បន្ទាប់ពីអ្នកទាំងពីរបានមើលចិត្តថ្លើមគ្នាអស់ជាច្រើនឆ្នាំ ។ មុនចូលរោងការ អ្នកនាង គង់ សុជាតិ បានបញ្ជាក់នូវហេតុផលមួយថា «លោក ជា វិបុល ជាបុរសមានការទទួលខុសត្រូវខ្ពស់ មានទឹកចិត្តល្អចំពោះអ្នកនាង និងគ្រួសារ ហើយបណ្ដាលមកពីការសេពគប់គ្នា ធ្វើឲ្យអ្នកនាងរីកចម្រើនផ្នែកជំនួញ ដែលអាចនិយាយបានថា មានហុងស៊ុយត្រូវគ្នា ទើបចំណងអាពាហ៍ពិពាហ៍មួយត្រូវបានធ្វើឡើង»៕
ចែករំលែកព័តមាននេះ