អាចនិយាយបានថា ពិតជាមិនធម្មតាដែលបវរកញ្ញាចក្រវាទ្បកម្ពុជា ចន សុទីម៉ា ត្រូវបានអ្នករៀបចំកម្មវិធី «Miss Universe 2023» ជ្រើសរើសយកជាបេក្ខភាពបវរកញ្ញាចំនួនតែ៨ប្រទេសតែប៉ុណ្ណោះ សម្រាប់ការថតរូបជាមួយនឹង
រាជធានីភ្នំពេញ ៖ អាចនិយាយបានថា ពិតជាមិនធម្មតាដែលបវរកញ្ញាចក្រវាទ្បកម្ពុជា ចន សុទីម៉ា ត្រូវបានអ្នករៀបចំកម្មវិធី «Miss Universe 2023» ជ្រើសរើសយកជាបេក្ខភាពបវរកញ្ញាចំនួនតែ៨ប្រទេសតែប៉ុណ្ណោះ សម្រាប់ការថតរូបជាមួយនឹង Concept របស់ Miss Universe នោះ គឺថតរូបដោយជិះជាមួយ helicopter និងការជិះសេះ ។ នេះបើតាមការ Live លើ IG របស់ស្រីស្អាត ចន សុទីម៉ា នៅថ្ងៃទី៧ ខែវិច្ឆិកា ឆ្នាំ ២០២៣ នេះ។
ការជ្រើសរើសថតវីដេអូពិសេសនេះ ត្រូវបានគេគិតថា នេះអាចជាចំណុចចាប់ផ្ដើមដ៏ល្អមួយសម្រាប់ស្រីស្អាត ចន សុទីម៉ា ដែលធ្វើឱ្យស្ថាប័នបវរកញ្ញាដ៏ធំលំដាប់ពិភពលោកមួយនេះ កាន់តែឃើញច្បាស់ពីសម្រស់ និងសមត្ថភាពរបស់បវរកញ្ញាកម្ពុជា។
តាមរយៈសកម្មភាពទាំងអស់នេះ ជាមួយនឹងការថតរូបភាពជាមួយសម្រស់ដ៏ទាក់ទាញបង្ហាញជាបន្តបន្ទាប់នៅលើបណ្តាញសង្គម បានធ្វើឱ្យបណ្តាអ្នកគាំទ្រ និងអ្នកស្នេហាវិស័យបវរកញ្ញានៅកម្ពុជា បង្ហាញសុទិដ្ឋិនិយម និងក្តីរំពឹងខ្ពស់ថា ស្រីស្អាត ចន សុទីម៉ា នឹងទទួលបានលទ្ធផលល្អនៅក្នុងការប្រកួតប្រជែងកម្មវិធីមួយនេះ ព្រោះនាងហាក់មានចំណុចវិជ្ជមានច្រើន ដែលអាចមានភាពប្រដំប្រសងគ្នាជាមួយបវរកញ្ញាដែលមកពីបណ្តាប្រទេសជុំវិញពិភពលោក។
ជាការកត់សម្គាល់ បវរកញ្ញាតំណាងកម្ពុជា កញ្ញា ចន សុទីម៉ា បានចេញដំណើរពីប្រទេសកម្ពុជា ដើម្បីចូលរួមកម្មវិធីប្រកួតសម្រស់ «Miss Universe» លើកទី៧២ នៅឯប្រទេស El Salvador កាលពីល្ងាចថ្ងៃទី២ ខែវិច្ឆិកា ឆ្នាំ២០២៣ ខណៈពេលនៃការចេញដំណើរនោះ គេឃើញមានការលើកទឹកចិត្ត និងការជូនដំណើរពីសំណាក់អ្នកគាំទ្រ មិត្តភក្តិ និងក្រុមគ្រួសាររបស់នាងផងដែរ។
ស្រីស្អាត ចន សុទីម៉ា បង្ហាញស្នាមញញឹមប្រកបដោយទំនុកចិត្ត និងភាពមុះមុតក្នុងការលើកទង់ប្រទេសកម្ពុជាទៅប្រកួតលើឆាកអន្តរជាតិនេះ។ បវរកញ្ញាកម្ពុជារូបនេះ បានសម្តែងការត្រេកអរ និងបង្ហាញការប្តេជ្ញាចិត្តខ្ពស់ក្នុងការប្រកួតប្រជែងដណ្តើមយកភាពជោគជ័យមកកម្ពុជាវិញ។ នាងនឹងបញ្ចេញអស់ពីសមត្ថភាពដែលមាន ដើម្បីសាងស្នាដៃលើឆាកចក្កវាឡដ៏ធំអស្ចារ្យនេះ។
ហើយមុននឹងការចាកចេញទៅប្រកួតខាងលើនេះ ស្រីស្អាត ចន សុទីម៉ា បានលើកឡើងថា «នាងបានត្រៀមខ្លួនជាច្រើនមកហើយសម្រាប់ការប្រកួតដ៏អស្ចារ្យនេះ និងត្រៀមនាំវប្បធម៌ អរិយធម៌ដ៏ផូរផង់របស់ខ្មែរយើង ទៅបង្ហាញឱ្យពិភពលោកបានស្គាល់កម្ពុជាកាន់តែច្បាស់ឡើង»។
មិនត្រឹមតែប៉ុណ្ណោះ តាមការលេចលឺសម្រាប់ការប្រកួតនេះ អ្នកដឹកនាំបានត្រៀមឈុតសម្រាប់ស្រីស្អាត ចន សុទីម៉ា រហូតដល់ ១៥៥ ឈុត ដែលក្នុងនោះមានទាំងឈុតច្នៃឡើងពីអ្នកច្នៃម៉ូដក្នុងស្រុក និងឈុតពីប្រេនល្បីៗធំៗផងដែរ ៕
ចែករំលែកព័តមាននេះ