មហាជន ជាពិសេសបណ្តាអ្នកគាំទ្រ សម្តែងការអបអរសាទរក្នុងពេលដែលបេក្ខភាពតំណាងកម្ពុជា គឺកញ្ញា ណូ ហ្វារីដា បានជាប់ចំណាត់ថ្នាក់រងទី៣ នៅក្នុងការប្រកួត «Miss Teen of the Universe 2023» ដែលបានធ្វើឡើង
រាជធានីភ្នំពេញ ៖ មហាជន ជាពិសេសបណ្តាអ្នកគាំទ្រ សម្តែងការអបអរសាទរក្នុងពេលដែលបេក្ខភាពតំណាងកម្ពុជា គឺកញ្ញា ណូ ហ្វារីដា បានជាប់ចំណាត់ថ្នាក់រងទី៣ នៅក្នុងការប្រកួត «Miss Teen of the Universe 2023» ដែលបានធ្វើឡើងកាលពីថ្ងៃទី៤ ខែវិច្ឆិកា ឆ្នាំ២០២៣ នៅប្រទេសឥណ្ឌា។
ក្នុងនាមតំណាងបវរកញ្ញាកម្ពុជា ស្រីស្អាត ណូ ហ្វារីដា បានខិតខំប្រឹងបញ្ចេញសមត្ថភាពពីមួយវគ្គទៅមួយវគ្គ ដើម្បីប្រកួតប្រជែងជាមួយបេក្ខភាពបវរកញ្ញានានាដែលមកពីតាមបណ្តាប្រទេសចំនួន២០ រហូតទទួលបានជោគជ័យនាពេលនេះ។
ក្រោយចប់ការប្រកួត ស្រីស្អាត ណូ ហ្វារីដា បានបង្ហោះសារនៅលើបណ្តាញសង្គមថា «នាងខ្ញុំពិតជាអរគុណដល់ប្រជាជនរបស់ខ្ញុំទាំងអស់គ្នា ដែលផ្តល់កម្លាំងចិត្តដល់រូបខ្ញុំក្នុងពេលប្រកួត»។
នាងបញ្ជាក់ថា «នាងខ្ញុំបានប្រឹងប្រែងអស់ពីសមត្ថភាពរបស់នាងខ្ញុំហើយ ដើម្បីមាតុភូមិ និងប្រជាជនរបស់ខ្ញុំ នេះជាលទ្ធផលដែលនាងខ្ញុំទទួលបានជាដំណែង 3rd runner up Miss teen of the universe international ។ អរគុណដល់ម៉ាក់ប៉ា បងប្រុស និងបងៗ មិត្តភក្តិទាំងអស់គ្នា ដែលជួយខ្ញុំ មុនពេលមកប្រកួត នឹងក្នុងពេលប្រកួត ជួបគ្នាថ្ងៃស្អែកប្រទេសកម្ពុជារបស់ខ្ញុំ នាងខ្ញុំនឹងទៅដល់ប្រទេសកម្ពុជានៅម៉ោង 1:00PM នៅអាកាសយានដ្ឋានអន្តរជាតិភ្នំពេញ»។
យ៉ាងណាម៉ិញ ទស្សនិកបានចូលរួមសម្តែងការអបសាទរ និងកោតសរសើរពីសមត្ថភាពរបស់ស្រីស្អាត ណូ ហ្វារីដា ដែលអាចដណ្តើមបានមកុដក្នុងតំណែងលំដាប់រងទី៣ នាពេលនេះ បើទោះបីជាកញ្ញាមិនបានគ្រងមកុដកញ្ញាឯកនៅក្នុងកម្មវិធីខាងលើនេះក៏ដោយ។
គួរបញ្ជាក់ផងដែរថា កញ្ញា ណូ ហ្វារីដា ធ្លាប់កាន់កា.ប់តំណែងលំដាប់រងទី២ MTIC និង Miss Teen Charm Cambodia 2022 ។ កញ្ញា ណូ ហ្វារីដា ក៏ធ្លាប់មានឱកាសទៅប្រកួតលើឆាកអន្តរជាតិនៅឯប្រទេស Colombia ក្នុងកម្មវិធី «Miss Teen Charm 2022» ផងដែរ ។ ជាមួយគ្នានោះ ក្រោយពីគ្រងតំណែងខាងលើ កញ្ញា ណូ ហ្វារីដា បានខិតខំពង្រឹងសមត្ថភាព និងហ្វឹកហាត់ផ្នែកដើរម៉ូដឲ្យកាន់តែល្អជាងមុន។
មិនត្រឹមតែប៉ុណ្ណោះ ស្រីស្អាត ណូ ហ្វារីដា ក៏ត្រូវបានគេលើកសរសើរលើសពីរូបសម្ផស្សថា «នាងពិតជាស្រស់ស្អាត ទាំងមុខមាត់ និងរូបរាង ខណៈពេលចំណេះដឹង ព្រមទាំងទេពកោសល្យនាងក៏ល្អដែរ»៕
ចែករំលែកព័តមាននេះ