ផ្លូវប្រវែងជាង២០គីឡូម៉ែត្រ ដែលត.ភ្ជាប់ចាប់ពីផ្លូវជាតិលេខ៥ ទៅដល់ឃុំសំបួរ កំពុងតែរងការខូចខាត និងជួបការលំបាករយៈពេល២ឆ្នាំមកហើយ នៅស្រុកមង្គលបូរី ធ្វើឱ្យប្រជាពលរដ្ឋលំបាកក្នុងការធ្វើការដំណើរទៅមក និងដឹកកសិផលជាដើម ព្រោះតែ
ខេត្តបន្ទាយមានជ័យ ៖ ផ្លូវប្រវែងជាង២០គីឡូម៉ែត្រ ដែលត.ភ្ជាប់ចាប់ពីផ្លូវជាតិលេខ៥ ទៅដល់ឃុំសំបួរ កំពុងតែរងការខូចខាត និងជួបការលំបាករយៈពេល២ឆ្នាំមកហើយ នៅស្រុកមង្គលបូរី ធ្វើឱ្យប្រជាពលរដ្ឋលំបាកក្នុងការធ្វើការដំណើរទៅមក និងដឹកកសិផលជាដើម ព្រោះតែរថយន្តឈ្មួញដឹកស្រូវ និងរថយន្តដឹកដីលក់។
បើតាមប្រជាពលរដ្ឋ បានប្រាប់ឱ្យដឹងថា «ផ្លូវដែលត.ភ្ជាប់ចាប់ពីផ្លូវជាតិលេខ៥ រហូតដល់ឃុំសំបួរ ស្រុកមង្គលបូរី មានប្រវែងជាង២០គីឡូម៉ែត្រ កំពុងតែរងការខូចខាត និងធ្វើឱ្យប្រជាពលរដ្ឋជួបការលំបាកក្នុងការធ្វើដំណើរទៅមក ព្រមទាំងដឹកកសិផលមានរយៈពេល២ឆ្នាំមកហើយ នៅអំឡុងឆ្នាំ២០២២ និងឆ្នាំ២០២៣នេះ។ ហើយការខូចខាតផ្លូវស្ថិតក្នុងស្ថានភាពធ្ងន់ធ្ងរនេះ គឺដោយសារតែរថយន្តឈ្មួញដឹកស្រូវ និងរថយន្តដឹកដីលក់»។
ប្រជាពលរដ្ឋស្នើសុំឱ្យអភិបាលខេត្តបន្ទាយមានជ័យ និងមន្ទីរជំនាញដែលពាក់ព័ន្ធ ជួយពិនិត្យមើល និងសម្រួលផ្លូវនេះជូនប្រជាពលរដ្ឋឱ្យធ្វើដំណើរទៅមកបានស្រួលផង ព្រោះផ្លូវនេះរងការខូចខាតធ្ងន់ធ្ងរចាប់ពីឃុំគោកបល្ល័ង្គ រហូតដល់ឃុំសំបួរ ដែលមានផ្លូវកៅស៊ូមួយកំណាត់ និងផ្លូវក្រាលក្រួសក្រហមមួយកំណាត់រងការខូចខាតធ្ងន់ធ្ងរ ហើយប្រជាពលរដ្ឋជួបការលំបាកក្នុងការធ្វើដំណើរ និងសិស្សានុសិស្សទៅសាលារៀនផងដែរ។
ចំណែកលោក រ័ត្ន ដាស៊ីណង់ អភិបាលស្រុកមង្គលបូរី ក៏បានប្រាប់ឱ្យដឹងដែរថា «ផ្លូវ១ខ្សែប្រវែងជាង២០គីឡូម៉ែត្រ ត.ភ្ជាប់ចាប់ពីផ្លូវជាតិលេខ៥ ឃុំបន្ទាយនាង ឆ្លងកាត់ឃុំគោកបល្ល័ង្គ និងឃុំសំបួរនេះ គឺជាផ្លូវសម្រាប់ប្រជាពលរដ្ឋដឹកកសិផល និងសិស្សានុសិស្សទៅសិក្សានៅសាលារៀនដែលកំពុងរងការខូចខាតរយៈពេល២ឆ្នាំមកហើយ ប៉ុន្តែនៅឆ្នាំ២០២៣នេះ គឺខូចខាតធ្ងន់ធ្ងរ និងជួបការលំបាកចាប់ពីចំណុចឃុំគោកបល្ល័ង្គ រហូតដល់ឃុំសំបួរតែម្ដង»។
លោកបានបញ្ជាក់ថា «ផ្លួវ១ខ្សែដែលរងការខូចខាតនេះ មួយកំណាត់ជាផ្លូវចាក់កៅស៊ូ គ្រប់គ្រងថែទាំដោយមន្ទីរអភិវឌ្ឍន៍ និងជនបទខេត្ត ចំណែកផ្លូវមួយកំណាត់ទៀត គឺផ្លូវក្រាលក្រួសក្រហម ថែទាំដោយមន្ទីរសាធារណការ និងដឹកជញ្ជូនខេត្ត។ ក្រោយរងការខូចខាត រដ្ឋបាលស្រុកមង្គលបូរី ក៏បានរាយការណ៍ទៅរដ្ឋបាលខេត្ត និងស្នើសុំទៅមន្ទីរពាក់ព័ន្ធខាងលើ ដើម្បីជួយសម្រួល និងជួសជុលឡើងវិញដែរ ប៉ុន្តែមិនទាន់មានឆ្លើយតបនៅឡើយទេ ដូច្នេះទ្រាំលំបាកសិនទៅបងប្អូន»៕
ចែករំលែកព័តមាននេះ