ខេត្តបន្ទាយមានជ័យ ៖ រថយន្តបែនដឹកដី១គ្រឿង ដោយសារគេចគ្នាឯងក៏ក្រឡាប់ធ្លាក់ចូលប្រឡាយផ្ងារជើងឡើងលើ ហើយចោទថា មកពីអាជ្ញាធរមិនព្រមធ្វើផ្លូវឱ្យហើយ ដែលនៅសល់តែជាង១០០ម៉ែត្រទៀតប៉ុណ្ណោះ ។ ឧប្បត្តិហេតុគ្រោះថ្នាក់នេះ កើតឡើងកាលពីរសៀលថ្ងៃទី៣១ ខែតុលា ឆ្នាំ២០២៣កន្លងទៅ នៅភូមិសាលាក្រៅ សង្កាត់ភ្នៀត ក្រុងសិរីសោភ័ណ ។
អ្នកឃើញហេតុការណ៍និយាយថា នារសៀលថ្ងៃនោះរថយន្តបែន១គ្រឿងដឹកដីចាក់ក្នុងភូមិ
ហើយរថយន្តបែនដឹកដី១គ្រឿងទៀតធ្វើដំណើរបញ្ច្រាសទិសគ្នាពីខាងជើងទៅខាងត្បូង ។ លុះទៅដល់ចំណុចខាងលើដែលផ្លូវខូច ក៏បានគេចគ្នាបណ្ដាលឲ្យធ្លាក់ចូលប្រឡាយក្រឡាប់ផ្ងារជើងឡើងលើតែម្ដង តែពុំមានរងបួសទេ ។
ក្រោយពីមានគ្រោះថ្នាក់កើតឡើង ម្ចាស់រថយន្តបានហៅអេស្កាវ៉ាទ័រមកទាញបញ្ឈរឡើងវិញ ហើយទាញពីទឹកមកលើផ្លូវរួចអូសយកទៅឱ្យជាងជួសជុល ។ ម្ចាស់រថយន្តនិយាយថា ផ្លូវពីភូមិកសាងរួចរាល់ហើយ គ្រោងចាក់ផ្លូវកៅស៊ូ តែនៅប្រវែងជាង១០០ម៉ែត្រ អាជ្ញាធរមិនព្រមកសាងឱ្យរួចរាល់ទេ ទុកឱ្យរថយន្តគេចគ្នាក្រឡាប់ចូលប្រឡាយទឹកបែបនេះ ។
ប្រជាពលរដ្ឋនិយាយថា មូលហេតុដែលផ្លូវប្រវែងជាង១០០ម៉ែត្រតភ្ជាប់ពីសង្កាត់ភ្នៀត ខូចនេះ ព្រោះតែរថយន្តបែនដឹកដីលក់ចេញចូលខួបប្រាំងខួបវស្សា ។ ព្រោះតែប្រយោជន៍ខ្លួនឯង រកលុយដាក់ហៅប៉ៅ បែរជាមកចោទប្រកាន់អាជ្ញាធរទៅវិញ ដូចជាមិនត្រឹមត្រូវឡើយ ៕
ចែករំលែកព័តមាននេះ