ឆ្លងកាត់បទពិសោធន៍វិស័យបវរកញ្ញាប៉ុន្មានខែប៉ុណ្ណោះ តែកញ្ញា ម៉ៅ នីង ទទួលតំណែងលំដាប់រងទី១
- ភ្នំពេញ
រាជធានីភ្នំពេញ ៖ អបអរសាទរ កញ្ញា ម៉ៅ នីង ជាបវរកញ្ញាម្នាក់ដែលលេចធ្លោផងនោះ ពិតជាធ្វើបានល្អ កាលពីរាត្រីថ្ងៃទី២៧ ខែតុលា ឆ្នាំ២០២៣ ដោយកញ្ញាទទួលបានលំដាប់រងទី១ First Runner up។
ប្រាកដណាស់ កញ្ញា ម៉ៅ នីង ពិតជាទទួលបានការគាំទ្រខ្លាំងតាមរយៈការបង្ហាញសមត្ថភាពរបស់កញ្ញា បូករួមជាមួយចំណេះដឹង ក៏ដូចជាការដើរកាច់រាង អែនអន នៅលើឆាកដ៏ធំរបស់កម្មវិធីបវរកញ្ញាមួយ។
កញ្ញា ត្រូវបានគេដឹងថា គឺជាបេក្ខនារីមកពីខេត្តបាត់ដំបង ដែលពោរពេញទៅដោយសមត្ថភាព និងទេពកោសល្យពីធម្មជាតិ។ កញ្ញាក៏ជាមនុស្សម្នាក់ដែលស្រឡាញ់ចូលចិត្តធម្មជាតិ និងតែងតែមានក្តីស្រឡាញ់ចំពោះមនុស្សជុំវិញខ្លួន ក៏ដូចជា បវរកញ្ញាផ្សេងទៀតផងដែរ។
គួរបញ្ជាក់ផងដែរថា កញ្ញា ម៉ៅ នីង គឺជាកូនសិស្សរបស់កញ្ញា ស្លឹកឈើ ហើយស្រស់ស្រីរូបនេះ ទើបតែហាត់រៀន និងស្វែងយល់ពីវិស័យបវរកញ្ញាបានមួយរយៈពេលខ្លីតែប៉ុណ្ណោះ តែលទ្ធផលដែលទទួលបានលើសពីការរំពឹងទុក គឺ First Runner up នៅក្នុងកម្មវិធី Miss Glamour Look Cambodia ដែលទើបតែបិទបញ្ចប់នេះ។
តាមរយៈបទសម្ភាសន៍មួយសារព័ត៌មានកោះសន្តិភាព កញ្ញា ម៉ៅ នីង បានប្រាប់អោយដឹងថា «កញ្ញាពិតជារំភើបជាខ្លាំង ក្រោយកញ្ញាទទួលបានលំដាប់រងទី១ ពោលគឺវាអាចថា ជាក្តីស្រម៉ៃរបស់កញ្ញាផ្ទាល់ ដែលទទួលបានវា ហើយកញ្ញារំពឹងថា នាពេលអនាគតកញ្ញាធ្វើវាកាន់តែល្អជាងនេះបន្ថែមទៀត»។
កញ្ញា ម៉ោង នីង ដែលមកខេត្តបាត់ដំបងរូបនេះ បានបន្តថា «កញ្ញា ទើបតែហ្វឹកហាត់នៅលើវិស័យបវរកញ្ញានេះបាន៥ខែប៉ុណ្ណោះ ប៉ុន្តែលទ្ធផលដែលទទួលបានលើសពីការរំពឹងទុក ព្រោះកញ្ញាមានបទពិសោធន៍នៅក្មេងខ្ចី តែកញ្ញាអាចធ្វើវាបាន ពោលគឺកញ្ញារកពាក្យអ្វីមកថ្លែងពុំបានឡើយ»។
ក្នុងនោះផងដែរ កញ្ញាក៏បានបន្តទៀតថា «កម្មវិធីបវរកញ្ញាមួយនេះ ពិតជាបានបង្រៀនកញ្ញាច្រើន អោយកញ្ញាបានស្គាល់បវរកញ្ញាមកពីខេត្តផ្សេងៗ និងធ្វើអោយកញ្ញាចេះដឹកនាំ មានបទពិសោធន៍បន្ថែមក្នុងវិស័យមួយនេះ»។
ជាចុងក្រោយ កញ្ញា ម៉ៅ នីង ជាបេក្ខនារីម្នាក់ដែលលេចធ្លោនោះ ពិតជាអរគុណខ្លាំងណាស់ ចំពោះការគាំទ្ររបស់បងប្អូនមហាជន ដោយកញ្ញាមានតែពាក្យថា «អរគុណ» ហើយកញ្ញាក៏អរគុណដល់កញ្ញា ស្លឹកឈើ ដូចគ្នា ដែលជាគ្រូបង្វឹកតែងតែបង្ហាត់បង្រៀនកញ្ញាដោយយកចិត្តទុក និងធ្វើអោយកញ្ញាមានថ្ងៃនេះ៕ ដោយ ៖ លីហួ គីមឆាយ
ចែករំលែកព័តមាននេះ