តារាសម្តែងនាង ឈិន ម៉ានិច្ច បានប្រកាសបរិច្ចាគថវិកាមួយផ្នែកដែលនាងរកបានពីការសម្តែងនៅប្រទេសកាណាដា ដើម្បីជួយដល់មណ្ឌលកុមារកំព្រានៅកម្ពុជា បន្ទាប់ពី
រាជធានីភ្នំពេញ ៖ តារាសម្តែងនាង ឈិន ម៉ានិច្ច បានប្រកាសបរិច្ចាគថវិកាមួយផ្នែកដែលនាងរកបានពីការសម្តែងនៅប្រទេសកាណាដា ដើម្បីជួយដល់មណ្ឌលកុមារកំព្រានៅកម្ពុជា បន្ទាប់ពីនាងវិលត្រឡប់មកកាន់ទឹកដីកំណើតវិញ។
យ៉ាងណា តារាចម្រៀងរូបនេះ មិនបានបញ្ជាក់នៅឡើយទេថា តើមណ្ឌលកុមារកំព្រានៅក្នុងខេត្ត-ក្រុងណាដែលនាងនឹងយកថវិកាទៅជួយនោះឡើយ? ដោយនាងគ្រាន់តែលើកឡើងតាមបណ្តាញសង្គមថា «ថវិកាដែលខ្ញុំរកបានពីប្រទេសកាណាដា ខ្ញុំនឹងយកមួយចំណែក ដើម្បីបរិច្ចាគជូនដល់មណ្ឌលកុមារកំព្រានៅប្រទេសកម្ពុជា បងប្អូនបើមានបំណងចង់ទៅចូលរួមជាមួយខ្ញុំអាចចូលរួមបាន»។
តាមរយៈការបង្ហាញពីគោលបំណងខាងលើនេះរបស់ស្រីស្អាត ឈិន ម៉ានិច្ច នាពេលនេះ បានទទួលការកោតសរសើរយ៉ាងច្រើនពីមិត្តភក្តិ ជាពិសេសបណ្តាអ្នគគាំទ្ររូបនាង ក្នុងពេលដែលពួកគេចាត់ទុកថា នេះគឺជាទឹកចិត្តដ៏ប្រពៃមួយ ហើយក៏ជាគំរូមួយសម្រាប់អ្នកសិល្បៈជាច្រើនទៀតដែលមានធនធានច្រើន។
ជាការកត់សម្គាល់ តារាចម្រៀងនាង ឈិន ម៉ានិច បានដឹកដៃគ្នាចេញទៅច្រៀងសម្តែងនៅក្នុងប្រទេសកាណាដា សម្រាប់ផ្តល់ភាពសប្បាយរីករាយទៅដល់បងប្អូនខ្មែរយើងដែលរស់នៅទីនោះ ក្នុងឱកាសបុណ្យភ្ជុំបិណ្ឌ។
បើតាមការប្រកាសរបស់លោក ឆន សុវណ្ណរាជ នៅលើបណ្តាញសង្គមបានបញ្ជាក់ថា «ការចេញទៅនេះ គឺប្រើពេល១ខែកន្លះ ដើម្បីស្នាក់នៅ និងច្រៀងទីនោះ»។ លោកបន្តថា «បេសកកម្មបន្ទាប់របស់ខ្ញុំ ខ្ញុំបាទ ឆន សុវណ្ណារាជ និងប្អូនស្រី ឈិន ម៉ានិច្ច នឹងមាន Tour Concert នៅប្រទេសកាណាដា រយៈពេលមួយខែកន្លះ ចាប់ពីដើមខែតុលានេះតទៅតាម Schedule ដែលយើងខ្ញុំបានកំណត់»។
ដោយឡែកនៅក្នុងឱកាសចេញទៅសម្តែងនៅប្រទេសកាណាដា លើកនេះ តារាចម្រៀងប្រុសស្រីទាំង២ដួង ក៏បានឆ្លៀតពេលដើរលេងកម្សាន្ត ទិញអីវ៉ាន់ និងញ៉ាំអាហារឆ្ងាញ់ៗជាមួយបងប្អូនខ្មែរយើងដែលកំពុងរស់នៅលើទឹកដីកាណាដានោះផងដែរ ។
គួរបញ្ជាក់ថា ម្ចាស់ពានកម្មវិធី «Cambodian Idol »កញ្ញា ឈិន ម៉ានិច្ច គឺជាតារាតាមវង់ភ្លេងធ្លាប់មានប្រវត្តិកម្សត់ជូរចត់ និងបរាជ័យការងារជាច្រើនលើក ប៉ុន្តែកញ្ញាមិនបោះបង់ការតស៊ូទាំងនោះចោលឡើយ។ ជាក់ស្ដែង មុនមានវ័យ២២ឆ្នាំនេះ កញ្ញាបានរ៉ាប់រងការងារជួយសម្រាលបន្ទុកដល់គ្រួសារ ដោយខិតខំរកលុយចិញ្ចឹមប្អូនៗតាំងពីវ័យកុមារភាពមកម្ល៉េះ។
ស្រីស្អាត ឈិន ម៉ានិច្ច ធ្លាប់បានលើកឡើងថា «ដោយសារតែគ្រួសារនាងមានជីវភាពទីទ័លក្រីក្រពេក កាលពីនាងមានអាយុប្រមាណជាង១០ឆ្នាំ ឪពុកម្ដាយនាងបានចេញទៅរកស៊ីឆ្ងាយពីកូនៗ ដើម្បីរកប្រាក់មកផ្គត់ផ្គង់គ្រួសារ ប៉ុន្តែការរកស៊ីរបស់គាត់មិនបានគ្រប់នោះទេ គឺនៅតែស្ថិតក្នុងសភាពបានព្រឹកខ្វះល្ងាចដដែល»។
កញ្ញាបន្តថា «ពេលដែលឪពុកម្ដាយឃ្លាយឆ្ងាយ នាងត្រូវនៅមើលថែប្អូនប្រុស២នាក់ ជាមួយយាយតាមានវ័យចំណាស់ មិនអាចធ្វើការងាររកស៊ីកើត ដូច្នេះហើយពេលទំនេរពីការសិក្សា កញ្ញាតែងតែធ្វើការស៊ីឈ្នួលដកស្ទូងអ្នកជិតខាង ដោយក្នុងមួយថ្ងៃនាងអាចរកថវិកាបានត្រឹមតែ២៥០០រៀលទៅ៣០០០រៀលតែប៉ុណ្ណោះ»។
នាងបញ្ជាក់ថា «អស់រយៈពេល៤ឆ្នាំដែលនាង និងប្អូនៗបានរស់នៅដូចក្មេងកំព្រា ដែលគ្មានឪពុកម្ដាយនៅជិត ហើយនៅពេលពួកគាត់វិលត្រឡប់មកវិញ ក៏មិនមានប្រាក់ជួយជ្រោមជ្រែងគ្រួសារឲ្យប្រសើរឡើងដែរ គឺស្ថានភាពក្នុងគ្រួសារនាងនៅតែដូចដើម។ ចំណុចនេះហើយដែលធ្វើឲ្យនាងត្រូវសម្រេចចិត្តចេញរកលុយជួយគ្រួសារ ខណៈដែលនាងកំពុងរៀនថ្នាក់ទី១២ មិនទាន់បានប្រឡងចប់ផង នាងក៏បានមកធ្វើការរោងចក្រ»។
សម្រាប់ការដាក់ពាក្យប្រឡងកម្មវិធី «Cambodian Idol» ស្រីស្អាត ឈិន ម៉ានិច បានប្រាប់ដែរថា «ដំបូងឡើយ នាងមិនចង់ទេ ព្រោះធ្លាប់ប្រឡងធ្លាក់ក្នុងកម្មវិធី The Voice Cambodia ម្ដងរួចមកហើយ តែដោយសារម្ចាស់ហាងនាងច្រៀងពេលយប់ជំរុញខ្លាំងពេក នាងក៏ដាច់ចិត្តដាក់ពាក្យប្រឡងតែម្ដង ហើយនាងក៏បានជាប់នៅវគ្គក្រោយៗ រហូតទទួលបានជ័យលាភីម្ចាស់ពាន Cambodian Idol រដូវកាលទី២ តែម្ដង»។
គួរបញ្ជាក់ផងដែរថា ក្រោយពេលដែលនាងបានជាប់ហើយនោះ ជីវភាពរបស់ស្រីស្អាត ឈិន ម៉ានិច្ច បានផ្លាស់ប្តូរទាំងស្រុង ដោយសារនាងមានឱកាសចេញច្រៀងតាមបណ្តាឆាក ខុនសឺតនានាជាបន្តបន្ទាប់ ដែលធ្វើឲ្យនាងអាចមានឱកាសរកថវិកាបានច្រើនសម្រាប់ផ្គត់ផ្គង់គ្រួសារបានល្អប្រសើរជាងមុន៕
ចែករំលែកព័តមាននេះ