រាជធានីភ្នំពេញ ៖ តារាសម្តែង និងជាពិធីការិនី នាង ហ៊ិន ច័ន្ទនីរ័ត្ន បានចេញមុខឆ្លើយតបខ្លីមួយ ក្រោយមួយរយៈចុងក្រោយនេះ មានបណ្តាសារព័ត៌មានក្នុងស្រុកនានា បានចុះផ្សាយពីរូបនាងពាក់ព័ន្ធទៅនឹងរឿងរ៉ាវស្នេហាជាមួយបុរសមួយរូប បន្ទាប់ពីធ្លាយរូបអ្នកទាំងពីរស្និទ្ធស្នាលជាបន្តបន្ទាប់នៅលើបណ្តាញសង្គម ។
ពាក់ព័ន្ធរឿងរ៉ាវខាងលើនេះ ស្រីស្អាត ហ៊ិន ច័ន្ទនីរ័ត្ន នៅមិនទាន់ចេញមុខបកស្រាយឲ្យបានច្បាស់លាស់ថា តើរឿងមួយនេះជាការពិត ឬយ៉ាងណានោះឡើយ? ប៉ុន្តែតារាស្រីរូបនេះ គ្រាន់តែបញ្ចេញសារខ្លីមួយបង្ហោះនៅលើបណ្តាញសង្គម ដោយបញ្ជាក់ថា «ព័ត៌មាន page មួយចំនួនចុះផ្សាយគ្មានការពិត»។
តាមរយៈសារខាងលើនេះ គេដឹងបានថា ស្រីស្អាត ហ៊ិន ច័ន្ទនីរ័ត្ន ចង់សំដៅទៅលើព័ត៌មានដែលចុះផ្សាយជាបន្តបន្ទាប់អំពីរូបនាង ពាក់ព័ន្ធជាមួយបុរសម្នាក់ដែលគេសង្ស័យជាគូស្នេហ៍នោះថា ជាព័ត៌មានមិនពិត។
យ៉ាងណា បើទោះបីជាស្រីស្អាត ហ៊ិន ច័ន្ទនីរ័ត្ន បានចេញមុខបកស្រាយខ្លីខាងលើនេះក៏ដោយ ប៉ុន្តែគេនៅមិនទាន់អស់ការសង្ស័យនៅឡើយទេ ខណៈពេលដែលមហាជន ជាពិសេសបណ្តាមិត្តភក្តិរបស់នាងចង់ឲ្យនាងចេញមុខបកស្រាយអំពីរឿងនេះឲ្យបានច្បាស់លាស់ជាងនេះ ។
ជាការកត់សម្គាល់ កាលពីពេលថ្មីៗនេះ មហាជនសម្តែងការភ្ញាក់ផ្អើល បន្ទាប់ពីឃើញតារាសម្តែងនាង ហ៊ិន ច័ន្ទនីរ័ត្ន បានបង្ហាញមុខគូស្នេហ៍ថ្មីជាមួយបុរសម្នាក់ ដែលមានហ្វេសប៊ុកឈ្មោះថា «ដាយមិន ឌី» ទៅវិញ។ តាមរយៈការបែកធ្លាយរូបភាព ក្រោយពីនាងទទួលគ្រឿងឥស្សរិយយស ថ្នាក់មហាសេរីវឌ្ឍន៍ កាលពីថ្ងៃទី១០ ខែតុលា បន្ទាប់ពីថតចប់រឿង «កូនប្រុសក្រោមពន្លឺព្រះច័ន្ទពេញបូណ័មី» ក្នុងពេលដែលលោក ដាយមិន ឌី ក៏បានចេញសារខមិនសាទរនាង ហើយនាងក៏ហៅបុរសរូបនោះថា ជា «Huni»ទៀតផង ។
តែក្រោយមក សារឆ្លើយឆ្លងទាំងនោះ ត្រូវបានលុបចេញវិញ ប៉ុន្ដែនៅអាក់ខោនម្ចាស់ហ្វេសប៊ុកឈ្មោះ «ឌី» នោះ មានរូបថតផ្អែមល្ហែមជាច្រើនជាមួយស្រីស្អាត ច័ន្ទនីរ័ត្ន ជាពិសេសគឺរូបភាពដែលពួកគេទើបតែទៅដើរលេងកម្សាន្ដជាមួយគ្នានៅអាមេរិកកាលពីពេលថ្មីៗនេះ ។
តាមរយៈរូបភាពទាំងអស់នោះ ត្រូវបានគេគិតថា ស្រីស្អាត ហ៊ិន ច័ន្ទនីរ័ត្ន និងបុរសរូបនោះ ទំនងជាមានទំនាក់ទំនងគ្នាយូរដែរហើយ ព្រោះមើលទៅនាង និងបុរសរូបនោះ មានភាពស្និទ្ធស្នាល កៀកកើយគ្នាយ៉ាងខ្លាំង។
ពាក់ព័ន្ធទៅនឹងរឿងរ៉ាវស្នេហារបស់តារាស្រីរូបនេះផងដែរ កាលពីដើមឆ្នាំ២០២២ ស្រីស្អាត ហ៊ិន ច័ន្ទនីរ័ត្ន ក៏ធ្លាប់បញ្ចេញរូបភាពនាងស្និទ្ធស្នេហ៍នឹងគ្រូពេទ្យមួយរូបឈ្មោះ «សុវណ្ណារិទ្ធ» នៅតាម Tik Tok ដោយអ្នកទាំង២ថែមទាំងដើរលេងកម្សាន្ដជាមួយគ្នានៅអឺរ៉ុប និងទៅជិះទូកទេសចរណ៍រួមគ្នានៅកោះមួយ ក្នុងប្រទេសថៃទៀតផង។ រូបភាពខ្លះបង្ហាញថា លោកសុវណ្ណារិទ្ធ ថែមទាំងបានធ្វើខួបកំណើត និងញ៉ាំអាហារយ៉ាងរ៉ូមែនទិកជាមួយនាងថែមទៀតផង។ យ៉ាងណាម៉ិញ មិនទាន់បានប៉ុន្មានផងនោះ នៅចុងឆ្នាំ២០២៣ នេះ ស្រាប់តែតារាវ័យ៣២ឆ្នាំរូបនេះ បង្ហាញមុខគូស្នេហ៍ថ្មីដែលជាបុរសម្នាក់ខាងលើនេះទៅវិញ។
ទោះជាយ៉ាងណា មហាជន ជាពិសេសបណ្តាអ្នកគាំទ្រ ហ៊ិន ច័ន្ទនីរ័ត្ន បានបង្ហាញការសាទរ ប្រសិនបើបុរសខាងលើនេះ ពិតជាគូស្នេហ៍របស់នាងពិតប្រាកដមែននោះ ព្រោះរហូតមកទល់នាពេលនេះ នាងក៏មានវ័យកាន់តែច្រើនដែលសាកសមនឹងមានគូរជីវិត ខណៈពេលដែលអ្នកសិល្បៈរួមជំនាន់នាងខ្លះមានគូរ និងកូនរួចហើយដែរ ៕
ចែករំលែកព័តមាននេះ