តារាស្រីស្រស់ បេប៊ី បានបង្ហាញតម្រុយវិលរកអាជីពសិល្បៈចម្រៀងជាថ្មីឡើងវិញ បន្ទាប់ពីនាងខកខាន និងបាត់មុខពីវិស័យសិល្បៈមួយនេះអស់រយៈពេលប្រមាណជា
រាជធានីភ្នំពេញ ៖ តារាស្រីស្រស់ បេប៊ី បានបង្ហាញតម្រុយវិលរកអាជីពសិល្បៈចម្រៀងជាថ្មីឡើងវិញ បន្ទាប់ពីនាងខកខាន និងបាត់មុខពីវិស័យសិល្បៈមួយនេះអស់រយៈពេលប្រមាណជា៣ឆ្នាំចុងក្រោយ ដោយសារតែនាងងាកមកចាប់ជំនួញផ្ទាល់ខ្លួនមួយ ។
តារាស្រីស្រស់រូបនេះ បានបង្ហោះសារខ្លីមួយនៅលើបណ្តាញសង្គម ដោយនាងបញ្ជាក់ថា «ទំព័រដំបូង បានចាប់ផ្ដើម សុំកម្លាំងចិត្តពីបងប្អូនផងណា»។ ខណៈពេលដែលម្ចាស់ហាងសាឡានមួយ ដែលនាងធ្លាប់ផាត់មុខឲ្យស្រីស្អាត ប៊េបី នោះ ក៏បានសរសេរសារអមជាមួយនឹងរូបភាពរបស់តារារូបនេះ រួចបង្ហោះនៅលើបណ្តាញសង្គមបង្ហាញពីការស្វាគមន៍ចំពោះការវិលត្រឡប់របស់ ប៊េបី នាពេលនេះផងដែរ។
តាមរយៈសារដែលបង្ហោះខាងលើនេះ បានធ្វើឲ្យមហាជន ជាពិសេសបណ្តាអ្នកគាំទ្រស្រីស្អាត បេប៊ី មួយចំនួន នាំគ្នាធ្វើការសន្និដ្ឋានដូចៗគ្នាថា «តារាតូចច្រឡឹងសាច់.សខ្ចីរូបនេះប្រាកដជាវិលមកអាជីពសិល្បៈជាថ្មីឡើងវិញ ហើយនោះគឺជាដំណឹងល្អមួយសម្រាប់បណ្តាអ្នកគាំទ្ររូបនាងផងដែរ»។
ពាក់ព័ន្ធបញ្ហាខាងលើនេះ ស្រីស្អាត បេប៊ី បានអះអាងប្រាប់កោះសន្តិភាពតាមសារអេឡិចត្រូនិចថា «រូបនាងពិតជាកំពុងត្រៀមខ្លួនវិលមកអាជីពសិល្បៈជាថ្មីឡើងវិញប្រាកដមែន ខណៈពេលដែលការវិលត្រឡប់របស់នាងនាពេលនេះ គឺសម្រាប់តែការងារច្រៀងតែប៉ុណ្ណោះ»។
នាងបញ្ជាក់ថា «ការចេញមកចាប់អាជីពចម្រៀងនាពេលនេះ គឺនាងមិនបានចុះកុងត្រាជាមួយផលិតកម្មណាមួយឡើយ ក្រោយផ្តាច់កុងត្រាជាមួយផលិតថោននោះមក»។ នាងបន្ថែមថា «នាងនឹងរៀបចំការចេញបទចម្រៀងដោយខ្លួនឯងផ្ទាល់ ដោយសារតែនាងចង់ក្លាយជាតារាចម្រៀងឯករាជ្យ និងចង់ឲ្យមហាជន ជាពិសេសបណ្តាអ្នកគាំទ្រមើលឃើញពីការវិលមកវិញរបស់នាងក្នុងរូបភាពថ្មី ប្លែកពីមុន ព្រោះតែនាងសម្រុកតែការថតបទចម្រៀង ជាមួយនឹងក្រុមរាំតែប៉ុណ្ណោះ»។
យ៉ាងណា បើតាម បេប៊ី បន្តទៀតថា «ការវិលត្រឡប់មករកអាជីពចម្រៀងជាថ្មីរបស់នាងនាពេលនេះ នាងរំពឹងថា នឹងទទួលបានការគាំទ្រពីសំណាក់ទស្សនិកជន ខណៈពេលដែលនាងនឹងព្យាយាមរកអ្វីដែលថ្មី ប្លែក និងទាក់ទាញ»។
គួរបញ្ជាក់ថា ស្រីស្អាត បេប៊ី បានវិវឌ្ឍន៍ខ្លួនពីពិធីការិនី និងតារាសម្តែង មកជាតារាចម្រៀងមួយផ្សេងទៀត ដោយនាងធ្លាប់ចូលក្នុងផលិតកម្មថោន និងបានចេញបទចម្រៀងជាបន្តបន្ទាប់ នៅក្នុងនោះបទចម្រៀងញាក់កន្ត្រាក់អារម្មណ៍ ជាមួយនឹងក្បាច់រាំប្លែកៗរបស់នាងមួយចំនួន ក៏ទទួលបានការគាំទ្រពីសំណាក់ទស្សនិកជនផងដែរ។
ទោះបីជាយ៉ាងណា ក្រោយការចាប់អាជីពចម្រៀងមិនទាន់បានប៉ុន្មានឆ្នាំផងនោះ ស្រីស្អាត បេប៊ី ក៏សម្រេចផ្អាកការងារសិល្បៈនេះទាំងកណ្តាលទី ក្រោមហេតុផលងាកទៅពង្រឹងមុខរបរផ្ទាល់ខ្លួន ដែលរហូតមកទល់នាពេលនេះ ហាងកាហ្វេរបស់នាងបានពង្រីកសាខាជាច្រើនកន្លែងហើយនៅក្នុងរាជធានីភ្នំពេញ៕
ចែករំលែកព័តមាននេះ