រុស្ស៊ីដើរតាមគន្លងមិត្តចិន ផ្អាកការនាំចូលអាហារសមុទ្ររបស់ប្រទេសជប៉ុន
រុស្ស៊ី ៖ ប្រទេសរុស្ស៊ី កាលពីថ្ងៃទី១៦ ខែតុលា ឆ្នាំ២០២៣ បានដើរតាមគន្លងសម្ព័ន្ធមិត្តរបស់ខ្លួនគឺ
រុស្ស៊ី ៖ ប្រទេសរុស្ស៊ី កាលពីថ្ងៃទី១៦ ខែតុលា ឆ្នាំ២០២៣ បានដើរតាមគន្លងសម្ព័ន្ធមិត្តរបស់ខ្លួនគឺប្រទេសចិន ដើម្បីផ្អាកការនាំចូលអាហារសមុទ្រទាំងអស់របស់ប្រទេសជប៉ុន ជុំវិញការបារម្ភអំពីសុវត្ថិភាពអាហារ ក្រោយការបញ្ចេញទឹកកាកសំណល់កខ្វក់ពីរោងចក្រនុយក្លេអ៊ែរ Fukushima ចូលទៅក្នុងសមុទ្រ។
ជប៉ុនបានរិះគន់យ៉ាងខ្លាំង ចំពោះការលុកលុយរបស់រុស្ស៊ីលើអ៊ុយក្រែន ខណៈពេលដែលទំនាក់ទំនងរបស់ទីក្រុងតូក្យូជាមួយនឹងទីក្រុងប៉េកាំងដែលជាសម្ព័ន្ធមិត្តដ៏ស៊ីជម្រៅជាមួយនឹងទីក្រុងម៉ូស្គូ កាន់តែអាក្រក់ទៅៗ។
Rosselkhoznadzor ដែលជាស្ថាប័នរបស់រុស្ស៊ី ទទួលបន្ទុកគ្រប់គ្រងផលិតផលកសិកម្មបានលើកឡើងថា ខ្លួនកំពុងចូលរួមវិធានការរឹតបន្តឹងបណ្តោះអាសន្នរបស់ប្រទេសចិនលើការនាំចូលត្រី និងផលិតផលអាហារសមុទ្រពីប្រទេសជប៉ុន ចាប់ពីថ្ងៃទី១៦ ខែតុលា ឆ្នាំ២០២៣ គឺជាវិធានការប្រុងប្រយ័ត្នខ្ពស់។ ការរឹតបន្តឹងនឹងនៅតែបន្តរហូតដល់ព័ត៌មានពេញលេញចាំបាច់ ដើម្បីបញ្ជាក់ពីសុវត្ថិភាពនៃផលិតផលអាហារសមុទ្ររបស់ជប៉ុន នាពេលខាងមុខ។ រដ្ឋាភិបាលជប៉ុន ដែលបានហៅការហាមប្រាមរបស់ចិនគឺជាយុទ្ធសាស្ត្រនយោបាយ និងគ្មានវិទ្យាសាស្ត្រនោះ នៅមិនទាន់ធ្វើអត្ថាធិប្បាយអំពីចំណាត់ការរបស់រុស្ស៊ីនៅឡើយនោះទេ។
គួររំលឹកថា កាលពីឆ្នាំ ២០១១ កន្លងទៅ រ៉េអាក់ទ័រចំនួន ៣ នៅរោងចក្រនុយក្លេអ៊ែរ Fukushima-Daiichi ភាគឦសានប្រទេសជប៉ុន បានរងការខូតខាត បន្ទាប់ពីការរញ្ជួយដីដ៏ធំ និងរលកយក្សស៊ូណាមិ ដែលបានសម្លាប់មនុស្សប្រហែល ១៨,០០០នាក់ ។ ១២ឆ្នាំកន្លងមក ពោលគឺកាលពីខែសីហា ឆ្នាំ២០២៣ ប្រទេសជប៉ុនបានចាប់ផ្តើមបញ្ចេញទឹកកខ្វក់ចេញពីរោងចក្រនោះ ដែលរងផលប៉ះពាល់ទៅក្នុងមហាសមុទ្រប៉ាស៊ីហ្វិក។ ជាការឆ្លើយតប ប្រទេសចិនបានហាមឃាត់ការនាំចូលអាហារសមុទ្ររបស់ជប៉ុនទាំងអស់ ជុំវិញការចេញផ្សាយអំពីភាពអាត្មានិយម និង គ្មានការទទួលខុសត្រូវ និងបានចោទប្រកាន់ជប៉ុនថា ចាត់ទុកសមុទ្រដូចជាលូទឹកស្អុយ បើទោះបីជាជប៉ុនទទូចថា ប្រតិបត្តិការនេះ គឺមានសុវត្ថិភាព និងជាទិដ្ឋភាពគាំទ្រដោយទីភ្នាក់ងារថាមពលបរមាណូអន្តរជាតិយ៉ាងណាក៏ដោយ។
ទោះយ៉ាងណាក៏ដោយ ក្រុមមួយមកពីអង្គការឃ្លាំមើលនុយក្លេអ៊ែរបស់អង្គការសហប្រជាជាតិ រួមទាំងអ្នកវិទ្យាសាស្ត្រចិនផងដែរ គ្រោងនឹងយកសំណាកទឹកកង្វក់នោះ និងត្រីពីក្បែរទីតាំងនៅក្នុងសប្តាហ៍នេះ ដើម្បីធ្វើការពិសោធន៍។
សូមជម្រាបថា មុនពេលមានការហាមឃាត់នេះ ប្រទេសចិនគឺជាទីផ្សារដ៏ធំបំផុតរបស់ប្រទេសជប៉ុនសម្រាប់ត្រី ដែលមានចំនួនជាង ៥០០លានដុល្លារ នៃការនាំចេញក្នុងឆ្នាំ ២០២២ ។ រដ្ឋាភិបាលជប៉ុនបានសន្យាផ្តល់ជំនួយបន្ថែមសម្រាប់វិស័យនេសាទរបស់ខ្លួន ខណៈកំពុងស្វែងរកការជំរុញការនាំចេញទៅកាន់អឺរ៉ុប និងកន្លែងផ្សេងទៀត។ ចំណែកទីផ្សាររុស្សីមិនសូវសំខាន់សម្រាប់ជប៉ុននោះទេ ដែលមានចំនួនប្រហែលត្រឹម ១.៧លានដុល្លារប៉ុណ្ណោះ នៃការនាំចេញផលិតផលសមុទ្រកាលពីឆ្នាំ ២០២២។(ដកស្រង់ពី AFP និង Japan Times)
ចែករំលែកព័តមាននេះ