រាជធានីភ្នំពេញ ៖ ផលិតករ២រូប គឺលោក ចាន់ណា ចំណាន និងលោក កៅ សីហា បានលើកឡើងស្របគ្នា ពាក់ព័ន្ធនឹងការជួបរឿងរ៉ាវពីអ្នកសិល្បៈមួយចំនួន ដែលបង្ហាញកាយវិការពើងទ្រូងមិនស្គាល់អ្នកធ្លាប់ជួយផ្តួចផ្តើមឲ្យមានមុខមាត់ ក្រោយពីទទួលបានលាភសក្ការៈពីផ្នែកផ្សេងៗ និងចាប់តោងភាពល្បីល្បាញ ។
ដោយមិនបានបង្ហាញឈ្មោះអ្នកសិល្បៈណាមួយឲ្យចំនោះ ផលិតករនៅក្នុងផលិតកម្មក្រុងពិជ័យ គឺលោក ចាន់ណា ចំណាន បានបង្ហោះសារមួយនៅលើបណ្តាញសង្គមថា «ឱ! អស់តារាសម្តែង ដែលទទួលបានលាភសក្ការៈហើយ គួរតែកុំពើងទ្រូង ក្រអឺត មុខមិនមើល ក្រោយមិនបែរ ដាក់ខ្ញុំដែលជាអ្នកបញ្ជូនឈ្មោះអ្នកទាំងអស់គ្នា ទាំងតួតូច តួធំ ទៅចូលរួមសម្តែងអី»។
លោកបញ្ជាក់ថា «ខ្ញុំមិនបានទៅសុំប្រាក់អ្នកទាំងអស់គ្នាឯណា ចាំបាច់អីប្រើក្រសែភ្នែកដូចខ្ញុំសំរាម «ស្អប់ចរិត Fake របស់តួសម្តែង» សូមនឹកដល់ពេលអ្នកសុំអោយខ្ញុំជួយផង សូមអរគុណ»។
ដោយឡែក ក្រោយពីបានឃើញអ្វីដែលលោក ចាន់ណា ចំណាន បានបង្ហោះខាងលើនេះហើយ ផលិតករនៅក្នុងផលិតកម្មហង្សមាស គឺលោក កៅ សីហា ក៏បានភ្ជាប់នឹងសារស្រដៀងគ្នានេះ បង្ហោះនៅលើបណ្តាញសង្គមរបស់ខ្លួនដែរថា «អូនអើយអូន មនុស្សក្នុងសង្គមសិល្បៈនេះមួយក្រវេចទេ ឲ្យគេពើងទ្រូងទៅ… យូរ ឆាប់ គង់តែបែកក្បាលមករកយើងវិញនៅពេលណាមិនខាន ព្រោះចរិតធុនយ៉ាងអស់នោះ មុជមិនជ្រៅទៅមិនឆ្ងាយទេ មិនថាស្រី ឬប្រុស។ ម្ល៉ោះហើយ 50/50ដូចបងទៅ មិនសូវឈឺ ព្រោះយើងអត់ចេះ fake ហើយយើងប៉ះរបស់ fake យើងឈឺណាស់ បងហែលរួចហើយ…»។
ជាមួយគ្នានេះដែរ ក្រោយពីឃើញការលើកឡើងពីផលិតករទាំងពីររូបនេះខាងលើនេះមក គេក៏ឃើញមានអ្នកចូលទៅធ្វើការខំមិន ដោយមានអ្នកខ្លះបានសរសេរចំៗថា «ចរិតតារាខ្មែរមួយចំនួនតូច គឺបែបនេះហើយបង ជាពិសេសអ្នកដែលទើបមានភាពល្បីល្បាញ យើងមិនអាចកែចរិត និងនិស្ស័យរបស់គេបានទេ សីលធម៌ សុជីវធម៌ របស់បុគ្គលមួយៗបញ្ជាក់ពីអត្តសញ្ញាណ ពូជពង្ស វង់ត្រកូល និងចំណេះដឹងរបស់បុគ្គលម្នាក់ៗ ដែលគេយកមកលំអប្រចាំកាយ»។
ជាការកត់សម្គាល់ ករណីខាងលើនេះ មិនមែនទើបតែបានកើតឡើងនាពេលនេះឡើយ ពោលគឺកន្លងមក ក៏មានអ្នកសិល្បៈមួយចំនួនធ្លាប់បានទទួលរងការរិះគន់យ៉ាងខ្លាំងពីសំណាក់មហាជន បន្ទាប់ពីពួកគេតែងតែបង្ហាញកាយវិការពើងទ្រូង ក្រោយពីពួកគេចាប់ផ្តើមល្បីនៅក្នុងពិភពសិល្បៈ៕
ចែករំលែកព័តមាននេះ