អ៊ីស្រាអែលបង្កើនជើងហោះហើរដឹកទ័ពបម្រុង ខណៈជើងហោះហើរបរទេសផ្អាក និងលុបចោល
អ៊ីស្រាអែល ៖ ក្រុមហ៊ុនអាកាសចរណ៍ធំៗ នៅជុំវិញពិភពលោក បានលុបចោលជើងហោះហើរទៅកាន់
អ៊ីស្រាអែល ៖ ក្រុមហ៊ុនអាកាសចរណ៍ធំៗ នៅជុំវិញពិភពលោក បានលុបចោលជើងហោះហើរទៅកាន់ប្រទេសអ៊ីស្រាអែល និងព្រមានពីការរំខានដល់ការធ្វើដំណើរនៅពេលស្ថានភាពសន្តិសុខកាន់តែយ៉ាប់យ៉ឺន ខណៈក្រុមហ៊ុនអាកាសចរណ៍អ៊ីស្រាអែល បានបង្កើនជើងហោះហើររបស់ខ្លួន ដើម្បីដឹកទ័ពបម្រុងរាប់ម៉ឺននាក់ សម្រាប់ការប្រយុទ្ធតទល់នឹងក្រុមសកម្មប្រយុទ្ធហាម៉ាសប៉ាឡេស្ទីន។
ក្រុមហ៊ុនរបស់ចក្រភពអង់គ្លេស Virgin Atlantic បានព្រមានអំពីការលុបចោល និងការពន្យារពេលទៅកាន់ទីក្រុង Tel Aviv ប្រទេសអ៊ីស្រាអែល ស្របពេលក្រុមហ៊ុន British Airways (BA) បានផ្លាស់ប្តូរកាលវិភាគរបស់ខ្លួន។ ទន្ទឹមនឹងនេះ ក្រុមហ៊ុនអាកាសចរណ៍អាមេរិកចំនួន ៣ រួមមាន United Airlines, Delta Air Lines និង American Airlines ក៏ដូចជាក្រុមហ៊ុន Air France របស់បារាំង, Lufthansa របស់អាល្លឺម៉ង់ និង Emirates របស់អារ៉ាប់រួម ក៏បានផ្អាកសេវាកម្មរបស់ខ្លួនផងដែរ។
ក្រុមសកម្មប្រយុទ្ធហាម៉ាសប៉ាឡេស្ទីន កាលពីថ្ងៃទី៩ ខែតុលា កន្លងទៅ បានប្រកាសថា ពួកគេបានកំណត់គោលដៅលើអាកាសយានដ្ឋាន Ben Gurion របស់អ៊ីស្រាអែល ដោយការបាញ់មីស៊ីល។
ការិយាល័យបរទេសកំពុងណែនាំប្រឆាំងនឹងការធ្វើដំណើរទាំងអស់ទៅកាន់ប្រទេសអ៊ីស្រាអែល និងដែនដីប៉ាឡេស្ទីនដែលកាន់កាប់ លើកលែងតែការធ្វើដំណើរសំខាន់ ហើយក៏បានប្រឆាំងនឹងការធ្វើដំណើរទាំងអស់ទៅកាន់ផ្នែកខ្លះនៃតំបន់ក្បែរនោះ។
គេហទំព័រត្រួតពិនិត្យជើងហោះហើរ FlightRadar24 បានបង្ហាញជើងហោះហើរមួយចំនួននៅតែបន្តចូល និងចេញដំណើរពីទីក្រុង Tel Aviv កាលពីថ្ងៃទី៩ ខែតុលា កន្លងទៅ រួមមានក្រុមហ៊ុន Ryanair របស់អៀរឡង់ និង Pegasus របស់តួកគីផងដែរ។ ប៉ុន្តែទោះជាយ៉ាងណាក៏ដោយ ក្រុមហ៊ុន Ryanair បានបញ្ជាក់ជាបន្តបន្ទាប់ថា ខ្លួនត្រូវបានបង្ខំឱ្យលុបចោលជើងហោះហើរមួយចំនួនទៅ និងមកពីទីក្រុង Tel Aviv កាលពីថ្ងៃទី៩ ខែតុលា ហើយបានណែនាំអ្នកដំណើរឱ្យពិនិត្យមើលការធ្វើបច្ចុប្បន្នភាពជើងហោះហើរចុងក្រោយបំផុត។
យ៉ាងណាមិញ ងាកមកក្រុមហ៊ុនអាកាសចរណ៍របស់អ៊ីស្រាអែល EL AL Israel AIRLINES ឯណេះវិញ កាលពីថ្ងៃទី៩ ខែតុលា កន្លងទៅ បានប្រកាសបន្ថែមជើងហោះហើរជាច្រើនថែមទៀត បន្ទាប់ពីរដ្ឋាភិបាលប្រទេសនេះ បានកោះហៅកងកម្លាំងបម្រុងចំនួន៣០ម៉ឺនាក់ ដែលមិនធ្លាប់មានពីមុនមក ហើយបានព្រមានអ្នកស្រុកនៅតំបន់ហ្គាហ្សាស្ទ្រីប (Gaza Strip) ឱ្យជម្លៀសខ្លួនចេញពីតំបន់នេះ ដែលជាសញ្ញាថា ខ្លួនរៀបចំផែនការវាយប្រហារលើតំបន់នេះទ្រង់ទ្រាយធំ ជាការឆ្លើយតប។
ក្រុមហ៊ុន El Al កំពុងបង្កើនជើងហោះហើរ ខណៈដែលក្រុមហ៊ុនអាកាសចរណ៍ធំៗភាគច្រើនលុបចោល ឬកាត់បន្ថយសេវាកម្មដល់អ៊ីស្រាអែល។ ទោះយ៉ាងណាក៏ដោយ ពាក់ព័ន្ធជុំវិញបញ្ហានេះ ក្រុមហ៊ុន El Al មិនបានបញ្ជាក់ថា តើជើងហោះហើរបន្ថែមប៉ុន្មានដែលខ្លួននឹងរត់ ឬមកពីណានោះទេ៕ (ប្រភពពី BBC និង Reuters)
ចែករំលែកព័តមាននេះ