តារាសម្តែង និងជាប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា បានចេញមុខស្នើដល់មហាជនមួយចំនួនឲ្យបញ្ឈប់ការរិះគន់ណាមួយមកលើកញ្ញាឯក ភឹម ស្រីនោ ក្នុងពេលដែលនាងកំពុងស្ថិតក្នុងការខិតខំប្រឹងប្រែងប្រកួតប្រជែងក្នុងកម្មវិធី
រាជធានីភ្នំពេញ ៖ តារាសម្តែង និងជាប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា បានចេញមុខស្នើដល់មហាជនមួយចំនួនឲ្យបញ្ឈប់ការរិះគន់ណាមួយមកលើកញ្ញាឯក ភឹម ស្រីនោ ក្នុងពេលដែលនាងកំពុងស្ថិតក្នុងការខិតខំប្រឹងប្រែងប្រកួតប្រជែងក្នុងកម្មវិធី «Miss Grand International 2023» ដែលធ្វើឡើងនៅប្រទេសវៀតណាម ។
តារាសម្តែងជើងចាស់ខាងលើនេះ បានលើកឡើងតាមរយៈសំណេរដែលបានបង្ហោះនៅលើបណ្តាញសង្គមថា «ក្នុងដំណាក់កាលនេះ មិនថាប្អូនស្រីធ្វើបានល្អ ឬមិនសូវបានល្អ ទោះក្នុងចំណុចណា ឬកាលៈទេសៈណា ក្នុងនាមយើងជាប្រជាជនខ្មែរ ត្រូវតែលើកទឹកចិត្តគាត់ ផ្តល់កម្លាំងចិត្តគាត់ ដើម្បីឱ្យគាត់មានថាមពលក្នុងការតស៊ូប្រឹងប្រែងក្នុងការលេងហ្គេមអន្តរជាតិនេះឱ្យបានទទួលភាពជោគជ័យ ឬកិត្តិយសដ៏អស្ចារ្យសម្រាប់ប្រទេសយើង»។
អ្នកនាងបញ្ជាក់ថា «សូមមេត្តាកុំរិះគន់គាត់ ទោះក្នុងន័យស្ថាបនាក៏ដោយ ក៏មិនមែនជាពេលនេះដែរ ព្រោះក្នុងស្ថានភាពបច្ចុប្បន្ន គឺគាត់មិនមានពេលមើលការខមមិនស្ថាបនារបស់យើងនោះទេ គឺជាពេលដែលគាត់ត្រូវផ្តោតអារម្មណ៍ប្រឹងប្រែងត្រងត្រាប់ មើលគ្រប់សកម្មភាពរបស់ការប្រកួតមួយនេះ»។
អ្នកនាងបន្តថា «ពួកយើងត្រូវជឿជាក់លើគាត់ ក្នុងសមរភូមិត្រជាក់មួយនេះ គាត់ដឹងច្បាស់ជាងយើងទៅទៀត ព្រោះគាត់ជាអ្នកឈរផ្ទាល់នៅចំណុចសមរភូមិមុខ ឯយើងវិញនៅចំណុចសមរភូមិក្រោយ បើយកគាត់មកដាក់ក្នុងខ្លួនយើង គឺគាត់ចង់ឈ្នះការប្រកួតនេះ ជាងយើងទៅទៀត។ ហើយកុំភ្លេចថា ការខមមិនទាំងឡាយ គឺសុទ្ធតែជាពិន្ទុសម្រាប់គាត់ ហើយចំពោះអ្នកដែលមិនមែនជាហ្វេនរបស់គាត់ សូមគិតថា ពេលនេះគឺយើងគាំទ្រគាត់ ដើម្បីកិត្តិយសប្រទេសយើង ស៊ូស៊ូប្អូនស្រី ពួកយើងជឿជាក់លើប្អូន បងជឿជាក់ថា ប្អូនពិតជាធ្វើបានល្អគ្រប់សកម្មភាព និងគ្រប់វិញ្ញាសារ»។
ជាការកត់សម្គាល់ កញ្ញាឯកអស្ចារ្យកម្ពុជា ស្រីស្អាត ភឹម ស្រីនោ បានចាកចេញពីប្រទេសកម្ពុជា កាលពីថ្ងៃទី៣ ខែតុលា ឆ្នាំ២០២៣ តាមព្រលានយន្តហោះអន្តរជាតិភ្នំពេញ ឆ្ពោះទៅកាន់ប្រទេសវៀតណាម ដើម្បីចូលរួមប្រកួតប្រជែងកម្មវិធី «Miss Grand International» ដែលមានបេក្ខនារីមកពីប្រទេសជាច្រើនជុំវិញពិភពលោក ។
ក្រោយគ្រងមកុដ «Miss Grand Cambodia 2023» កញ្ញា ភឹម ស្រីនោ បានប្តេជ្ញាត្រៀមខ្លួននឹងធ្វើរឿងមួយសម្រាប់ជាតិ ក្នុងពេលដែលនាងមានឱកាសបង្ហាញវត្តមាននៅលើឆាកអន្តរជាតិ ។ ហើយអ្វីដែលនាងនឹងធ្វើនោះ គឺការនាំប្រទេសកម្ពុជាដ៏ល្អមួយនេះ ទៅកាន់ឆាកអន្តរជាតិ ដើម្បីឲ្យបរទេសស្គាល់កាន់តែច្បាស់ ក្នុងនាមតំណាងប្រទេសចូលរួមប្រកួត «Miss Grand international 2023» ដែលធ្វើឡើងនៅប្រទេសវៀតណាម។
ស្រីស្អាត ភឹម ស្រីនោ បានលើឡើងតាមរយៈសំណេរដែលបានបង្ហោះលើបណ្តាញសង្គមថា «ជាដំបូង នាងខ្ញុំសូមអរគុណដល់អ្នកមានគុណរបស់ខ្ញុំទាំងពីរ ដែលបានចិញ្ចឹមបីបាច់ថែរក្សាកូន បង្រៀនកូនឲ្យក្លាយជាមនុស្សរឹងមាំ មានការតស៊ូតាំងពីតូចមក ទោះបីជាលោកទាំងពីរលំបាកយ៉ាងណា ក៏លោកទាំងពីរតែងតែប្រាប់ឲ្យកូនក្លាយជាមនុស្សល្អនៅក្នុងសង្គម។ នាងខ្ញុំក៏សូមអរគុណចំពោះក្តីស្រលាញ់របស់ប្រជាជនខ្មែរ និងអ្នកគាំទ្រដែលតែងតែផ្តល់កម្លាំងចិត្ត និងការចូលចិត្តមកលើរូបនាងខ្ញុំ សូមសន្យាថា នាងខ្ញុំនឹងខិតខំប្រឹងប្រែងឲ្យអស់ពីសមត្ថភាព ដើម្បីនាំប្រទេសកម្ពុជាដ៏ល្អមួយនេះ ទៅកាន់ឆាកអន្តរជាតិនៃ Miss Grand International 2023»៕
ចែករំលែកព័តមាននេះ