ថៃចាប់ផ្តើមស្ដារទំនុកចិត្តភ្ញៀវទេសចរ ក្រោយការបា.ញ់ប្រហារនៅផ្សារទំនើបក្រុងបាងកក
ថៃ ៖ រដ្ឋាភិបាលថៃ កាលពីថ្ងៃទី០៤ ខែតុលា កន្លងទៅ បានខិតខំប្រឹងប្រែងរួមគ្នា ដើម្បីស្តារទំនុក
ថៃ ៖ រដ្ឋាភិបាលថៃ កាលពីថ្ងៃទី០៤ ខែតុលា កន្លងទៅ បានខិតខំប្រឹងប្រែងរួមគ្នា ដើម្បីស្តារទំនុកចិត្តសាធារណៈនៅក្នុងវិស័យទេសចរណ៍ដ៏សំខាន់របស់ខ្លួន ពោល១ថ្ងៃ បន្ទាប់ពីក្មេងប្រុសជំទង់ម្នាក់ បានកាំភ្លើងបើកការបាញ់ប្រហារនៅឯមជ្ឈមណ្ឌលផ្សារទំនើប Siam Paragon កណ្តាលទីក្រុងបាងកក ដោយបានសម្លាប់ជនបរទេស២នាក់ និងរងរបួស៥នាក់ មុនពេលខ្មាន់កាំភ្លើងត្រូវបានចាប់ខ្លួន។ នេះបើយោងតាមប្រភពពី China Daily ចេញផ្សាយកាលពីថ្ងៃទី៥ ខែតុលា ឆ្នាំ២០២៣។
នាយករដ្ឋមន្ត្រីថៃ ស្រេតថា ថាវីស៊ីន (Srettha Thavisin) ដែលបានទៅសួរសុខទុក្ខអ្នករងរបួសនៅមន្ទីរពេទ្យ បន្ទាប់ពីការបាញ់ប្រហារកាលពីថ្ងៃទី៣ ខែតុលា កន្លងទៅ បានចូលរួមស្មឹងស្មាធិ៍មួយសន្ទុះ នៅឯផ្សារទំនើប Siam Paragon មុនពេលថ្លែងការរំលែកទុក្ខរបស់រដ្ឋាភិបាលដល់ក្រុមគ្រួសារសព ដែលជាភ្ញៀវទេសចរជនជាតិចិន និងមីយ៉ាន់ម៉ា។ លោកក៏បានសន្យាថា នឹងមានការស៊ើបអង្កេតយ៉ាងឆាប់រហ័សលើការបាញ់ប្រហារ ហើយវិធានការបង្ការប្រឆាំងនឹងអំពើហិ.ង្សាដោយកាំភ្លើង នឹងត្រូវបានអនុម័ត ដើម្បីធានាសុវត្ថិភាពសាធារណៈកាន់តែប្រសើរឡើង។
នៅក្នុងចំណោមអ្នករងរបួសទាំង៥នាក់នោះ មានម្នាក់ជាជនជាតិចិន ហើយយោងតាមក្រសួងការបរទេសថៃបានទាក់ទងទៅស្ថានទូត នៃប្រទេសនានាដែលពាក់ព័ន្ធ និងបានណែនាំឱ្យស្ថានទូតថៃនៅក្រៅប្រទេស ទាក់ទងក្រុមគ្រួសារជនរងគ្រោះ។ ស្របពេលស្ថានទូតចិននៅទីក្រុងបាងកក បានបញ្ជូនក្រុមមន្ត្រីកុងស៊ុលទៅកាន់ផ្សារទំនើប និងមន្ទីរពេទ្យ ដើម្បីពិនិត្យស្ថានភាពជាក់ស្តែង។
នៅក្នុងសន្និសីទសារព័ត៌មានមួយកាលពីពេលថ្មៗនេះ មន្ត្រីរដ្ឋាភិបាលកំពូលៗរបស់ប្រទេសថៃបានសម្តែងការរំលែកទុក្ខយ៉ាងក្រៀមក្រំបំផុត ចំពោះក្រុមគ្រួសារសព និងបានជូនពរអ្នករងរបួសបានជាសះស្បើយយ៉ាងឆាប់រហ័ស ដោយនៅក្នុងនោះរួមទាំងលោក Korn Dabbaransi ប្រធានសមាគមមិត្តភាពថៃ-ចិន ដែលបានបម្រើការជាឧបនាយករដ្ឋមន្ត្រីថៃផងដែរ។
យោងតាមអាជ្ញាធរថៃ មជ្ឈមណ្ឌលបញ្ជាស្ថានភាពមួយត្រូវបានបង្កើតឡើង ដើម្បីជួយសម្រួលដល់ការជួយដល់អ្នករបួស និងក្រុមគ្រួសារអ្នកស្លាប់។ មជ្ឈមណ្ឌលដែលបានចាប់ផ្តើមប្រតិបត្តិការចាប់ពីថ្ងៃទី៥ ខែតុលា កន្លងទៅ បានផ្តល់ព័ត៌មានថ្មីៗអំពីស្ថានភាព និងព័ត៌មានពីជនរងគ្រោះក្នុងលក្ខណៈទាន់ពេលវេលា ដោយមានការចូលរួមពីសំណាក់មន្ត្រីមកពីនាយកដ្ឋាន និងទីភ្នាក់ងាររដ្ឋាភិបាលមួយចំនួនរួមមាន ក្រសួងការបរទេស ទេសចរណ៍ និងកីឡា យុត្តិធម៌ សុខាភិបាល និងអភិវឌ្ឍន៍សង្គម និងសន្តិសុខមនុស្ស ប៉ូលិសភូមិន្ទថៃ និងអាជ្ញាធរទេសចរណ៍ថៃផងដែរ។
មន្ត្រីម្នាក់បានថ្លែងថា វិធានការនានា រួមទាំងការបង្កើនសន្តិសុខតាមទីសាធារណៈត្រូវធ្វើឡើង ដើម្បីទប់ស្កាត់ឧប្បត្តិហេតុបែបនេះ មិនឱ្យកើតឡើងទៀត នាពេលអនាគត ដោយបានគូសបញ្ជាក់ថា វិធីសាស្ត្រសមស្របមួយ ដើម្បីរក្សាលំនឹងសុខភាពផ្លូវចិត្តសាធារណៈ ក៏ចាំបាច់ផងដែរ។
ប្រព័ន្ធផ្សព្វផ្សាយថៃ បានរាយការណ៍ថា ខ្មាន់កាំភ្លើងអាយុ១៤ឆ្នាំ ដែលបច្ចុប្បន្នកំពុងស្ថិតក្នុងការឃុំឃាំងរបស់ប៉ូលស គឺជាអ្នកមានជំងឺផ្លូវចិត្ត នៅមន្ទីរពេទ្យ Rajavithi ហើយមិនបានលេបថ្នាំតាមការណែនាំនោះទេ ខណៈដែលប៉ូលិសថៃបានឱ្យដឹងថា ក្មេងប្រុសរូបនោះ បានប្រើកាំភ្លើងខ្លី១ដើម ដែលកែប្រែដើម្បីបាញ់គ្រាប់ពិតបាន។
ជាមួយគ្នានោះផងដែរ លោក Samran Nualma ជំនួយការអគ្គស្នងការនគរបាលភូមិន្ទថៃ មានថ្លែងថា ការបណ្តុះបណ្តាលសន្តិសុខឆ្មាំ និងបុគ្គលិកពាក់ព័ន្ធនៅតាមទីសាធារណៈត្រូវបានពង្រឹង ខណៈដែលសិស្សសាលានឹងផ្តល់មេរៀនក្នុងពេលឆាប់ៗនេះ អំពីរបៀបរក្សាសុវត្ថិភាពក្នុងស្ថានភាពអាសន្ន។ លោកបានបន្តថា «យើងក៏កំពុងពិនិត្យមើលច្បាប់ និងបទប្បញ្ញត្តិទាក់ទងនឹងការគ្រប់គ្រងកាំភ្លើង និងបទប្បញ្ញត្តិស្តីពីវត្ថុអាចកែច្នៃ និងប្រើប្រាស់ជាអាវុធប្រល័យលោក»។
ថៃមានការបារម្ភថា ការបាញ់ប្រហារនៅផ្សារទំនើប Siam Paragon អាចជះឥទ្ធិពលដល់វិស័យទេសចរណ៍របស់ខ្លួន ខណៈកាលពីមុនផ្ទុះជំងឺរាតត្បាតកូវីដ-១៩ ប្រទេសចិន គឺជាប្រភពដ៏ធំបំផុតនៃភ្ញៀវទេសចរបរទេសរបស់ប្រទេសថៃ ហើយកាលពីខែមុន រដ្ឋបាលលោក ស្រេតថា បានណែនាំការចូលដោយគ្មានទិដ្ឋាការ សម្រាប់ជនជាតិចិន ដើម្បីជួយសម្រួលដល់ការធ្វើដំណើរ។ ជើងហោះហើរជាច្រើនពីចិនមកកាន់ថៃ បានរាយការណ៍ពីការកក់ជាង ៩០% បន្ទាប់ពីការលើកលែងទិដ្ឋាការរយៈពេល៥ខែ បានចូលជាធរមាន កាលពីថ្ងៃទី២៥ ខែកញ្ញា កន្លងទៅ។
លោក Sudawan Wangsuppakitkosol រដ្ឋមន្ត្រីក្រសួងទេសចរណ៍ថៃ កាលពីថ្មីៗនេះ បានបញ្ជាក់ថា «សុវត្ថិភាពតែងតែជាកង្វល់ចម្បងរបស់យើង ហើយយើងយកចិត្តទុកដាក់ចំពោះមុខមាត់ប្រទេស និងទំនុកចិត្តប្រជាជនយើង។ យើងកំពុងធ្វើការយ៉ាងជិតស្និទ្ធជាមួយអាជ្ញាធរទេសចរណ៍ថៃ ដើម្បីផ្តល់ជំនួយសម្រាប់ភ្ញៀវទេសចរដែលរងផលប៉ះពាល់នានា និងវិធានការសង្គ្រោះ»។
ជុំវិញបញ្ហានេះ លោកស្រី Thapanee Kiatphaibool អភិបាលអាជ្ញាធរទេសចរណ៍ថៃ (TAT) កំពុងពិនិត្យទិន្នន័យ រួមទាំងចំនួនទេសចរចិន និងការកក់សណ្ឋាគារ ដើម្បីវាយតម្លៃថា តើឧបទ្ទវហេតុនេះ អាចជះឥទ្ធិពលទៅលើទីផ្សារទេសចរណ៍យ៉ាងដូចម្តេច? ហើយជាមួយវិស័យឯកជន នឹងត្រូវពង្រឹងលើការបង្កើនវិធានការសន្តិសុខ៕
ចែករំលែកព័តមាននេះ