ADផ្ទាំងផ្សព្វផ្សាយពាណិជ្ជកម្ម

នាយករដ្ឋមន្ត្រីវៀតណាមបញ្ជាឱ្យស៊ើបអង្កេតទៅលើសំណុំរឿងឆេះ.អ.គារស្លា.ប់ម.នុ.ស្ស៥៦នាក់

1 ឆ្នាំ មុន

១៤ ខែ កញ្ញា ឆ្នាំ ២០២៣ ម៉ោង ០៤:២៣

នាយករដ្ឋមន្ត្រីវៀតណាម លោកផាំមិញជិញ បានបញ្ជាឱ្យស៊ើបអង្កេតយ៉ាងដុតដៃដុតជើងចំពោះហេតុការណ៍ឆេះអគារនៅទីក្រុងហាណូយ កាលពីយប់ថ្ងៃអង្គារដែលនាំទៅដល់ការស្លាប់មនុស្សយ៉ាងតិច៥៦នាក់។ ក្រៅពីនេះ មនុស្សរាប់សិបនាក់ទៀតរងរបួស។ លោកបានចុះទៅពិនិត្យមើលកន្លែងកើតហេតុដោយផ្ទាល់ភ្នែក និងសូមថ្លែងអំណរគុណចំពោះទឹកចិត្តជ្រះថ្លារបស់អ្នកពន្លត់អគ្គិភ័យដែលបំពេញការងារយ៉ាងសស្រាក់សស្រាំ និងជួយសង្គ្រោះអ្នកដែលនៅរស់រានមានជីវិត។

ឆ្លងកាត់បទពិសោធលើកនេះ, លោកផាំមិញជិញបញ្ជាឱ្យអាជ្ញាធរត្រួតពិនិត្យអគារទាំងអស់នៅទីក្រុងហាណូយដើម្បីទប់ស្កាត់មិនឱ្យសោកនាដកម្មនេះកើតឡើងសាជាថ្មី។ នៅវៀតណាម ដោយសារដីមានតម្លៃថ្លៃខ្លាំងពេក ម៉្លោះហើយ គេច្រើនទិញដីដែលមានទំហំតូច ហើយសាងសង់អគារច្រើនជាន់។ លោកផាំមិញជិញយល់ថាអគារនេះមានរូបរាងតូច ប៉ុន្តែសាងសង់ខ្ពស់សន្លឹម។ ដូច្នេះ វាមិនមានច្រកឡើងចុះគ្រប់គ្រាន់ទេ។ នៅពេលមានអាសន្នកើតឡើង, អ្នកនៅក្នុងអគារពិបាកនឹងជម្លៀសខ្លួន។

លោកយល់ថាវាជារឿងដែលមិនសមនឹងកើតមានទាល់តែសោះករណីដែលអគារមួយកម្ពស់រហូតដល់ដប់ជាន់ មាន៤៥បន្ទប់ បែរជាគ្មានច្រកសម្រាប់រត់គេចខ្លួននៅក្នុងគ្រាអាសន្ន។ លោកយល់ថាអាជ្ញាធរមិនត្រូវអនុញ្ញាតឱ្យសាងសង់អគារបែបនេះតទៅទៀតទេ។ ក្រោយពេលចាកចេញពីទីនោះ លោកបានបន្តដំណើរទៅសួរសុខទុក្ខអ្នករងរបួសនៅមន្ទីរពេទ្យ។

នៅក្នុងកំណត់ហេតុ១ផ្ញើជូនក្រសួងសន្តិសុខជាតិ និងស្ថាប័នថ្នាក់ក្រោមជាតិ លោកផាំមិញជិញបញ្ជាក់ថាអគ្គិភ័យលើកនេះពិតជាបានបង្កផលវិបាកយ៉ាងធ្ងន់ធ្ងរ។ អំណឹះតទៅ, អាជ្ញាធរទីក្រុងហាណូយត្រូវធ្វើការឱ្យបានជិតស្និទ្ធជាមួយក្រសួងសន្តិសុខជាតិដើម្បី ទី១- កាត់បន្ថយជាអតិបរមានូវផលវិបាកនៃឧបទ្ទវហេតុ, ទី២- កំណត់មុខសញ្ញាដែលអាចបង្កជាហានិភ័យផ្សេងៗ និងទី៣- កំណត់ឱ្យបានច្បាស់អំពីភារកិច្ច និងតួនាទីរបស់មន្ត្រី ឬស្ថាប័នណាខ្លះត្រូវទទួលរ៉ាប់រងផ្នែកអ្វីខ្លះ។

សាក្សីនិយាយថាអគ្គិភ័យចាប់ផ្ដើមឆាបឆេះចេញពីកន្លែងចតឡាន និងម៉ូតូនៅជាន់ផ្ទាល់ដីនៅវេលាម៉ោង១១:៥០យប់។ អគារនេះសាងសង់នៅលើផ្ទៃដី២រយម៉ែត្រការ៉េ និងមានមនុស្សរស់នៅប្រហែល១៥០នាក់។ អ្នករស់នៅម្ដុំនោះប្រាប់ថាភ្លើងឆាបឆេះយ៉ាងសន្ធោសន្ធៅហ៊ុមព័ទ្ធអគារនេះទាំងមូល និងបញ្ចេញផ្សែងហុយទ្រលោមទៅលើមេឃ។

នៅពេលនោះ អ្នកខ្លះខំដង្ហោយហៅអ្នកដទៃដើម្បីស្នើសុំជំនួយ។ អ្នកខ្លះដាច់ចិត្តគប់គ្រវែងកូនង៉ែតខ្លួនឯងចេញពីក្នុងអគារក្រែងលោអាចមានជីវិតរស់នៅ ព្រោះបើបន្តនៅក្នុងអគារគឺមានតែផ្លូវស្លាប់១មុខគត់។ អាជ្ញាធរបានប្រើប្រាស់ឡានទឹក១៥គ្រឿងទម្រាំអាចពន្លត់ភ្លើងនេះបាន។ នៅម្ដុំនោះពោរពេញដោយភាពចង្អៀតណែនណាន់តាន់តាប់ខ្លាំងមែនទែន និងមានច្រកឌឿងហែមតូចៗ ដែលជាហេតុធ្វើឱ្យអ្នកពន្លត់អគ្គិភ័យពិបាកបំពេញការងារ និងជួយសង្គ្រោះឱ្យបានទាន់ពេលវេលា។

យោងតាមកាសែតវៀតណាមអ៊ិចប្រែស (Vietnam Express), នៅក្នុងចំណោមសាកសពដែលគេរកឃើញទាំង៥៦នាក់នោះ, គេអាចកំណត់អត្តសញ្ញាណចំនួន៣៩នាក់។ រដ្ឋាភិបាលសន្យាផ្ដល់ប្រាក់៣៧លានដុង ឬស្មើនឹងជាង១ពាន់៥រយដុល្លារសម្រាប់ក្រុមគ្រួសារជនរងគ្រោះដែលស្លាប់ម្នាក់ៗយកទៅចាត់ចែងធ្វើបុណ្យតាមប្រពៃណី។ ចំណែកអ្នករងរបួសទទួលបាន១២លាន ៤សែនដុង ឬស្មើនឹងជាង៥រយដុល្លារ។ ចំពោះសិស្ស-និស្សិត ឬអ្នកធ្វើការដែលមកពីតាមបណ្ដាខេត្តដើម្បីជួលអគារនេះស្នាក់នៅ, រដ្ឋផ្ដល់ប្រាក់ឧបត្ថម្ភម្នាក់ៗ១លាន ៥សែនដុង ឬស្មើនឹង៦២ដុល្លារក្នុង១ខែៗរយៈពេល៦ខែ៕

ប្រភព៖ កាសែតទួយទ្រី និងវៀតណាមអ៊ិចប្រែស
https://tuoitrenews.vn/news/society/20230913/pm-requires-investigation-into-deadly-apartment-block-fire-in-hanoi/75552.html
https://e.vnexpress.net/news/news/hanoi-apartment-fire-kills-56-4652943.html