មេសហជីព អំពាវនាវឲ្យកម្មករ ត្រៀមខ្លួន ចូលរៀនជំនាញ ដើម្បីទទួលបានប្រាក់​កម្រៃខ្ពស់

រាជធានីភ្នំពេញ៖ ក្នុងគោលបំណង ដើម្បីពង្រឹងសមត្ថភាពកម្មករនិយោជិត តាមរយៈកម្មវិធី​បណ្តុះបណ្តាលរបស់រដ្ឋាភិបាល ក្រុមសហជីពអំពាវនាវឲ្យកម្មកររៀន​ជំនាញបន្ថែម ដើម្បីជាទុនក្នុងការចាប់យកឱកាសការងារទទួលបានប្រាក់កម្រៃខ្ពស់ ក្នុងបរិបទទីផ្សារកាងារថ្មីៗ នាពេលបច្ចុប្បន្ន នៅក្នុងប្រទេសកម្ពុជា។

ការអំពាវនេះ ស្របនឹងរាជរដ្ឋាភិបាលកម្ពុជា ក្នុងអាណត្តិទី៧នេះ ដែលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រី្ត ផ្តល់អនុសាសន៍ដល់ក្រសួងការងារ និងបណ្តុះបណ្តាលវិជ្ជាជីវៈ ដើម្បីរៀបចំកម្មវិធីបណ្តុះបណ្តាលជំនាញបច្ចេកទេសវិជ្ជាជីវៈ ដល់យុវជន មកពីគ្រួសារក្រីក្រ និងគ្រួសារងាយរងហានិភ័យ នៅទូទាំងប្រទេស ចំនួនប្រមាណ ១,៥លាននាក់ និងសម្របសម្រួល​ជាមួយភាគី​ពាក់ព័ន្ធអនុញ្ញាតឱ្យបងប្អូនកម្មករនិយោជិត អាចចូលរៀនជំនាញវិជ្ជាជីវៈផងដែរ ដើម្បីបង្កើនផលិតភាព ប្រសិទ្ធភាពការងារនៅកន្លែងការងារ ដោយត្រូវរៀបចំវគ្គបណ្តុះបណ្តាល នៅវេនពេលយប់ ឬចុងសប្តាហ៍។

លោក ឈិន សូនី ប្រធានសហព័ន្ធសហជីពការងារសេវាកម្មកម្ពុជា បានលើកឡើងថា វាជាឱកាសល្អនេះ ដែលរាជរដ្ឋាភិបាល បានបង្កើតគោលនយោបាយបណ្តុះបណ្តាលបណ្តាល​នេះ។

លោកបានបញ្ជាក់ថា ៖ « យើងខ្ញុំដែលជាសហជីព នៅស្និទ្ធជាមួយបងប្អូនកម្មករ នឹងចូលរួម​ជាមួយសាលា និងក្រសួងការងារ គឺសហការ ទី១ យើងផ្សព្វផ្សាយពីផល​ប្រយោជន៍ពី​ការរៀនជំនាញ និងពន្យល់ពីផលចំណេញពីការរៀន និងឲ្យគាត់ចូលរួម ដើម្បីឲ្យទៅថ្ងៃអនាគត​ទៅប្រទេសកម្ពុជាមានកម្មករជំនាញ »។

ចំណែកលោកស្រី សៀ គន្ធា ប្រធានសហជីពការងារស្រ្តីកម្ពុជា បានឲ្យដឹងផងដែរថា កម្មករត្រូវ​យល់អ្វីដែលជារឿងថ្មី សម្រាប់ចំណេះដឹង បច្ចេកទេសវិជ្ជាជីវៈផ្សេងៗ គួរតែចាប់ឱកាស។

លោកស្រីថា ៖ « ព្រោះយើងអាចទទួលនូវភាពជោគជ័យ ទាល់តែយើងចេះចាប់ឱកាស សាលា និងគ្រូ មានហើយចឹងមានតែបងប្អូនត្រូវចេះផ្លាស់ប្តូរគំនិត និងព្យាយាម ស្វែងរកចំណេះដឹងថ្មីៗ ដើម្បីអភិវឌ្ឍន៍មុខរបររបស់យើង ឲ្យបានរីកចំរើន ដើម្បីចូលរួមអភិវឌ្ឍន៍សង្គមជាតិ»។

លោកស្រី បានបន្ថែមថា នៅពេលកម្មករ មានជំនាញវិជ្ជាជីៈច្បាស់លាស់ ពួកគេនឹងអាចនូវទទួល​បានចំណូលល្អប្រសើរ សម្រាប់ការផ្គត់ផ្គង់ជីវភាពគ្រួសារ ព្រោះការមានជំនាញច្បាស់លាស់នេះ គឺជាទន់មួយ នៅពេលពួកគេជួបហានិភ័យ ក៏គាត់មានចំណេះជំនាញ អាចរកចំណូលផ្គត់ផ្គង់​បានផងដែរ។

ជាមួយគ្នានោះដែរ លោក អ៊ុន ដារ៉ា ប្រធានសហភាពសហជីពកម្ពុជា ពន្លឺកម្មករ មានប្រសាសន៍ថា គោលនយោបាយរបស់រាជរដ្ឋាភិបាល ដែលរៀបចំជួយផ្សព្វផ្សាយដល់បងប្អូនកម្មករ ដើម្បីឲ្យ​ពួកគេ មានចំណាប់អារម្មណ៍ ហើយចូលរៀនឲ្យបានគ្រប់ៗគ្នា ដើម្បីយកចំណេះដឹង​បម្រើដល់សង្គមជាតិ។

លោកមានប្រសាសន៍បន្ថែមថា ការបណ្តុះបណ្តាលផ្នែកវិជ្ជាជីវៈនេះ នឹងធ្វើឱ្យកម្មករមាន​ចំណេះការងារ​ពិតប្រាកដសម្រាប់ការបើកអាជីវកម្មថែមទៀតផង ប្រសិនបើសិក្សាលើ​ជំនាញមួយចំនួន ដូចជាជួសជុល ម៉ូតូ ឡាន ឬជំនាញផ្សេងៗទៀត ដែលអាចរកចំណូលបានខ្លួនឯង។

លោកមានប្រសាសន៍បន្ថែមថា ​« សព្វថ្ងៃបើនិយាយពីវិស័យកាត់ដេរ ខ្ញុំមើលឃើញថា ភាគច្រើនអ្នកគ្រប់គ្រងជាជនបរទេស ប្រាក់ខែច្រើន គុណនឹងមួយ គុណនឹងពីរ គុណនឹងបី តែប្រសិនបើជាយើងចេះជំនាញច្បាស់លាស់យើងនឹងប្រាក់ចំណូលខ្ពស់ដូចពួកគេ»។

សូមបញ្ជាក់ថា កម្មវិធីបណ្តុះបណ្តាលបច្ចេកទេសលើយុវជនប្រមាណ ១,៥លាននាក់ ដែលរួមមានទាំងកម្មករកាត់ដេរនេះ គឺជាចំណុចមួយ ក្នុងចំណោមអនុសាសន៍ចំនួន ៦ចំណុច ដែលសម្តេចប្រមុខរាជរដ្ឋាភិបាល បានដាក់ចេញ ដើម្បីធ្វើឱ្យប្រសើរឡើងនូវវិស័យកាត់ដេរ ជាពិសេសភាពប្រសើរឡើងនៃលក្ខខណ្ឌការងាររបស់កម្មករ និងការបង្កើនលទ្ធភាពការងារ​ក្នុងគោលដៅធ្វើឱ្យប្រសើរឡើងជាលំដាប់នូវជីវភាពរបស់ប្រជាពលរដ្ឋ ដែលមកពីគ្រួសារងាយរងគ្រោះ ដែលក្នុងនោះ មានកម្មករផងដែរ៕ អ៊ាង ប៊ុនរិទ្ធ