នាយពាក់មី ប្រកាសបញ្ចប់រឿង ក្រោយទទួលសំណងពីម្ចាស់ហាងកែសម្ជស្ស «S88 Beauty»
- ភ្នំពេញ
នៅទីបំផុត តារាកំប្លែងនាយ ពាក់ មី បានសម្រេចបញ្ចប់រឿងរ៉ាវ និងដកពាក្យបណ្តឹងវិញហើយ បន្ទាប់ពីលោកនិងភរិយាបានទទួលសំណងពីម្ចាស់ហាង
រាជធានីភ្នំពេញ ៖ នៅទីបំផុត តារាកំប្លែងនាយ ពាក់ មី បានសម្រេចបញ្ចប់រឿងរ៉ាវ និងដកពាក្យបណ្តឹងវិញហើយ បន្ទាប់ពីលោកនិងភរិយាបានទទួលសំណងពីម្ចាស់ហាង «S88 Beauty»។
យ៉ាងណា នាយ ពាក់ មី មិនបានទម្លាយចំនួនទឹកលុយសំណងពីម្ចាស់ហាងកែសម្ផស្សខាងលើនេះឡើយ ខណៈពេលលោកបានស្នើអោយភាគីពាក់ព័ន្ធ និងទស្សនិកជនរក្សាភាពស្ងៀមស្ងាត់ ព្រោះរឿងនេះបានបញ្ចប់ហើយ។
តារាកំប្លែងនាយ ពាក់ មី បានបញ្ជាក់តាមរយៈសំណេរដែលបានបង្ហោះលើបណ្តាញសង្គមថា «ខ្ញុំនឹងប្រពន្ធបានទទួលសំណងពីម្ចាស់ S88Beauty តាមពាក្យបណ្តឹងរបស់ខ្ញុំហើយ អរគុណបងប្អូនទាំងអស់គ្នាដែលបារម្ភ និងជូនពរប្រពន្ធខ្ញុំ»។
ដោយឡែកបន្ថែមពីការទទួលសំណងខាងលើនេះ នាយ ពាក់ មី ក៏បានបញ្ជាក់ពីស្ថានភាពភរិយាលោកនាពេលនេះដែរថា «ភរិយាលោកបានធូរច្រើនហើយ ហើយប្រហែល២ឬ៣ថ្ងៃទៀត ទើបបានចេញពីពេទ្យ»។
គួរបញ្ជាក់ថា ភរិយារបស់តារាកំប្លែង នាយ ពាក់មី បានទៅទទួលសេវាម៉ាស្សាមុខ និងព្យួរសេរ៉ូមសាច់ស្អាតនៅមជ្ឃមណ្ឌលកែសម្ផស្ស S88 Beauty សាខាផ្សារធំថ្មី កាលពីរសៀលថ្ងៃទី២ ខែសីហា ឆ្នាំ២០២៣កន្លងទៅ ក្រោយមកក៏ស្រាប់តែមានអាការៈវិលមុខ ថប់ទ្រូង និងរាគ ក្រោយពីព្យួរសេរ៉ូមរួច។ ពេលមានអាការៈបែបនេះ ក្រុមគ្រួសារក៏បានបញ្ជូនទៅសង្គ្រោះនៅមន្ទីរពេទ្យភ្លាមៗផងដែរ។
ក្រោយហេតុការណ៍នេះបានកើតឡើង នាយ ពាក់ មី បានដាក់ពាក្យបណ្តឹងដោយទាមទារឱ្យម្ចាស់ហាងកែសម្ផស្សខាងលើ ចេញមុខដោះស្រាយ បន្ទាប់ពីលោកបានព្យាយាមទាក់ទងទៅម្ចាស់ហាងផ្ទាល់មិនមានលទ្ធផល។ យ៉ាងណា ភ្លាមៗនោះ សមត្ថកិច្ចក៏បានចុះត្រួតពិនិត្យ និងសម្រេចបិទទីតាំងជាបណ្តោះអាសន្ននូវហាងកែសម្ផស្សហីហោ «S88 Beauty» សាខាផ្សារធំថ្មីនោះផងដែរ។
ជាមួយគ្នានេះផងដែរ ក្រោយហេតុការណ៍នេះ ក្រសួងសុខាភិបាល ក៏បានចេញសេចក្តីសម្រេចបិទ និងដកហូតសេចក្តីសម្រេចឱ្យបើកមជ្ឈមណ្ឌលថែរក្សាសម្ផស្ស «S88 Beauty» និងសាខាទាំងអស់ ចាប់ពីថ្ងៃទី៤ ខែសីហា ឆ្នាំ២០២៣ បន្ទាប់ពីរកឃើញថា ម្ចាស់មជ្ឈមណ្ឌលថែរក្សាសម្ផស្សនេះ បានបើកសាខាជាច្រើនកន្លែង ដោយគ្មានច្បាប់អនុញ្ញាតពីក្រសួងសុខាភិបាល និងបង្កគ្រោះថ្នាក់យ៉ាងធ្ងន់ធ្ងរដល់ជនរងគ្រោះ។
គួររំលឹកថា ៖ ប្រពន្ធនាយពាក់មីចូលមជ្ឈមណ្ឌលកែសម្ជស្ស ត្រូវបញ្ជូនទៅសង្គ្រោះបន្ទាន់ភ្លាមៗនៅមន្ទីរពេទ្យ ។ គួររំលឹកបន្តថា ៖ មុននេះ នាយពាក់មីថា ស្គាល់មុខម្ចាស់ហាងហើយ កុំគេចវេស មកដោះស្រាយជាមួយសមត្ថកិច្ចភ្លាម!! ។ គួររំលឹកទៀតថា ៖ ពេលនេះ ប្រពន្ធរបស់តារាកំប្លែងនាយពាក់មី ចេញពីបន្ទប់សង្គ្រោះបន្ទាន់ ICU ហើយ ៕
ចែករំលែកព័តមាននេះ