ខេត្តរតនគិរី៖ កម្មករធ្វើចម្ការឱ្យក្រុមហ៊ុនថា មានអ្នកស្លាប់ជាបន្តបន្ទាប់គ្នានៅពេលបញ្ជូនមកព្យាបាលនៅមណ្ឌលសុខភាពស្រុកកូនមុំ ដែលសង្ស័យពុលស្រានិងចំណីអាហារដែលលក់នៅក្នុងក្រុមហ៊ុននោះ។ បើតាមប្រភពពីកងរាជអាវុធហត្ថស្រុកកូនមុំថា កម្មករដែលមានអាការៈធ្ងន់ធ្ងររហូតដល់ស្លាប់នោះ គឺកើតចាប់តាំងពីថ្ងែទី១៦ មិថុនា រហូតដល់ថ្ងៃទី២៧ មិថុនា ២០២៣ សរុបមានមនុស្សស្លាប់ចំនួន៦នាក់ហើយ។
ប្រភពបន្តថា មនុស្សដែលស្លាប់នោះ គឺជាកម្មករមកពីក្រុមហ៊ុនថាកូ ស្ថិតនៅក្នុងឃុំស្រែអង្គ្រង ស្រុកកូនមុំ ខេត្តរតនគិរី សរុបមានចំនួន០៦នាក់ហើយ ។ ទី១-ឈ្មោះសុខ មេសា ភេទប្រុស អាយុ៦០ឆ្នាំ ស្លាប់ថ្ងៃទី១៦ មិថុនា នៅមណ្ឌលសុខភាព ។ ទី២-ឈ្មោះផល់ ផាន់ណា ភេទប្រុស អាយុ២៨ឆ្នាំ ស្លាប់ថ្ងៃទី១៨ មិថុនា នៅមណ្ឌលសុខភាព ។ ទី៣-ឈ្មោះចាន់ ស៊ីនីត ភេទប្រុស អាយុ២៤ឆ្នាំ ស្លាប់ថ្ងៃទី១៩មិថុនា នៅមន្ទីរពេទ្យខេត្ត ។ ទី៤-ឈ្មោះគា ណាត ភេទប្រុស អាយុ៣២ឆ្នាំ ស្លាប់ថ្ងៃទី២២ តាមផ្លូវពេលបញ្ជូនចេញពីមណ្ឌលសុខភាព ។ ទី៥-ឈ្មោះថុង ផល់ ភេទប្រុស អាយុ៤០ឆ្នាំ ស្លាប់ថ្ងៃទី២៦ មិថុនា នៅមណ្ឌលសុខភាព និងទី៦-ឈ្មោះតា ថា ភេទប្រុសអាយុ៦០ឆ្នាំ ស្លាប់ថ្ងៃទី២៦ មិថុនា នៅក្នុងការដ្ឋានក្រុនហ៊ុនថាកូ ។
បើតាមការសាកសួរព័ត៌មានពីមន្ត្រីមណ្ឌលសុខភាពថា អ្នកជំងឺដែលមកទទួលសេវាទាំងនោះគឺមានសភាពធ្ងន់ធ្ងរដូចជាសន្លប់ ប្រកាច់ សញ្ញាជីវិតខ្សោយ ជួនកាលស្ទើរគ្មានសញ្ញាជីវិត ។ តាមការសាកសួរប្រវត្តិអ្នកជំងឺមានរោគសញ្ញាចុកពោះ ក្អួត ហត់ អស់កំលាំង ស្រវាំងភ្នែក ភាគច្រើនពួកគាត់បានទទួលទានស្រាជាប្រចាំ ហើយគឺគ្មានប្រវត្តិជំងឺប្រចាំកាយទេ ជាទូទៅមុនពេលចេញរោគសញ្ញាអ្នកជំងឺមានសុខភាពធម្មតា ក្រោយចេញរោគសញ្ញាចន្លោះពី៤ ទៅ៦ម៉ោង បានបណ្តាលឲ្យអ្នកជំងឺស្លាប់តែម្តង ។ តាមការសន្និដ្ឋានបឋមអាចបណ្តាលមកពីការពុលចំណីអា
ហារ ឬពុលសារធាតុគីមី។
លោកសេក ហៃ អភិបាលស្រុកកូនមុំបានឲ្យតាមទូរស័ព្ទថា កម្មករទាំងនោះដែលស្លាប់អាចបណ្តាលមកពីពុលថ្នាំបាញ់ស្មៅ មុនពេលកើតហេតុអ្នកទាំងនោះបាញ់ថ្នាំស្មៅរួចរាល់ ពីការងារពួកគេសំរាក់នាំគ្នាផឹកស្រាដែលស្ថិតក្នុងអាការៈអស់កំលាំងផង ហេវហត់ និងមានសារធាតុពល់ចំហាយថ្នាំបាញ់ស្មៅនោះនៅក្នុងខ្លួនផង ទើបបណ្តាលឲ្យមានអាការៈធ្ងន់ធ្ងររហូតដល់ស្លាប់បែបនេះ ហើយលោកក៏បានចាត់កំលាំងជំនាញចុះពិនិត្យនិងកំពុងស្រាវជ្រាវឲ្យបានច្បាស់ដឹងអំពីមូលហេតុច្បាស់ ។
ប្រជាពលរដ្ឋនៅទីនោះថា អាចពុលស្រារដប និងចំណីអាហារដែលមានស្តង់លក់នៅក្នុងក្រុមហ៊ុនោះមិនមានស្តង់ដាត្រឹមត្រូវហួសសុពលភាព ហើយក៏បានសំណូមពដល់អាជ្ញាធរ ឬមន្ត្រីជំនាញ មេត្តាចុះពិនិត្យទំនិញក្នុងស្តង់នោះផងភាគច្រើននាំចូលពីប្រទេសវៀតណាមមិនមានការពិនិត្យច្បាស់លាស់ ។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ