ថៃ ៖ អ្នកស្រុកក្នុងខេត្តកញ្ចនបុរី (Kanchanaburi) ភាគខាងលិច ប្រទេសថៃ បានធ្វើពិធីដ៏ពិសេសមួយជាមួយនឹងរូបចម្លាក់លិ.ង្គ រចនាចេញដើមឈើដ៏ធំសម្បើម ដើម្បីអង្វរសុំទឹកភ្លៀងពីទេវតា ដោយពិធីដ៏សំខាន់នេះ ត្រូវបានដង្ហែជុំវិញសហគមន៍ដែលខ្លួនរស់នៅ។
ចម្លាក់រូបលិ.ង្គពីឈើប្រណិតទម្ងន់ ៦០០គីឡូក្រាម ត្រូវបានស្គាល់ថា «ប៉ាឡាត់ឃីក» (Palad Khik) ជាភាសាថៃ ដែលមានតួនាទីជាគ្រឿងអលង្កាដ៏ពិសិដ្ឋ ដែលប្រជាជនថៃជាច្រើនជាវរូបតូចៗយកដាក់តាមខ្លួន បួងសួងសុំការការពារពីវិញ្ញាណអាក្រក់ និងខ្មោចព្រាយបិសាច។ លើសពីនេះទៅទៀត គេជឿថា ចម្លាក់នេះ នាំមកនូវសេចក្តីមេត្តាករុណា និងប្រជាប្រិយភាព ដល់បុគ្គលដែលបានកាន់វា។
«ប៉ាឡាត់ឃីក» ជាធម្មតាធ្វើពីឈើ ហើយមានរូបរាងតូចច្រឡឹង ដូច្នេះអ្នកមានជំនឿអាចយកតាមខ្លួនបានយ៉ាងងាយស្រួល។ ទោះជាយ៉ាងណាក៏ដោយ «ប៉ាឡាតឃីក»ដែលធ្វើដោយអ្នកស្រុកនៅក្នុងស្រុកសៃយុគ (Sai Yok) ខេត្តកញ្ចនបុរី គឺមានទម្ងន់រហូតដល់ ៦០០គីឡូក្រាមឯណោះ។
អ្នកស្រុកម្នាក់ ដែលចូលរួមក្នុងពិធីដ៏ពិសេសនេះ បានពន្យល់ប្រាប់អ្នកយកព័ត៌មានទូរទស្សន៍ប៉ុស្តិ៍លេខ៣ថៃ ថា អ្នកស្រុកភាគច្រើននៅតំបន់នេះ ពឹងផ្អែកលើសកម្មភាពកសិកម្មដូចជា ដាំដំឡូងមី និងពោត។ កង្វះភ្លៀងបានបង្កការលំបាកដល់អ្នកស្រុក ដូច្នេះពួកគាត់ត្រូវធ្វើពិធីសុំទឹកភ្លៀង។ អ្នកស្រុករូបនោះបន្តថា យើងចង់ឱ្យទេវតាយកចិត្តទុកដាក់លើពួកយើង ហើយដឹងថា យើងត្រូវការទឹកភ្លៀងខ្លាំងណាស់ ដូច្នេះយើងបានបង្កើតលិ.ង្គឈើដ៏ធំ ដើម្បីឱ្យទេវតាកត់សម្គាល់បានយ៉ាងច្បាស់។
យ៉ាងណាមិញ ពិធីនេះបានដំណើរការ ខណៈពេលភ្លៀងបានធ្លាក់ភ្លាមៗ បន្ទាប់ពីពិធីបញ្ចប់។ ទោះជាយ៉ាងណា តំបន់ដែលមានភ្លៀងធ្លាក់នោះមិនស្ថិតនៅលើចម្ការណាមួយឡើយ ហើយបន្ទាប់ពីមានភ្លៀងធ្លាក់តាមការចង់បានហើយ អ្នកស្រុកក៏នាំគ្នាធ្វើពិធីដង្ហែចម្លាក់លិ.ង្គដ៏ធំសម្បើមនេះ ជុំវិញសហគមន៍ខ្លួនរស់នៅ ដើម្បីអបអរសាទរទឹកភ្លៀង និងដឹងគុណដល់ទេវតា។
សូមជម្រាបថា ក្រៅពីការឆ្លាក់រូបលិង្គដើម្បីសុំទឹកភ្លៀង ប្រទេសថៃមានពិធីផ្សេងទៀតក្នុងគោលបំណងដូចគ្នា ហើយត្រូវបានរៀបចំខុសៗពីគ្នាទៅតាមតំបន់នីមួយៗ។ ជាឧទាហរណ៍ អ្នកស្រុកនៅខេត្តភាគឦសាននៃប្រទេសថៃ នឹងប្រារព្ធពិធីបុណ្យបាញ់កាំជ្រួចកែច្នៃ ឬចូលរួមនៅក្នុងក្បួនដង្ហែសត្វឆ្មា៕ (ប្រភពពី The Thaiger)
ចែករំលែកព័តមាននេះ