អតីតតារាសម្តែងជើងចាស់លោក យុត្ថារ៉ា ឆានី បានបង្ហាញតម្រុយដ៏គួរឱ្យភ្ញាក់ផ្អើលមួយ ដោយរូបលោកគ្រោងនឹងវិលមកប្រឡូកក្នុងវិស័យសិល្បៈជាថ្មីឡើងវិញ ក្រោយពីខកខានអស់រយៈពេលជាច្រើនឆ្នាំមកនេះ។ យ៉ាងណា
រាជធានីភ្នំពេញ ៖ អតីតតារាសម្តែងជើងចាស់លោក យុត្ថារ៉ា ឆានី បានបង្ហាញតម្រុយដ៏គួរឱ្យភ្ញាក់ផ្អើលមួយ ដោយរូបលោកគ្រោងនឹងវិលមកប្រឡូកក្នុងវិស័យសិល្បៈជាថ្មីឡើងវិញ ក្រោយពីខកខានអស់រយៈពេលជាច្រើនឆ្នាំមកនេះ។ យ៉ាងណា បើទោះបីជាការបង្ហាញគម្រោងវិលចូលអាជីពសម្តែងជាថ្មីឡើងវិញពីលោក យុត្ថារ៉ា ឆានី នាពេលនេះ ហាក់នៅមានភាពស្រពិចស្រពិលក៏ដោយ ប៉ុន្តែមហាជន ជាពិសេសបណ្តាអ្នកធ្លាប់គាំទ្ររូបលោកបានសម្តែងការត្រេកអរនៅពេលដែលលោកពិតជាវិលមកសារជាថ្មីមែននោះ។
លោក យុត្ថារ៉ា ឆានី បានប្រកាសជាសាធារណៈជុំវិញរឿងរ៉ាវខាងលើនេះ តាមរយៈវីដេអូឃ្លីបដែលបង្ហោះនៅលើបណ្តាញសង្គមថា លោកនឹងវិលចូលវិស័យសិល្បៈជាថ្មីឡើងវិញនៅក្នុងពេលខាងមុខនេះ ដើម្បីឆ្លើយតបពីប្រិយមិត្តគាំទ្រ។ លោកបញ្ជាក់ថា លោកបានចូលប្រឡូកវិស័យសិល្បៈតាំងពីអំឡុងឆ្នាំ១៩៨៩ រហូតមកដល់ឆ្នាំ២០០០ជាង ហើយក៏រយាលការសម្តែងរហូតស្ទើរតែបោះចោលអាជីពមួយនេះទាំងស្រុងក្នុងរយៈពេលប៉ុន្មានឆ្នាំមកនេះ ។
លោកបន្ថែមថា បច្ចុប្បន្ន មានអ្នកសិល្បៈជាច្រើន ហើយបើអត់លោកមួយមិនមែនគេថតមិនបានឡើយ ប៉ុន្តែដោយសារមានការសំណូមពរពីមហាជនច្រើន ទើបលោកពិចារណាវិលចូលវិស័យសិល្បៈនេះជាថ្មីម្តងទៀត។
យ៉ាងណា បើតាមលោក យុត្ថារ៉ា ឆានី ថា ដើម្បីវិលចូលសិល្បៈជាថ្មីឡើងវិញ គឺលោកត្រូវការប្រើពេលសម្រកគីឡូជាមុនសិន ហើយបើលោកបញ្ចុះគីឡូបាន លោកនឹងទាក់ទងបណ្តាម្ចាស់ផលិតកម្មនានា ដើម្បីចូលរួមថតភាពយន្តឡើងវិញ។
ជាការកត់សម្គាល់ លោក យុត្ថារ៉ា ឆានី គឺជាអតីតតារាសម្តែងដ៏ល្បីមួយរូប ក្នុងចំណោមតារាសម្តែងល្បីមួយចំនួនរួមជំនាន់ក្នុងទសវត្សន៍ឆ្នាំ៨០ និង៩០ ដែលមានដូចជា ៖ លោក ទេព រិនដារ៉ូ, លោក ខៃ ប្រសិទ្ធ, លោក ហម ឈរ៉ា, លោកសុវណ្ណ មុន្នី, លោក សម តារា, លោក យស បូវណ្ណៈ និងលោក ជា ណូបូ ជាដើម្បី។ល។
ទោះជាយ៉ាងណា ប៉ុន្មានឆ្នាំចុងក្រោយនេះ លោកបានឃ្លាតឆ្ងាយស្ទើរទាំងស្រុងពីវិស័យសិល្បៈ ដោយបានងាកទៅចាប់មុខរបរផ្សេង ខណៈពេលដែលមិត្តភក្តិសិល្បៈរួមជំនាន់ជាមួយលោកមាន ៖ លោក ទេព រិនដារ៉ូ លោក ហម ឈរ៉ា និងជា ណូបូ នៅបន្តអាជីពសិល្បៈនេះរហូតមកទល់បច្ចុប្បន្ន។
ដោយឡែកសម្រាប់លោក យស បូវណ្ណៈ វិញ ក៏ធ្លាប់វិលមកថតភាពយន្តជាថ្មីឡើងវិញដែរ បើទោះបីជាលោកបានចេញទៅរស់នៅលើទឹកដីអាមេរិកអស់ជាច្រើនឆ្នាំក៏ដោយ។ យ៉ាងណា គេរំពឹងថា លោក យុត្ថារ៉ា ឆានី នឹងអាចវិលមករកការសម្តែងភាពយន្តជាថ្មីឡើងវិញ ក្នុងពេលឆាប់ៗនេះ តាមការសន្យា និងចង់បានពីសំណាក់ទស្សនិក និងអ្នកគាំទ្រផងដែរ៕
ចែករំលែកព័តមាននេះ