ខេត្តកណ្ដាល ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានមានប្រសាសន៍ ពាក់ព័ន្ធទៅនឹងម្ចាស់បុរី ថា សុំឱ្យម្ចាស់បុរីទាំងអស់ មានការយោគយល់ចំពោះការលំបាករបស់ប្រជាពលរដ្ឋ ដែលមានភាពយឺតយ៉ាវក្នុងការបង់ប្រាក់ និងត្រូវរៀបចំឡើងវិញចំពោះការបង់រំលស់ផ្ទះ ។
ថ្លែងក្នុងពិធីសម្តេចតេជោ ហ៊ុន សែន បានអញ្ជើញចុះជួបសំណេះ សំណាលជាមួយកម្មករ កម្មការិនីសរុប ៦,២៧២នាក់ មកពីរោងចក្រសហគ្រាសចំនួន១២ នៅស្រុកកណ្តាលស្ទឹង ខេត្តកណ្តាល នៅព្រឹកថ្ងៃទី១០ ខែមិថុនា ឆ្នាំ២០២៣នេះ ។
ទន្ទឹមនឹងនោះ សម្តេចតេជោ ក៏បានប្រកាសលើកទឹកចិត្តអោយមានការរឹបអូសផ្ទះសម្បែងបុគ្គលប្រឆាំងណាក៏ដោយដែលធ្វើតាមនយោបាយ អាក្រក់របស់ជនក្បត់ជាតិ ៣ជំនាន់ មានចេតនាមិនបង់ប្រាក់ទៅម្ចាស់បុរី ។
សម្តេចតេជោ ហ៊ុន សែន នៅតែបន្តបញ្ជាក់ពីតម្លៃនៃសន្ដិភាព ដែលសន្តិភាពនេះ ពិតជាមានសារៈសំខាន់ណាស់សម្រាប់ប្រទេសទាំងអស់នៅលើសកលលោក ខណៈដែលប្រទេសមួយចំនួនមិនមានសន្តិភាព គឺមានសង្គ្រាមហែកហួរគ្នា គឺធ្វើឲ្យបាត់បង់អ្វីៗទាំងអស់ ជាពិសេសបាត់បង់ការងារ បាត់បង់ប្រាក់ចំណូល ធ្វើឲ្យសេដ្ឋកិច្ចធ្លាក់ចុះជាបន្តបន្ទាប់ ដូច្នេះយើងត្រូវរួមគ្នាថែរក្សាសន្តិភាពឲ្យបានគង់វង្ស ។
កាលពីម្សិលមិញ សម្តេចតេជោ ហ៊ុន សែន បានមានប្រសាសន៍ ក្នុងស្រុកកំពង់ត្រឡាច និងស្រុកសាមគ្គីមានជ័យ ខេត្តកំពង់ឆ្នាំងដោយសង្ឃឹមថា ម្ចាស់បុរីទាំងឡាយ នឹងរៀបចំឥណទាន ឡើងវិញ ព្រោះមិនមានអ្វីខាតទេ។ ហើយកន្លងទៅ ឯកឧត្តម អូន ព័ន្ធមុនីរ័ត្នរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏បានធ្វើការរៀបចំ សម្រាប់សម្រួលដល់អ្នកវិនិយោគ លើវិស័យអចលនទ្រព្យ ។ សម្តេចបានដាក់សំណួរ តើយើងគួរមានលក្ខខណ្ឌ អនុគ្រោះនោះ ក៏គួរបានផ្ដល់ សម្រាប់ម្ចាស់បុរីដែរឬទេ ?
សម្តេចតេជោ បានថ្លែងថា៖ការគ្រប់គ្រងប្រទេសមួយ គឺយើងត្រូវមើលអ្នកណា ក៏ជាមនុស្ស នៅក្នុងប្រទេសកម្ពុជា ដែលយើងត្រូវមានការទទួលខុសត្រូវ»។សូមជម្រាបថាការលើកឡើងរបស់សម្តេចបន្ទាប់ពីសម្តេចទទួលបានព័ត៌មានថាមានករណីម្ចាស់អចលនទ្រព្យមួយចំនួនបានរឹបអូសផ្ទះម្ចាស់កូនបំណុលខ្លួនបានបង់រំលួសប្រចាំខែដោយអាក់ខានប៉ុន្មានខែ ៕
ចែករំលែកព័តមាននេះ