តារាចម្រៀង ថាន់ នឿថង បានបង្ហាញក្តីរំពឹងថា នាងនឹងទទួលបានជោគជ័យថ្មីៗបន្ថែមទៀតនៅក្នុងអាជីពសិល្បៈចម្រៀងរបស់ខ្លួន បន្ទាប់ពីមានឱកាសជ្រកនៅក្នុងផលិតកម្មធំមួយនាពេលថ្មីៗនេះ
រាជធានីភ្នំពេញ ៖ តារាចម្រៀង ថាន់ នឿថង បានបង្ហាញក្តីរំពឹងថា នាងនឹងទទួលបានជោគជ័យថ្មីៗបន្ថែមទៀតនៅក្នុងអាជីពសិល្បៈចម្រៀងរបស់ខ្លួន បន្ទាប់ពីមានឱកាសជ្រកនៅក្នុងផលិតកម្មធំមួយនាពេលថ្មីៗនេះ។
បេក្ខភាពនៅក្នុងកម្មវិធី XFactor Cambodia រូបនេះ បានក្លាយជាសមាជិកតារាចម្រៀងថ្មីនៅក្នុងផលិតថោន បន្ទាប់ពីពុះពារស្វែករកទ្រនំក្នុងផលិតកម្មធំមួយ ដើម្បីជ្រកកោនពង្រឹងអាជីពចម្រៀងរបស់ខ្លួនអស់រយៈពេលប៉ុន្មានឆ្នាំមកនេះ។
ថ្លែងប្រាប់កោះសន្តិភាពតាមសារអេឡិចត្រូនិចម្ចាស់បទ «ផ្លូវណាទៅផ្ទះម៉ែក្មេក» ស្រីស្អាត ថាន់ នឿថង បានលើកឡើងថា «នាងបានសម្រេចចូលមកច្រៀងនៅផលិតកម្មថោន និងក្លាយជាតារាចម្រៀងកុងត្រានៅក្នុងផលិតកម្មដ៏ធំមួយនេះហើយ»។ នាងបញ្ជាក់ថា «ការអាចឈានជើងចូលផលិតកម្មថោននេះបាន គឺតាមរយៈការជួយជ្រោមជ្រែងពីអ្នកនិពន្ធបទចម្រៀងនៅក្នុងផលិតកម្មនេះមួយរូបដែលបានស្គាល់គ្នា ហើយបានណែនាំនាងអោយថ្នាក់ដឹកនាំផលិតកម្មបានស្គាល់»។
នាងបន្ថែមថា «ដោយសារថ្នាក់ដឹកនាំផលិតកម្មថោនបានមើលឃើញពីសមត្ថភាពរបស់នាង ទើបពួកគាត់ក៏ផ្តល់ឱកាសអោយនាងចូលផលិតកម្មនេះតែម្តង»។ ស្រីស្អាត ថាន់ នឿថង បានអះអាងបន្ថែមថា «ការចូលមកផលិតកម្មថោននាពេលនេះ គឺជាការសម្រេចក្តីបំណងប្រាថ្នារបស់នាងតាំងពីតូចនៅក្នុងការក្លាយជាតារាចម្រៀងល្បីមួយរូប និងក្លាយជាតារាចម្រៀងក្នុងផលិតកម្មធំណាមួយនៅក្នុងស្រុក»។ នាងបន្តថា «ពេលនេះនាងក៏មានឱកាសដូចការប៉ង ហេតុនេះ នាងត្រូវក្តាប់ឱកាស និងចាប់ឈោងក្តីស្រមៃរបស់ខ្លួន ដើម្បីក្លាយជាតារាចម្រៀងអាជីពដែលមានកេរ្តិ៍ឈ្មោះមួយរូប»។
បើតាមស្រីស្រស់ ថាន់ នឿថង បន្តថា «ការមកចូលក្នុងផលិតកម្មថោននាពេលនេះ នាងបានថតចម្រៀងបានចំនួន៣បទរួចហើយ ហើយបទដំបូងដែលបានចេញលើទីផ្សារហើយនោះ គឺបទ «មិនបានជួបរាល់ថ្ងៃ តែនឹករាល់ថ្ងៃ» ហើយផលិតកម្មក៏គ្រោងបញ្ចេញបទរបស់នាងថ្មីៗបន្ថែមទៀតនាពេលឆាប់ៗខាងមុខនេះផងដែរ»។
ដោយឡែកសម្រាប់ការមកជ្រកផលិតកម្មថោន ដោយមានវត្តមានតារាចម្រៀងល្បីៗជាច្រើននាពេលនេះ ត្រូវបានស្រីស្រស់ ថាន់ នឿថង បញ្ជាក់ថា «នេះជាឱកាសដែលនាងត្រូវរៀនសូត្រពីតារាចម្រៀងរៀមច្បង ហើយនាងនឹងខិតខំបន្ថែមទៀតទាំងការច្រៀង និងសម្តែង ខណៈពេលដែលនាងនឹងធ្វើអោយបានល្អបំផុតទាំងពេលបច្ចុប្បន្ន និងទៅអនាគតសម្រាប់អាជីពចម្រៀងរបស់នាង»។
ជាការកត់សម្គាល់ តារាចម្រៀង ថាន់ នឿថង បានវិវត្តន៍ខ្លួនក្លាយជាតារាចម្រៀង ក្រោយរសាត់ខ្លួនពីស្រុកកំណើតដោយសារជីវភាពខ្វះខាតលើការសិក្សាមកភ្នំពេញ ហើយស្នាក់នៅវត្ត និងផ្ទះជួល ដើម្បីស្វែងរកការងារធ្វើ។ ផ្តើមពីការច្រៀងតាមភោជនីយដ្ឋាននានានៅភ្នំពេញ តារាចម្រៀងរូបនេះក៏ដាក់ពាក្យចូលប្រឡងនៅក្នុងកម្មវិធី Xfactor Cambodia ហើយនាងក៏មានសំណាងជាប់ជាបេក្ខភាពមួយរូប ដែលបានឈានដល់វគ្គ Live Show ផងដែរ។
ចាប់តាំងពីពេលនោះមក ស្រីស្រស់ ថាន់ នឿថង ក៏មានឱកាសបញ្ចេញសមត្ថភាពច្រៀងតាមកម្មវិធីនានាជាបន្តបន្ទាប់ និងផលិតកម្មតូចៗមួយចំនួន ហើយបទចម្រៀងរបស់នាងដែលទទួលការគាំទ្រច្រើនពីសំណាក់មហាជននោះគឺបទ «ផ្លូវណាទៅផ្ទះម៉ែក្មេក»៕
ចែករំលែកព័តមាននេះ