ខេត្តមណ្ឌលគិរី ៖ ឈើប្រណីតជាច្រើនម៉ែត្រគូប ដែលត្រូវក្រុមឈ្មួញប្រមូលលាក់ទុកក្នុងព្រៃ ហើយត្រៀមដឹកជញ្ជូនទៅប្រទេសវៀតណាមនោះ ត្រូវបាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ លោក យូរ ប៊ុនស្រៀង ប្រធានស្នាក់ការប្រចាំការនៅខេត្តមណ្ឌលគិរី ដឹកនាំកម្លាំងជំនាញពាក់ព័ន្ធកម្លាំងនគរបាលខេត្តមណ្ឌលគិរី ចុះបង្ក្រាប រួចប្រមូលដឹកជញ្ជូនយកមកប្រគល់ឲ្យរដ្ឋបាលព្រៃឈើ ដើម្បីចាត់ការបន្ត។
ការបង្ក្រាបខាងលើនេះ កម្លាំងសហការធ្វើឡើងកាលពីវេលាម៉ោង២០និង៣០នាទីយប់ ថ្ងៃទី០៤ ខែមិថុនា ឆ្នាំ២០២៣ នៅត្រង់ចំណុចភូមិឡៅការ ស្ថិតក្នុងសង្កាត់សុខដុម ក្រុងសែនមនោរម្យ ខេត្តមណ្ឌលគិរី។
បើតាមប្រភពព័ត៌មានបានឲ្យដឹងថា ការជំនួញឈើប្រណីតនោះ មានក្រុមឈ្មួញតែងតែរកស៊ីដឹកជញ្ជូនដោយលួចលាក់ នៅលើដងផ្លូវ ស្ថិតក្នុងចំណុចភូមិសាស្ត្រខាងលើនោះ។ ហើយជាក់ស្តែងនៅយប់នោះ ទើបលោក យូរ ប៊ុនស្រៀង ដឹកនាំកម្លាំងសហការជាមួយជំនាញពាក់ព័ន្ធចុះបង្ក្រាបបានតែម្តង។
ក្នុងការបង្ក្រាបខាងលើនេះ កម្លាំងក៏បានធ្វើការប្រមូលដឹកជញ្ជូនឈើប្រណីតទាំងនោះ ដែលជាវត្ថុតាងទាំងអស់ បានប្រគល់ឲ្យរដ្ឋបាលព្រៃឈើខេត្ត ដើម្បីធ្វើកំណត់ហេតុ និងចាត់ការបន្តតាមច្បាប់ព្រៃឈើ៕
ចែករំលែកព័តមាននេះ