តំបន់រមណីយដ្ឋាន ជាតិបែបកែច្នៃ ទេសចរធម្មជាតិ ជាគោលដៅទេសចរណ៍វប្បធម៌ប្រវត្តិសាស្ត្រ និងធម្មជាតិ ក្រោយមានភាពធូរស្រាលនៃជំងឺកូវីដ១៩ នៅក្នុងកម្ពុជា ហើយរមណីយដ្ឋាន ទឹកធ្លាក់ពាក់ស្នែង-អង្គរធំ នេះ គឺជា
ខេត្តសៀមរាប ៖ តំបន់រមណីយដ្ឋាន ជាតិបែបកែច្នៃ ទេសចរធម្មជាតិ ជាគោលដៅទេសចរណ៍វប្បធម៌ប្រវត្តិសាស្ត្រ និងធម្មជាតិ ក្រោយមានភាពធូរស្រាលនៃជំងឺកូវីដ១៩ នៅក្នុងកម្ពុជា ហើយរមណីយដ្ឋាន ទឹកធ្លាក់ពាក់ស្នែង-អង្គរធំ នេះ គឺជាតំបន់រមណីយដ្ឋានទេសចរធម្មជាតិបែបកែច្នៃ ព្រោះថា វាមានកន្លែងថតរូបអនុស្សាវរីយ៍ជាច្រើន ហើយម្ចាស់រមណីយដ្ឋានក៏មានការរៀបចំកន្លែងថ្មីៗស្ទើរជារៀងរាល់ថ្ងៃ ក្នុងគោលបំណងដើម្បីទាក់ទាញចំណាប់អារម្មណ៍របស់ភ្ញៀវទេសចរជាតិ និងអន្តរជាតិ ដែលទៅកម្សាន្តនៅទីនោះជាលក្ខណៈក្រុមគ្រួសារ ឬក៏ឯកជន ដែលជាទីកន្លែងស្អាតប្រកបដោយផាសុខភាព និងមានសេវាកម្មសមរម្យ។
រមណីយដ្ឋាន «ទឹកធ្លាក់ពាក់ស្នែង-អង្គរធំ» នេះ ស្ថិតនៅក្នុងភូមិសណ្តាន់ ឃុំពាក់ស្នែង ស្រុកអង្គរធំ ខេត្តសៀមរាប ប៉ែកខាងជើងនៃប្រាសាទព្រះខណ្ឌ មានចម្ងាយ១០គីឡូម៉ែត្រ ពីប្រាសាទ គឺផ្លូវឆ្លងកាត់តាមសាលាស្រុកអង្គរធំ ឆ្ពោះទៅកាន់ផ្សារពាក់ស្នែងថ្មី ។
បើតាមលោក យុក សុវង្សទោ ដែលជាភ្ញៀវរស់នៅខេត្តសៀមរាប បានបង្ហាញពីចំណាប់អារម្មណ៍កាលពីថ្ងៃទី០៤ ខែមិថុនា ឆ្នាំ២០២៣នេះថា «នៅពេលដែលលោកបានមកដល់រមណីយដ្ឋានទឹកធ្លាក់ពាក់ស្នែង ស្រុកអង្គរធំនេះ គឺមានអារម្មណ៍សប្បាយរីករាយ ស្រស់ថ្លា ដោយសារនៅទីនេះម្ចាស់រមណីយដ្ឋានបានរៀបចំឱ្យមានភាពទាក់ទាញយ៉ាងខ្លាំង សម្រាប់ភ្ញៀវជាតិ និងអន្តរជាតិមកទស្សនាកម្សាន្តផងដែរ»។
លោកបានបន្តទៀតថា «រមណីយដ្ឋាន ទឹកធ្លាក់ពាក់ស្នែង-អង្គរធំនេះ ដែលមានទំហំផ្ទៃដីសរុបជាង៤ហិកតា ហើយមានរៀបចំអាងហែលទឹក មានទឹកធ្លាក់ មានផ្ទះបុរាណ មានស្ពានអាកាសជួបស្នេហ៍ មានភ្នំស្តេចឆ្មា មានភ្នំព្រះអាទិត្យ មានព្រះច័ន្ទ មានភ្នំបាតដៃ មានម្រាមដៃផុសចេញពីដី មានផ្ទះជនជាតិភាគតិច មានផ្លូវអាថ៌កំបាំង មានកន្លែងបាញ់ធ្នូរ និងនៅមានកន្លែងផ្សេងៗជាច្រើនថែមទៀត ជាពិសេសនៅក្នុងនោះ ក៏មានកូនកោះមួយ ហើយមានស្ពានយោលចេញចូលជាដើម។ ហើយពាក់ព័ន្ធនឹងសេវាកម្មនានា ចំពោះការបម្រើសេវាកម្មភ្ញៀវ គឺបុគ្គលិកមានភាពរុះរាយរាក់ទាក់ មានម្ហូបបែបខ្មែរឆ្ងាញ់ៗ តម្លៃសមរម្យ ដោយឡែកចាប់ពីខែមិថុនារហូតដល់ខែកក្កដា គឺហ្វ្រីចំពោះតម្លៃសំបុត្រចូលទស្សនា ទាំងចាស់ ទាំងក្មេងទៀតផង។
សូមញ្ជាក់ផងដែរថា ភ្ញៀវទេសចរជាច្រើនដែលបានមកទស្សនា និងមកកម្សាន្ត ដើម្បីលំហែកាយជាលក្ខណៈក្រុមៗ ឬក៏ក្រុមគ្រួសារ នៅរមណីយដ្ឋានទឹកធ្លាក់ពាក់ស្នែងនេះ។ នៅមុនពេលដែលរាជរដ្ឋាភិបាលមិនទាន់ប្រកាសឲ្យបិទនៅរមណីយដ្ឋានទេសចរនានាទូទាំងប្រទេសនោះ សម្រាប់រមណីយដ្ឋាន ទឹកធ្លាក់ពាក់ស្នែង-អង្គរធំនេះ គឺតែងតែមានភ្ញៀវចូលមកកម្សាន្តចំនួន១ពាន់នាក់ក្នុងថ្ងៃ ។ ក្រោយពេលប្រទេសកម្ពុជា មានភាពធូរស្រាលនៃជំងឺកូវីដ១៩ រមណីយដ្ឋានទឹកធ្លាក់ពាក់ស្នែង ក៏ចាប់ផ្តើមមានភ្ញៀវចូលមកកម្សាន្តជាបន្តបន្ទាប់ផងដែរ៕
ចែករំលែកព័តមាននេះ