(ហូលីវូដ)៖ ដើរតួជា Vanessa តារាសម្តែង Jessica Alexanderទទួលបានការស្រលាញ់គាំទ្រពីទស្សនិកជនជាខ្លាំង ព្រោះតែនាង​មាន​រូប​សម្រស់​គួរ​ឱ្យ​ទាក់​ទាញ។

ក្រៅពីតួឯកស្រី Halle Bailey ដែលសម្តែងជា Ariel, តារាសម្តែង Jessica Alexander ក៏ទទួលបានការចាប់អារម្មណ៍ផងដែរ។ នៅក្នុងខ្សែភាពយន្តនេះ នាងដើរតួជា Vanessa តួចិត្តអាក្រក់ ដែលនាងប្រែកាយពីមេធ្មប់ Ursula ក្នុងគោលបំណងបញ្ឈប់ទំនាក់ទំនងស្នេហារបស់ព្រះអង្គម្ចាស់ជាមួយនាងមច្ឆាតូច។

តារាសម្តែង Jessica Alexander ទទួលបានមតិវិជ្ជមានជាច្រើនពីទស្សនិកជន ទោះបីជាក្នុងរឿង The Little Mermaid នាងពុំសូវមានប្លង់សម្ដែងច្រើនក៏ដោយ នាង​បង្ហាញ​ខ្លួន​តែ​ក្នុង​ឈុត​តូច​ៗ​មួយ​ចំនួន​ប៉ុណ្ណោះ​នៅចុងសាច់រឿង។ យ៉ាង​ណា​មិញ សម្រស់​របស់​តារា​ស្រី​វ័យ​ក្មេង​រូប​នេះ​បាន​បន្សល់​ទុក​នូវ​ការ​ចាប់​អារម្មណ៍​ជា​វិជ្ជមាន បើ​ទោះ​ជា​នាង​ដើរតួជាចិត្តអាក្រក់ក៏ដោយ។

Jessica Alexander កើតនៅឆ្នាំ១៩៩៩ នៅប្រទេសអង់គ្លេស នាងបានចូលប្រឡូកក្នុងវិស័យសិល្បៈនៅអាយុ១៤ឆ្នាំ នៅឆ្នាំ២០១៣ និងបានសម្តែងក្នុងខ្សែភាពយន្តខ្នាតធំ ព្រមទាំងរឿងភាគទូរទស្សន៍ជាច្រើន។ សមត្ថភាពរបស់ Jessica Alexander លើសពីការសម្ដែង ដោយក្នុងឆ្នាំ២០១៨ នាងបានចាប់អារម្មណ៍លើ Select Model Management និងចាប់ផ្តើមអាជីពជាតារាម៉ូដែលដ៏ជោគជ័យ។ បច្ចុប្បន្ននាងត្រូវបានចុះហត្ថលេខាជាមួយ United Agents, Next Models, និង Public Eye Communications ដោយបង្ហាញពីជំនាញ និងសម្រស់ដ៏គួរឱ្យទាក់ទាញរបស់នាង។

នៅខែមីនា ឆ្នាំ២០២១ ប្រភពជាច្រើនបានបញ្ជាក់ថា Jessica Alexander នឹងចូលរួមក្នុង គម្រោងរបស់ Disney ដែលមានឈ្មោះថា The Little Mermaid ។ នាងទទួលបានការចាប់អារម្មណ៍ពីទស្សនិកជនយ៉ាងច្រើនជុំវិញពិភពលោកយ៉ាងឆាប់រហ័ស នៅពេលនោះ តួអង្គរបស់ Jessica មិនត្រូវបានបង្ហាញឱ្យដឹងនោះទេ។ ទស្សនិកជន​ជាច្រើន​ក៏​គិត​ថា​នាង​នឹង​ដើរតួ​ជា​នាង​មច្ឆា Ariel ក្នុង​រឿង​នេះ​។

ភាពយន្ត​ ​របស់​ Disney ​រឿង​ «នាងមច្ឆាតូច» ឬ The Little Mermaid បាន​បើក​សម្ពោធបញ្ជាំង​ជា​ផ្លូវ​ការ​នៅ​ថ្ងៃ​ទី២៦ ខែ​ឧសភា។ ភាពយន្តនេះគឺជាការថតឡើងវិញនៃកំណែគំនូរជីវចលរឿងព្រេងនិទានដែលបានចេញផ្សាយនៅឆ្នាំ១៩៨៩។

យោងតាមអ្នកសង្កេតការណ៍ Box Office ប្រាក់ចំណូលក្នុងស្រុករបស់ខ្សែភាពយន្តនេះឈានដល់ ១១៧.៥លានដុល្លារ បន្ទាប់ពីការចេញផ្សាយរយៈពេល ៤ថ្ងៃ។ នៅទូទាំងពិភពលោក ភាពយន្តនេះរកចំណូលបានរហូតដល់ ១៨៥.៨ លានដុល្លារអាមេរិក៕