តារាសម្តែងសាច់ចាំង គឺអ្នកនាង លី ម៉ារីណា បានរៀបចំពិធីខួបកំណើតរបស់ខ្លួនក្នុងវ័យ៤២ឆ្នាំ កាលពីថ្ងៃទី២៦ ខែឧសភា ឆ្នាំ២០២៣ យ៉ាងឱឡារឹក ដោយមានវត្តមានអ្នកសិល្បៈជាច្រើនដួងចូលរួមផងដែរ។ ហើយអ្វីដែលគេចាប់អារម្មណ៍នៅក្នុងថ្ងៃដ៏ពិសេសនោះ គឺ
រាជធានីភ្នំពេញ ៖ តារាសម្តែងសាច់ចាំង គឺអ្នកនាង លី ម៉ារីណា បានរៀបចំពិធីខួបកំណើតរបស់ខ្លួនក្នុងវ័យ៤២ឆ្នាំ កាលពីថ្ងៃទី២៦ ខែឧសភា ឆ្នាំ២០២៣ យ៉ាងឱឡារឹក ដោយមានវត្តមានអ្នកសិល្បៈជាច្រើនដួងចូលរួមផងដែរ។ ហើយអ្វីដែលគេចាប់អារម្មណ៍នៅក្នុងថ្ងៃដ៏ពិសេសនោះ គឺ លី ម៉ារីណា ក៏បានបើកបង្ហាញយ៉ាងចំហរនូវមុខមាត់គូស្នេហ៍ថ្មីរបស់នាង អមជាមួយនឹងពាក្យពេចន៍យ៉ាងផ្អែមល្ហែម ចំពោះបុរសជាគូស្នេហ៍ដែលលះបង់ និងផ្តល់ក្តីស្រឡាញ់មកលើរូបនាងជាបន្តបន្ទាប់។
ជាមួយនឹងរូបភាពឱបថើបយ៉ាងផ្អែមល្ហែមនៅក្នុងថ្ងៃខួបកំណើត តារាសម្តែងមេម៉ាយកូនមួយ លី ម៉ារីណា បានភ្ជាប់ជាមួយនឹងសំណេរយ៉ាងមានន័យបង្ហោះនៅលើបណ្តាញសង្គមថា «អគុណបងដែលផ្តល់ក្តីស្រលាញ់ឲ្យអូនយ៉ាងធំធេង បងបានរៀបចំចាត់ចែងកម្មវិធីថ្ងៃកំណើតជូនអូនយ៉ាងពិសេស អូនពិតជារំភើបចិត្តឥតគណនា កាដូដែលអូនទទួលបានពីបង គឺក្តីស្រឡាញ់ និងការយកចិត្តទុកដាក់ មើលថែគ្រប់ពេលវេលា កាដូទាំងនេះមានតម្លៃបំផុតសម្រាប់អូន អគុណបងគ្រប់យ៉ាង»។
តាមរយៈរូបភាពស្និទ្ធស្នាលអមជាមួយនឹងសំណេរដ៏ផ្អែមល្ហែមខាងលើនេះ ត្រូវបានមហាជន ជាពិសេសមិត្តភក្តិនៅក្នុងចង្កោមសិល្បៈដូចគ្នានាំគ្នាសម្តែងការអបអរសាទរ និងជូនពរ លី ម៉ារីណា ឲ្យជួបនូវសុភមង្គលក្នុងពេលដែលនាងបានរកឃើញបុរសដែលគូស្នេហ៍ថ្មីដែលមកស្នំបេះដូងរបស់នាងឲ្យមានភាពកក់ក្តៅជាថ្មីឡើងវិញ បន្ទាប់ពីនាងធ្លាប់ពើបប្រទះស្នេហាដែលមិនសមប្រកបនាពេលកន្លងមក។
យ៉ាងណា បើទោះបីជា លី ម៉ារីណា មិនបានបញ្ជាក់ឲ្យបានច្បាស់ថា តើបុរសដែលជាគូស្នេហ៍របស់នាងនាពេលនេះ មានប្រភពមកពីណាក៏ដោយ? ប៉ុន្តែតាមការសង្កេត គេអាចដឹងថា បុរសរូបនោះ អាចជាអ្នកជំនួញមានទ្រព្យស្តុកស្តម្ភមួយរូប ដែលមានមុខមាត់នៅក្នុងសង្គមម្នាក់ផងដែរ។ មិនត្រឹមតែប៉ុណ្ណោះ គូស្នេហ៍របស់ លី ម៉ារីណា ក៏ធ្លាប់ជាតារាសម្តែងម្នាក់ផងដែរ ដោយលោកសម្តែងក្នុងបទ «ពោធិ៍ចិនតុងអន្លង់ស្នេហ៍ខ្ញុំ» ច្រៀងដោយអ្នកនាង គឹម លក្ខិណា នៅក្នុងផលិតកម្មហង្សមាស។
ជាការកត់សម្គាល់ តារាសម្តែងអ្នកនាង លី ម៉ារីណា បានប្រកាសជាសាធារណៈថា «នាងបានសម្រេចលែងលះជាមួយស្វាមីដែលជាអាណិកជនខ្មែររស់នៅអាមេរិក ដែលឈ្មោះ សាត ចាន់ថត ដោយសារមូលហេតុរស់នៅមិនចុះសម្រុងនឹងគ្នា បន្ទាប់ពីរួមរស់ជាមួយគ្នាអស់ជាច្រើនឆ្នាំ ដោយទទួលបានកូនប្រុសមួយរូប»៕
ចែករំលែកព័តមាននេះ