ខេត្តកំពង់ចាម ៖ អ្នកភូមិមានការភ្ញាក់ផ្អើលយ៉ាងខ្លាំង កាលពីវេលាម៉ោងប្រមាណ៩និង៤០នាទីព្រឹក ថ្ងៃទី២០ ខែឧសភា ឆ្នាំ២០២៣កន្លងទៅ ក្រោយពីប្រទះឃើញស.ពបុរសម្នាក់ត្រូវបានគេកប់នៅក្នុងចម្ការដំឡូងមួយកន្លែង ស្ថិតនៅក្នុងភូមិ៣៤ ឃុំតាអុង ស្រុកចំការលើ ។
ចម្ការដំឡូងនោះ ស្ថិតនៅចម្ងាយប្រហែល៣គីឡូម៉ែត្រពីផ្លូវជាតិលេខ៧៣ ជិតដល់ព្រំប្រទល់ស្រុកព្រៃឈរ ហើយក្រោយពីប្រទះឃើញសព.នេះ ប្រជាពលរដ្ឋក៏បានរាយការណ៍ប្រាប់មេភូមិ និងសមត្ថកិច្ចមូលដ្ឋានភ្លាមៗផងដែរ។
តាមប្រភពសមត្ថកិច្ចមូលដ្ឋាន បានឱ្យដឹងថា បុរសម្ចាស់ចម្ការខាងលើមានឈ្មោះ ចាន់ ម៉ុល អាយុ៦០ឆ្នាំ មានទីលំនៅក្នុងភូមិសំព័រ ឃុំតាអុង ស្រុកចំការលើ ។ ហើយនៅព្រឹកថ្ងៃនោះ គាត់បានទៅមើលដំឡូងគាត់ដែលដាំនៅចម្ការខាងលើ ដោយសារខ្វះទឹកភ្លៀងធ្វើឲ្យដំឡូងក្រៀមស្វិត ។ ពេលដើរមើលតាមរងដំឡូង ស្រាប់តែប្រទះឃើញដៃមនុស្សតែម្តង ភ្លាមៗនោះនៅមិនទាន់ដឹងថា តើជាមនុស្សប្រុសឬស្រីនោះទេ? ព្រោះឃើញតែដៃចេញពីក្នុងដី ។
សមត្ថកិច្ចមូលដ្ឋាន បានបន្តថា ក្រោយពីប្រទះឃើញបែបនេះហើយ បុរសម្ចាស់ចម្ការក៏ត្រឡប់មកផ្ទះ
វិញ ហើយរាយការណ៍ប្រាប់លោកមេភូមិ និងសមត្ថកិច្ចមូលដ្ឋាន ។ បន្ទាប់មក នគរបាលប៉ុស្តិ៍ក៏បានរាយការណ៍ជូនលោកវរសេនីយ៍ឯក កែវ ស៊ាងហ៊ាន់ អធិការនគរបាលស្រុកចំការលើ ទើបមានការបង្កើតគណៈកម្មការចម្រុះ ដោយមានការចូលរួមពីគ្រូពេទ្យផងដែរចុះទៅពិនិត្យ ។
តាមការពិនិត្យ គឺជាស.ពមនុស្សប្រុសដែលគេកប់មិនជ្រៅនោះទេ ហើយធំក្លិនស្អុយទៅហើយ និងមានដង្កូវចោះទៀតផង ។ ស.ពជនរងគ្រោះនេះ គឺមានអាយុប្រហែល២៦ឆ្នាំ ពាក់អាវដៃវែងក្រឡាការ៉ូ ពណ៌ឈា.មជ្រូកលាយពណ៌ប្រផេះក្រមៅ ស្លៀកខោជើងវែងសាច់ក្រណាត់ពណ៌ខ្មៅ កម្ពស់១,៦៥ម៉ែត្រ មានសាក់នៅលើទ្រូងជាអក្សរខ្មែរ «ស្លា.ប់រស់ព្រោះដុល្លារ» និងនៅលើកំភួនដៃឆ្វេងមានសាក់ជាអក្សរខ្មែរ «តស៊ូដើម្បីកូន» ។ ជាការសន្និដ្ឋាន ស.ពជនរងគ្រោះនេះ ត្រូវបានគេយកមកកប់នៅក្នុងចម្ការដំឡូងនេះប្រហែលជា៣ទៅ៤ថ្ងៃមកហើយ គឺកប់រាក់ ។
ចំពោះករណីខាងលើនេះ សមត្ថកិច្ចស្រាវជ្រាវរកសាច់ញាតិមិនទាន់ឃើញនៅឡើយទេ ហើយស.ពជនរងគ្រោះត្រូវបានយកទៅបញ្ចុះនៅវត្តស្វាយមាស ស្ថិតក្នុងភូមិតាអុង ឃុំតាអុង ស្រុកចំការលើ តាមបញ្ជាឯកឧត្តម វង្ស ប៊ុនវិសុទ្ធ ព្រះរាជអាជ្ញានៃអយ្យការអមសាលាដំបូងខេត្ត ។
តាមការសួរនាំគ្រប់ឃុំនៅក្នុងស្រុកចំការលើ មិនមានក្រុមគ្រួសារណាមួយបាត់សមាជិកដែលមានភិនភាគដូចបានរៀបរាប់ខាងលើនេះទេ ហើយស.ពជនរងគ្រោះនេះ អាចជាមនុស្សនៅក្រៅស្រុក ។
ដូច្នេះ បើបងប្អូនណាមានបាត់សមាជិកគ្រួសារមានភិនភាគដូចខាងលើ សូមទាក់ទងជាមួយនឹងកម្លាំងអធិការដ្ឋាននគរបាលស្រុកចំការលើ នឹងទទួលបានព័ត៌មានពិស្ដារបន្ថែមទៀត ៕
ចែករំលែកព័តមាននេះ