ខេត្តព្រះសីហនុ ៖ រមណីយដ្ឋានទឹកធ្លាក់ក្បាលឆាយ ស្ថិតនៅក្នុងភូមិសាស្ត្រក្រុងព្រះសីហនុ ដែលមានចម្ងាយពីផ្លូវជាលេខ៤ប្រមាណជាង៩គីឡូម៉ែត្រ ទៅដល់ទឹកធ្លាក់ដោយធ្វើដំណើរតាមផ្លូវគ្រោះក្រហម ។ លោក តាំង គីតេង…
ខេត្តព្រះសីហនុ ៖ រមណីយដ្ឋានទឹកធ្លាក់ក្បាលឆាយ ស្ថិតនៅក្នុងភូមិសាស្ត្រក្រុងព្រះសីហនុ ដែលមានចម្ងាយពីផ្លូវជាលេខ៤ប្រមាណជាង៩គីឡូម៉ែត្រ ទៅដល់ទឹកធ្លាក់ដោយធ្វើដំណើរតាមផ្លូវគ្រោះក្រហម ។
លោក តាំង គីតេង អ្នកគ្រប់គ្រងតំបន់អភិរក្សទឹកស្អាតអានកូរបានឲ្យដឹងថា រមណីយដ្ឋានធម្មជាតិទឹកធ្លាក់ក្បាលឆាយ ជារមណីយដ្ឋានពេញនិយមពីសំណាក់ភ្ញៀវជាតិ និងអន្តរជាតិទៅទស្សនាកម្សាន្តដោយមានទឹកជ្រោះធ្លាក់ច្រើនជាន់ មានកន្លែងអង្គុយលេង ហូបចុក ក្នុងតម្លៃសមរម្យ ។
បន្ថែមពីលើនេះ លោកក៏បានបញ្ជាក់ថា ដើម្បីមានការអភិវឌ្ឍន៍បន្ថែមរមណីយដ្ឋានទឹកធ្លាក់ក្បាលឆាយបច្ចុប្បន្ន មានកន្លែងចែវទូកលេងកម្សាន្ត និងទូកបណ្ដែតទឹកតាមដងជ្រោះដែលមានចម្ងាយប្រមាណ២គីឡូម៉ែត្រ ។ ដោយកន្លែងខ្លះមានជ្រោះចោទជម្រាល និងកន្លែងខ្លះក៏មានផ្ទៃទឹកស្មើដោយយើងចែវទូកលេងកម្សាន្តតាមដងព្រែកប្រកបដោយបរិយាកាសសប្បាយរីករាយ។
លោកក៏បានបន្ថែមថា ដូចនេះសម្រាប់ភ្ញៀវទេសចរមកលេងរមណីយដ្ឋានទឹកធ្លាក់ក្បាលឆាយ មានទាំងទឹកជ្រោះលេងកម្សាន្ត និងទូកបណ្ដែតលើទឹក និងមានកន្លែងអង្គុយលេង ស្ដាប់សូរទឹកធ្លាក់សត្វយំប្រកបទៅដោយ ផាសុកភាព និងខ្យល់អាកាសបរិសុទ្ធ ។
លោកក៏បានលើកឡើងថា ការរៀបចំរមណីយដ្ឋានថ្មីបន្ថែមទៀតនេះ ក្នុងគោលបំណងចូលរួមជាមួយនឹងអាជ្ញាធរខេត្តក្នុងការទាក់ទាញភ្ញៀវទេសចរទាំងជាតិ និងអន្តរជាតិ មកលេងកាន់តែច្រើនបង្កើនប្រាក់ចំណូលជូនដល់កូនចៅបងប្អូនប្រជាពលរដ្ឋអាជីវករលក់ដូរនៅក្នុងតំបន់រមណីយដ្ឋានទឹកធ្លាក់ក្បាលឆាយផងដែរ ។
ក្នុងនោះ លោកក៏បានសំណូមពរទៅដល់បងប្អូនភ្ញៀវទេសចរទាំងអស់ ចូលមកលេងកំសាន្តតំបន់រមណីយដ្ឋានទឹកធ្លាក់ក្បាលឆាយ សូមចូលរួមថែរក្សាអនាម័យបរិស្ថានទាំងអស់គ្នា កុំចោលថង់សំរាមកាក សំណល់ផ្សេងៗចូលទៅក្នុងទឹក ទាំងនេះគឺជាការចូលរួមទាំងអស់គ្នា ដើម្បីសោភ័ណភាពបរិស្ថានស្អាតបានយូរអង្វែង ។
ចែករំលែកព័តមាននេះ