រាជធានីភ្នំពេញ ៖ ព្រះខ័នរាជ្យបានត្រឹមតែយកស្មើ ២-២ ជាមួយគិរីវង់សុខសែនជ័យប៉ុណ្ណោះ សម្រាប់ការប្រកួតនៅលើទីលានពហុកីឡដ្ឋានជាតិកាលពីរសៀលថ្ងៃសៅរ៍ ទី៣០ ខែមេសា កន្លងទៅនេះ ខណៈដែលអគ្គស្នងការដ្ឋាននគរបាលជាតិ ឈ្នះបៀលប្រាយក្នុងលទ្ធផល ៣-១
រាជធានីភ្នំពេញ ៖ ព្រះខ័នរាជ្យបានត្រឹមតែយកស្មើ ២-២ ជាមួយគិរីវង់សុខសែនជ័យប៉ុណ្ណោះ សម្រាប់ការប្រកួតនៅលើទីលានពហុកីឡដ្ឋានជាតិកាលពីរសៀលថ្ងៃសៅរ៍ ទី៣០ ខែមេសា កន្លងទៅនេះ ខណៈដែលអគ្គស្នងការដ្ឋាននគរបាលជាតិ ឈ្នះបៀលប្រាយក្នុងលទ្ធផល ៣-១។
ការប្រកួតបាល់ទាត់ពានរង្វាន់មិត្តហ្វូន២០១១ បានឈានចូលដល់សប្តាហ៍ទី៣ហើយ។ ព្រះខ័នរាជ្យ ជួបគិរីវង់សុខសែនជ័យ លើកនេះមានភាពស្វិតស្វាញបន្តិចហើយ ព្រោះថាការគ្រប់គ្រងបាល់រវាងក្រុមទាំង២មានភាពប្រហាក់ប្រហែលគ្នា។ ប៉ុន្តែនៅក្នុងតង់ទី១ គិរីវង់សុខសែនជ័យ មានឱកាសរកបាន១គ្រាប់នាំមុខមុននៅនាទីទី៤០ ដែលជាថ្វីជើងរបស់កីឡាករ OLADIJI N-OLATUNDE ពាក់អាវលេខ១០។ ព្រះខ័នរាជ្យ បានព្យាយាមតាមយកស្មើ១គ្រាប់សងវិញនៅតង់ទី២ នាទីទី៤៦ ដែលរកបានដោយកីឡាករទុំ សារ៉ាយ ពាក់អាវលេខ១៩។ ទោះបីជាយ៉ាងណា ព្រះខ័នរាជ្យ នៅតែតាមពីក្រោយគិរីវង់សុខសែនជ័យរហូត ព្រោះថានៅនាទីទី៦៣ កីឡាករ OLATUNDE ដដែលបានទាត់បំប៉ោងសំណាញ់១គ្រាប់បន្ថែមទៀត មុនពេលខ្សែប្រយុទ្ធឃួន ឡាបូរ៉ាវី ពាក់អាវលេខ១១ របស់ព្រះខ័នរាជ្យ ទាត់ចូល១គ្រាប់សងវិញនៅនាទីទី៧២។ គិរីវង់សុខសែនជ័យ គិតមកដល់ពេលនេះទើបតែរកបាន៤ពិន្ទុប៉ុណ្ណោះ គឺលេង៣ប្រកួតឈ្នះ១, ស្មើ១ និងចាញ់១។ ចំណែកព្រះខ័នរាជ្យវិញលេងបាន៣ប្រកួតដូចគ្នា ស្មើទាំង៣ប្រកួត មាន៣ពិន្ទុគត់។
អគ្គស្នងការដ្ឋាននគរបាលជាតិ បន្ទាប់ពីបានយកឈ្នះបៀលប្រាយយូណាយធីតលើកនេះទៀតនោះ គេមាន៦ពិន្ទុហើយ ក្នុងនោះឈ្នះ២ ចាញ់១។ ចំណែកបៀលប្រាយយូណាយធីតលេងបាន៣ប្រកួតដូចគ្នា ស្មើ១ ចាញ់២ ទើបតែរកបាន១ពិន្ទុប៉ុណ្ណោះ៕
ចែករំលែកព័តមាននេះ