តារាចម្រៀងនាង តន់ ចាន់ សីម៉ា បានបង្ហាញក្តីរំភើបយ៉ាងខ្លាំង បន្ទាប់ពីនាងសម្រេចក្តីបំណងដែលប៉ងកាលពីជិត១០ឆ្នាំមុន នៅក្នុងការក្តាប់ឱកាសច្រៀងលើឆាកដ៏ធំនៃកម្មវិធីអង្គរសង្ក្រាន្
រាជធានីភ្នំពេញ ៖ តារាចម្រៀងនាង តន់ ចាន់ សីម៉ា បានបង្ហាញក្តីរំភើបយ៉ាងខ្លាំង បន្ទាប់ពីនាងសម្រេចក្តីបំណងដែលប៉ងកាលពីជិត១០ឆ្នាំមុន នៅក្នុងការក្តាប់ឱកាសច្រៀងលើឆាកដ៏ធំនៃកម្មវិធីអង្គរសង្ក្រាន្ត។
ចាប់ពីយុវជនស្ម័គ្រចិត្តរបស់ ស.ស.យ.ក ខេត្តតាកែវមួយរូប ដែលធ្លាប់ចូលរួមក្នុងកម្មវិធីអង្គរសង្ក្រាន្ត កាលពីឆ្នាំ២០១៥ តន់ ចាន់សីម៉ា ត្រឹមតែបានច្រៀងជាក្រុមនូវបទ «នគរាជ» និងបទ «ពង្សាវតាខ្មែរ» តែប៉ុណ្ណោះ ខណៈពេលនោះនាងមិនទាន់ក្លាយជាតារាចម្រៀងដែលមានកេរ្តិ៍ដូចពេលនេះឡើយ។ យ៉ាងណា ដោយសារមហិច្ឆតាចង់ក្លាយជាតារាចម្រៀងអាជីព និងមានឱកាសបានឡើងច្រៀងនៅលើឆាកតន្ត្រីដ៏ធំ នៃកម្មវិធីអង្គរសង្ក្រាន្ត នៅក្នុងឆ្នាំណាមួយនោះតារាចម្រៀងរូបនេះបានខិតខំព្យាយាមតស៊ូ ហើយនៅទីបំផុតនាងក៏សម្រេចបំណងប្រាថ្នានៅក្នុងការឡើងច្រៀងលើឆាក នៃកម្មវិធីដ៏ធំខាងលើ នាឆ្នាំ២០២៣នេះ។
តារាចម្រៀង តន់ ចាន់សីម៉ា បានលើកឡើងតាមរយៈសំណេរបង្ហោះតាមហ្វេសប៊ុកថា «2015&2023 ពីយុវជនស្ម័គ្រចិត្ត ស.ស.យ.ក ខេត្តតាកែវ ច្រៀងបទ នគររាជ និងពង្សាវតា បើកព្រឹត្តិការណ៍អង្គរសង្ក្រាន្តឆ្នាំ២០១៥»។ នាងបញ្ជាក់ថា «ធ្លាប់មានក្តីស្រមៃថា ថ្ងៃណាមួយខ្ញុំនឹងច្រៀងលើឆាកធំ អង្គរសង្ក្រាន្តឱ្យបាន ពេលនេះខ្ញុំធ្វើបានហើយ អគុណជាពិសេសដល់ពុកម៉ែបងប្អូនដែលគាំទ្រ»។ នាងថា «ឆ្នាំ២០២៣នេះ ខ្ញុំមានកិត្តិយសបានសម្ដែងនៅឆាកធំទីលានជល់ដំរីជាមួយនឹងបទ ស្រឡាញ់អ្វីដែលខ្មែរមាន ក្តីស្រមៃ និងក្តីសង្ឃឹម សិល្បៈរស់ក្នុងសន្តិភាព អគុណសន្តិភាព»។
តាមរយៈសំណេរខាងលើនេះ បានធ្វើអោយមហាជន ជាពិសេសបណ្តាអ្នកគាំទ្ររូបនាងជាច្រើននាំគ្នាចូលទៅខំមិន ដោយម្នាក់ៗសម្តែងការអបអរសាទរ និងមោទកភាពសម្រាប់នាងដែលអាចសម្រេចក្តីស្រមៃរបស់ខ្លួននាពេលនេះ។
ជាការកត់សម្គាល់ ទំរាំមានថ្ងៃនេះ តារាចម្រៀង តន់ ចាន់សីម៉ា គឺមានការតស៊ូខ្លាំងក្នុងដំណើរជីវិតមុននឹងឈានជើងក្លាយជាតារាចម្រៀងអាជីពនាពេលបច្ចុប្បន្ន។ តារាចម្រៀង តន់ ចន្ទសីម៉ា គឺជាអតីតបេក្ខភាពនៅក្នុងកម្មវិធីប្រឡងចម្រៀងលំដាប់ថ្នាក់ពិភពលោក The Voice Cambodia រដូវកាលទី២ មួយរូប ដែលមានភាពលេចធ្លោខ្លាំង ទោះបីជាតារាស្រីរូបនេះ មិនបានឈ្នះពាន ក្នុងកម្មវិធីប្រឡងចម្រៀងដ៏ធំមួយនេះក៏ពិតមែន តែនាងក៏ជាបេក្ខភាពឆ្នើមដ៏លេចធ្លោមួយរូប មានសមត្ថភាពខ្ពស់ ថែមទាំងទទួលបានការស្រឡាញ់គាំទ្រខ្លាំងពីសំណាក់មហាជនទៀតផង។
បច្ចុប្បន្ន កញ្ញា តន់ ចន្ទសីម៉ា គឺជាតារាចម្រៀងស្រីជួរមុខនៅកម្ពុជាមួយរូប ដែលមានឈ្មោះបោះសំឡេងគ្រប់ទិសទិនៅទូទាំងប្រទេស។ បច្ចុប្បន្ន នាងគឺជាតារាចម្រៀងដែលត្រូវបានចាត់ទុកជាគ្រាប់ពេជ្រមួយដួងនៅក្នុងផលិតកម្ម Galaxy Navatra ផងដែរ៕
ចែករំលែកព័តមាននេះ