កម្ពុជារៀបចំយុទ្ធសាស្ត្រទីផ្សារ ដើម្បីទាក់ទាញភ្ញៀវទេសចរ
តាមរបាយការណ៍របស់អង្គការទេសចរណ៍ពិភពលោក (UNWTO) បានឲ្យដឹងថា
តាមរបាយការណ៍របស់អង្គការទេសចរណ៍ពិភពលោក (UNWTO) បានឲ្យដឹងថា
រាជធានីភ្នំពេញ ៖ ដោយសារតែកត្តាអំណោយផលនៃចំនួនប្រជាពលរដ្ឋដ៏ច្រើនលើសលប់ និងការកើនឡើងនៃកំណើនសេដ្ឋកិច្ចរបស់ប្រទេសចិន បានជំរុញឲ្យប្រជាពលរដ្ឋប្រទេសនេះធ្វើដំណើរទេសចរណ៍យ៉ាងច្រើននៅលើពិភពលោក ។
តាមរបាយការណ៍របស់អង្គការទេសចរណ៍ពិភពលោក (UNWTO) បានឲ្យដឹងថា អាស្រ័យដោយកត្តាអំណោយផល ធ្វើឲ្យតម្រូវការនៃការធ្វើដំណើរទេសចរណ៍របស់ប្រជាពលរដ្ឋចិននៅក្នុងឆ្នាំ២០១៤ មានចំនួន១៣០លាននាក់ រួមទាំងការចំណាយថវិកាក្នុងការធ្វើដំណើរប្រមាណ២៥០ប៊ីលានដុល្លារអាមេរិក ។
ទន្ទឹមនឹងនេះ ប្រជាពលរដ្ឋចិនបានចូលមកទស្សនាកម្សាន្ដនៅតំបន់អាស៊ានប្រមាណ១២លាននាក់ ក្នុងនោះកម្ពុជាទទួលបានទេសចរចិនចំនួន៥៦ម៉ឺននាក់ក្នុងឆ្នាំ២០១៤កន្លងទៅ ។ ចំណែកឆ្នាំ២០១៥ ទេសចរចិនមកកម្ពុជាមានចំនួន៧០ម៉ឺននាក់ ។
ផ្តើមពីកត្តាសត្យានុម័តទាំងនោះ បណ្តាប្រទេសអាស៊ានក៏កំពុងតែរៀបចំនូវយុទ្ធសាស្ត្រ ដើម្បីអូសទាញភ្ញៀវទេសចរចិន ។ ដោយឡែកក្រសួងទេសចរណ៍កម្ពុជា ក៏បានរៀបចំនូវយុទ្ធ សាស្ត្រឆ្នាំ២០១៦-២០២០ ដើម្បីទាក់ទាញភ្ញៀវទេសចរចិនផងដែរ ។
តាមសៀវភៅបោះពុម្ពផ្សាយដោយក្រសួងទេសចរណ៍បានបង្ហាញថា យុទ្ធសាស្ត្រទីផ្សារទាក់ទាញទេសចរចិនសម្រាប់ឆ្នាំ២០១៦-២០២០ មាន៦ចំណុចសំខាន់ៗគឺ ៖
១-យុទ្ធសាស្ត្រពង្រីកទីផ្សារគោលដៅអាទិភាពទៅកាន់ប្រទេសចិន សំខាន់គោលដៅដែលមានប្រជាជនរស់នៅច្រើនដូចជា ទីក្រុងប៉េកាំង ទីក្រុងសៀងហៃ ទីក្រុងក្វាងចូវ និងទីក្រុងហុងកុង ជាដើម ។
២-យុទ្ធសាស្ត្រពង្រឹងគុណភាព និងអភិវឌ្ឍន៍ផលិតផលឆ្លើយតបតាមតម្រូវការទីផ្សារចិន ខណៈផលិតផល និងសេវាទេសចរណ៍កម្ពុជាបច្ចុប្បន្ននៅមានការខ្វះខាតច្រើន ។
៣-យុទ្ធសាស្ត្រលើកទឹកចិត្ត និងជំរុញការតភ្ជាប់ដោយផ្តើមចេញពីនយោបាយចិន វិថីសូត្រ (Silk Road) ។
៤-យុទ្ធសាស្ត្រសម្រួលការធ្វើដំណើរឆ្លងកាត់ដោយចាំបាច់ត្រូវរៀបចំដាក់អក្សរចិនលើបែបបទលិខិតស្នាម និងស្លាកសញ្ញាសម្គាល់នានាជាពិសេសមួយសម្រាប់ការមកដល់នៃទេសចរចិន ។
៥-យុទ្ធសាស្ត្របង្កើនការផ្សព្វផ្សាយ ខណៈបច្ចុប្បន្ននេះ កម្ពុជាមានកង្វះខាតព័ត៌មានអំពីគោលដៅទេសចរណ៍ទៅកាន់ប្រទេសចិន ដែលជាឧបសគ្គធ្វើឲ្យទេសចរចិនមានភាពស្រពេចស្រពិលក្នុងការជ្រើសរើសគោលដៅធ្វើដំណើរមកកាន់កម្ពុជា ។
៦-យុទ្ធសាស្ត្រពង្រឹង និងពង្រីកកិច្ចសហប្រតិបត្តិការជាមួយដៃគូពាក់ព័ន្ធ ពិសេសជាមួយបណ្តាទីភ្នាក់ងារទេសចរណ៍ទាំងអស់ដែលទទួលភ្ញៀវទេសចរចិន ។ ទន្ទឹមនឹងនេះ ក៏ពង្រឹង និងពង្រីកកិច្ចសហប្រតិបត្តិការជាមួយអាជ្ញាធរទេសចរណ៍ចិន ស្ថាប័នទេសចរណ៍ចិនក្នុងបណ្តាទីក្រុង និងខេត្តសំខាន់ៗរបស់ចិន ។
សាធារណរដ្ឋប្រជាមានិតចិន មានទីតាំងស្ថិតនៅក្នុងតំបន់អាស៊ីបូព៌៌ា ដែលមានផ្ទៃដីសរុបធំលំដាប់ថ្នាក់ទី៣ និងជាប្រទេសមហាអំណាចសេដ្ឋកិច្ចពិភពលោកចំណាត់ថ្នាក់ទី២ បន្ទាប់ពី សហរដ្ឋអាមេរិក ដោយមានផលិតផលក្នុងស្រុកសរុប (GDP) ចំនួនជាង១០ទ្រីលានដុល្លារនៃផលិតផលក្នុងស្រុកសរុបនៅឆ្នាំ២០១៤ ដែលមានអត្រាកំណើនជាមធ្យម៧,៤%ក្នុង១ឆ្នាំ និងនៅឆ្នាំ២០១៥ មានចំនួន១១ទ្រីលានដុល្លារ នៃផលិតផលក្នុងស្រុកសរុបដែលមានកំណើន ៦,៨% ។ នេះបើយោងតាមស្ថិតិរបស់អង្គការ IMF ស្តីពី World Economic Outlook (WEO) ខែតុលា ឆ្នាំ២០១៥ ។
សូមបញ្ជាក់ថា កាលពីឆ្នាំ២០១៦ កម្ពុជាទទួលភ្ញៀវទេសចរចិនចំនួន៨០ម៉ឺននាក់ ក្នុងនោះ កម្ពុជាសង្ឃឹមថា នឹងទាក់ទាញភ្ញៀវទេសចរចិនប្រមាណ១លាននាក់ក្នុងឆ្នាំ២០១៧ និងប្រមាណ ២លាននាក់នៅឆ្នាំ២០២០ ៕
ចែករំលែកព័តមាននេះ