ប្រយ័ត្នប្រយែងផងបងប្អូនដែលនិយមចូលចិត្តទៅរកគ្រូមន្តអាគម រំដោះគ្រោះ ស្រោចទឹកលើករាសី ធ្វើខ្សែចង្កេះ ដោះអំពើអំពាន់ផ្សេងៗ។ លោកអ្នកមានជំនឿបែបនេះក៏មានចុះ។ បើទៅរកប៉ះចំគ្រូល្អមិនអីទេ។ ប៉ុន្តែមានករណីគ្រូបោកនៅប្រទេសឥណ្ឌូណេស៊ីថ្មីៗនេះត្រូវសមត្ថកិច្ចចាប់ខ្លួន និងកសាងសំណុំរឿងបញ្ជូនទៅតុលាការពីបទមនុស្សឃាតដោយគិតទុកជាមុនដែលមានស្ថានទម្ងន់ទោស។ សមត្ថកិច្ចគាស់ឃើញគ្រោងឆ្អឹងមនុស្សចំនួន១២នាក់នៅក្នុងបរិវេណដីរបស់គាត់។
អ្នកទាំងនោះមិនដឹងស្លាប់តាំងពីអង្កាល់ខ្លះទេ។ ប៉ុន្តែអ្នកដែលស្លាប់ចុងក្រោយគេបានធ្វើឱ្យរឿងរ៉ាវអាថ៌កំបាំងរបស់គាត់ត្រូវបែកធ្លាយ។ គ្រូមន្តអាគមឈ្មោះតូហារី (Tohari) អាយុ៤៥ឆ្នាំ បើមើលពីសម្បកក្រៅគឺជាគ្រូថ្លៃថ្នូរគួរឱ្យគោរព។ ប៉ុន្តែធាតុពិត លោកគ្រូជាមនុស្សបោក។ រឹតតែធ្ងន់ធ្ងរជាងនេះទៅទៀត, លោកគ្រូជាឃាតករឈាមត្រជាក់។ លោកគ្រូក្លាយជាឃាតករលាក់មុខដ៏សាហាវដែលសម្លាប់មនុស្សជាបន្តបន្ទាប់ (serial killer) សឹងតែឆ្នើមជាងគេប្រចាំប្រទេសឥណ្ឌូណេស៊ី។
កាលពីថ្ងៃពុធសប្ដាហ៍នេះ, សមត្ថកិច្ចគាស់សពជនរងគ្រោះដប់នាក់។ ក្រោយមកគាស់បាន២នាក់ទៀត។ លោកគ្រូចាំមិនច្បាស់ថាសម្លាប់មនុស្សប៉ុន្មាននាក់ទេ ប្រហែលជា១១នាក់។ ប៉ុន្តែសមត្ថកិច្ចគិតថាចំនួនជនរងគ្រោះពិតប្រាកដអាចច្រើនជាងនេះ ព្រោះលោកគ្រូបើកសេវាបញ្ចូលរូប ស្ដោះផ្លុំ មន្តអាគមអូមអាមជាច្រើនឆ្នាំមកហើយ។ នៅក្នុងចំណោមសាកសពដែលរកឃើញនោះ, ៦នាក់ជាបុរសអាយុចន្លោះពី៤០ឆ្នាំទៅ៥០ឆ្នាំ និង៣នាក់ជាស្ត្រីអាយុចន្លោះពី២៥ឆ្នាំទៅ៣៥ឆ្នាំ។
ជនសង្ស័យប្រាប់ថាគាត់ភ្លេចអស់ហើយមិនដឹងថាពួកគេរស់នៅទីណាខ្លះទេ។ គ្រាន់តែដឹងថាពួកគេជាអ្នកដែលធ្វើដំណើរមកពីទីឆ្ងាយៗ។ ទីនេះជាតំបន់ដែលសម្បូរគ្រូមន្តអាគម។ ប៉ុន្តែអ្នកដែលល្បីខ្លាំងជាងគេគឺតូហារី។ អីចឹងហើយបានជាមនុស្សភ្លូកទឹកភ្លូកដីទៅរកគាត់។ គាត់ប្រាប់អ្នកដែលទៅមើលទាំងនោះថាគាត់អាចបញ្ចុះមន្តអាគមដើម្បីឱ្យពួកគេរកស៊ីមានបាន, ទ្រព្យសម្បត្តិហូរចូលដូចទឹក។ គាត់ថែមទាំងឡាយហ្វេសប៊ុកប្រកាសខ្លួនឯងនៅតាមអនឡាញថែមទៀតដើម្បីឱ្យល្បីកាន់តែខ្លាំង។
គាត់ប្រាប់ថា អ្នកខ្លះឱ្យថ្លៃទ្រនឹប២ពាន់ដុល្លារ, អ្នកខ្លះឱ្យជាង៣ពាន់ដុល្លារ។ រយៈពេលជាច្រើនឆ្នាំនេះ, អ្នកដែលទៅរកគាត់ឱ្យជួយបញ្ចុះមន្តអាគម ឬលើករាសីអាចមានដល់រាប់ពាន់នាក់។ តូហារីប្រាប់សមត្ថកិច្ចថាគាត់ប្រើវិធីសម្លាប់ជនរងគ្រោះដោយដាក់ថ្នាំឈ្មោះប៉ូតាស្យូម សាយអឺណាយ (Potassium cyanide) ចូលទៅក្នុងទឹកឱ្យពួកគេផឹក។ គាត់កុហកថាផឹកទឹកដើម្បីចាប់ផ្ដើមពិធីបញ្ចុះមន្តអាគម។
លទ្ធផលនៃការធ្វើកោសល្យវិច័យបង្ហាញថាជនរងគ្រោះខ្លះដែលគ្រូមន្តអាគមនេះយកទៅកប់ គឺកប់ទាំងរស់។ ពេលខ្លះគ្រាន់តែឃើញជនរងគ្រោះទន់ដៃទន់ជើង, គាត់ក៏សែងយកទៅទម្លាក់រណ្ដៅតែម្ដង។ នេះបើយោងតាមការអះអាងរបស់សមត្ថកិច្ចក្រោយសាកសួរជនសង្ស័យ។
ដំណើរដើមទងដែលនាំទៅដល់ការបំបែកសំណុំរឿងនេះកើតចេញពីជនរងគ្រោះម្នាក់អាយុ៥៣ឆ្នាំ។ កូនរបស់ជនរងគ្រោះប្រាប់ថាឪពុករបស់ខ្លួនទៅរកគ្រូនោះដើម្បីទារលុយថ្លៃទ្រនឹបត្រឡប់មកវិញ បន្ទាប់ពីគាត់ដឹងខ្លួនថាចាញ់បោកគ្រូនោះ។ តាំងពីថ្ងៃចាកចេញដំណើរទៅរកផ្ទះរបស់លោកគ្រូមន្តអាគម, ឪពុករបស់ខ្លួនបាត់ដំណឹងជារៀងរហូត។ ប្រហែលជាគ្រូមន្តអាគមរូបនេះនឹកស្មានថាអំពើឃាតកម្មរបស់ខ្លួនលើកនេះក៏អាចលាក់បាំងបានជិតដូចករណីមុនៗផងដែរ។
ប៉ុន្តែគាត់ស្មានខុសទាំងស្រុង។ មុននឹងធ្វើដំណើរទៅផ្ទះរបស់តូហារីកាលពីថ្ងៃទី២០ ខែមីនា ឆ្នាំ២០២៣, ជនរងគ្រោះវ័យ៥៣ឆ្នាំរូបនេះបានផ្ដែផ្ដាំកូនទុកឱ្យហើយ។ គាត់ថាបើមិនឃើញគាត់ត្រឡប់ទៅផ្ទះវិញទេ, ប្រាកដជាមានរឿងអាក្រក់ចំពោះគាត់ហើយ។
គាត់ផ្ដាំឱ្យកូនប្រញាប់ទៅរាយការណ៍ប្រាប់សមត្ថកិច្ច។ មុនដំបូង, សមត្ថកិច្ចគ្រាន់តែទៅរកមើលសាកសពជនរងគ្រោះចុងក្រោយនេះតែប៉ុណ្ណោះ។ ប៉ុន្តែមិននឹកស្មានថាទៅដល់គាស់ឃើញសាកសពជាច្រើនទៀត ប្រៀបបាននឹងការរកឧុសប្រទះឈើងាប់។ ដល់ពេលនោះ ទើបគ្រប់គ្នាបានភ្លឺភ្នែកថាតាមពិតគាត់នេះជាគ្រូមន្តអាគម ហើយក៏ជាឃាតករលាក់មុខផងដែរ៕
ប្រភព៖ South China Morning Post, BBC,
ចែករំលែកព័តមាននេះ