ឈុតតំណាងជាតិកម្ពុជាជាប់ចំណាត់ថ្នាក់ក្នុងចំណោម Top 15 ហើយ សូមបន្តបោះឆ្នោតគាំទ្រ
រាជធានីភ្នំពេញ ៖ ឈុតតំណាងជាតិកម្ពុជាដែលមានឈ្មោះថា
រាជធានីភ្នំពេញ ៖ ឈុតតំណាងជាតិកម្ពុជាដែលមានឈ្មោះថា «ទេវីធិបតីក្រុងកម្ពុជា» ដែលគ្រងដោយបវរកញ្ញាកម្ពុជា កញ្ញា ខ្លឹម ស្រីគា (Miss Grand Cambodia 2017)បានជាប់ក្នុងចំណោម Top 15 សម្រាប់ឈុតតំណាងជាតិល្អផ្តាច់គេ (Best National Costumes) ។ នេះបើតាមការប្រកាសជាផ្លូវការក្នុងគណនីហ្វេសប៊ុក Miss Grand International នារាត្រីថ្ងៃទី១៥ ខែតុលា ឆ្នាំ២០១៧ ។
សម្រាប់ការប្រកួតសម្រស់លក្ខណៈអន្តរជាតិ Miss Grand International 2017 កំពុងប្រព្រឹត្តទៅនៅប្រទេសវៀតណាម បានឈានដល់ការបិទបញ្ចប់ការបោះឆ្នោតវគ្គទី១ ត្រឹមម៉ោង៩យប់ថ្ងៃទី១៥ ខែតុលា ដែលក្នុងនោះឈុតតំណាងជាតិល្អឯកចំនួន១៥ (Top 15) ដែលទទួលបានការបោះឆ្នោតច្រើនបំផុតដោយមហាជនតាមរយៈទំព័រហ្វេសប៊ុកផ្លូវការរបស់ Miss Grand International 2017 ក្នុងនោះក៏មានឈុតតំណាងជាតិប្រទេសកម្ពុជាផងដែរ។ ចំពោះឈុតតំណាងជាតិចំនួន ១០ ប្រទេសផ្សេងទៀតត្រូវជ្រើសរើសដោយគណៈកម្មការ សម្រាប់វគ្គទី១នេះ ។ តាមរយៈគណនីហ្វេសប៊ុកផ្លូវការរបស់ Miss Grand International 2017 បានបង្ហាញឲ្យឃើញថា សម្រាប់ការបោះឆ្នោតវគ្គទី១នេះ គឺឈុតតំណាងជាតិកម្ពុជាជាប់ចំណាត់ថ្នាក់ឈុតលេចធ្លោលេខមួយក្នុងចំណោមឈុតតំណាងជាតិលេចធ្លោ៦ប្រទេស ។
សម្រាប់ឈុតតំណាងជាតិទាំង១៥ជាប់នៅវគ្គបោះឆ្នោតដោយមហាជន គឺ៖ ឥណ្ឌូណេស៊ី, វៀតណាម, កម្ពុជា, ហ៊្វីលីពីន, ឡាវ, ម៉ាឡេស៊ី, ប៉េរូ, ប៉ារ៉ាហ្គាយ, មីយ៉ាន់ម៉ា, ថៃឡង់ដ៍, អេក្វាឌ័រ, ឥណ្ឌា, អាហ្សង់ទីន, នីការ៉ាហ្គ័រ និងអេស្ប៉ាញ ។
សម្រាប់ការបោះឆ្នោតវគ្គទី២ គឺចាប់ផ្តើមពីថ្ងៃទី១៦ ខែតុលា ដល់ថ្ងៃទី២០ ខែតុលា ដើម្បីជ្រើសរើសឈុតតំណាងជាតិល្អឯកទាំងតំណាងជាតិទាំង១០ សម្រាប់យកទៅប្រកួតប្រជែងក្នុងវគ្គផ្តាច់ព្រ័ត្រ ។
មហាជនដែលប្រើប្រាស់បណ្តាញសង្គមហ្វេសប៊ុក អាចចូលរួមដាក់ពិន្ទុតាមរយៈការចុច «Like» និង «Share» រូបភាពបវរកញ្ញាកម្ពុជាពីអាល់ប៊ុមរូបថតក្នុងទំព័រហ្វេសប៊ុកផ្លូវការគឺ Miss Grand International ដែលមានសញ្ញាទទួលស្គាល់ពីក្រុមហ៊ុនហ្វេសប៊ុក ។ សម្រាប់ការ Like ចំនួន១ស្មើ១ពិន្ទុ និងការ share គឺស្មើ៣ពិន្ទុ ។ អ្នកដែលបានពិន្ទុច្រើនជាងគេ១៥នាក់ នឹងត្រូវបានគណៈកម្មការជ្រើសរើសបន្តរកចំណាត់ថ្នាក់ top 10 សម្រាប់វគ្គផ្តាប់ព្រ័ត្រ ។
ដូច្នេះនៅចាំអីទៀត តោះជួយ Like និង share រូបភាព Miss Grand Cambodia 2017 របស់យើងទាំងអស់គ្នា ព្រោះការបោះឆ្នោតរបស់លោកអ្នកអាចកំណត់ជោគវាសនារបស់បវរកញ្ញាកម្ពុជាដើម្បីទទួលបានពាន់រង្វាន់ «សម្រាប់ឈុតតំណាងជាតិល្អឯកប្រចាំឆ្នាំ» ។
កម្មវិធីប្រកួតសម្រស់អន្តរជាតិនេះគឺចាប់ពីថ្ងៃទី៥ ដល់ថ្ងៃទី២៥ ខែតុលា នៅប្រទេសវៀតណាម ហើយពានរង្វាន់សម្រាប់ឈុតតំណាងជាតិល្អឯកប្រចាំឆ្នាំនឹងត្រូវប្រកាសនៅយប់ថ្ងៃទី២៥ ខែតុលា ៕
ចែករំលែកព័តមាននេះ