ស្វាយកែវរមៀតកំពុងមានទីផ្សារនាំចេញទៅថៃ និងវៀតណាម
រាជធានីភ្នំពេញ ៖ ស្វាយកែវរមៀត គឺជាដំណាំកសិកម្មមួយប្រភេទដែលប្រជាកសិករជាច្រើនកំពុងតែពេញនិយមនាំគ្នាដាំ ដោយសារ
រាជធានីភ្នំពេញ ៖ ស្វាយកែវរមៀត គឺជាដំណាំកសិកម្មមួយប្រភេទដែលប្រជាកសិករជាច្រើនកំពុងតែពេញនិយមនាំគ្នាដាំ ដោយសារតែកំពុងមានទីផ្សារនាំចេញទៅកាន់ប្រទេសជិតខាងដូចជាថៃ និងវៀតណាមជាដើម ។ ទោះបីយ៉ាងណា ទិន្នផលក្នុងឆ្នាំនេះមានការធ្លាក់ចុះ ហើយតម្លៃវិញក៏នៅទាបផងដែរ ។
លោក ណុប វណ្ណៈ ជាឈ្មួញកណ្ដាលម្នាក់បានឱ្យដឹងថា រៀងរាល់ឆ្នាំ លោកតែងតែដើរប្រមូលរកទិញផ្លែស្វាយកែវរមៀត និងម៉ៅចម្ការរបស់ប្រជាកសិករដើម្បីនាំចេញទៅលក់នៅប្រទេសថៃ ដោយក្នុង១ឆ្នាំ ពី២ទៅ៣ដងទៅតាមរដូវកាលរបស់វា ។
លោកបន្ដថា ៖« នៅដើមរដូវឆ្នាំនេះ ខ្ញុំកំពុងតែដើរប្រមូលទិញស្វាយនៅក្នុងខេត្តកំពង់ស្ពឺ និងយកទៅលក់ឲ្យឈ្មួញថៃ ។ ចំពោះតម្លៃ គឺខ្ញុំទិញចូល១គីឡូក្រាម៨០០រៀល និងលក់ចេញពី១២ទៅ១៣បាតប្រាក់ថៃ ស្មើនឹងជាង១.២០០ទៅ១.៣០០រៀល ដោយសារតែផ្លែស្វាយមិនសូវល្អ ប៉ុន្ដែបើស្វាយល្អវិញ ខ្ញុំហ៊ានទិញក្នុង១គីឡូក្រាម តម្លៃរហូតទៅដល់៣.០០០ទៅ៣.៥០០រៀលឯណោះ » ។
អ្នកស្រី ទេព ផល្លា ប្រជាកសិករម្នាក់រស់នៅភូមិអង្គក្រឡាញ់ ឃុំមហាសាំង ខេត្តកំពង់ស្ពឺ បានឱ្យដឹងថា ស្វាយកែវរមៀតឆ្នាំនេះ គឺទទួលបានទិន្នផលទាប ហើយលក់បានតម្លៃថោក ត្រឹម៨០០រៀលប៉ុណ្ណោះក្នុង១គីឡូក្រាម ដែលខុសពីឆ្នាំកន្លងទៅ ដោយសារតែភ្លៀងធ្លាក់ច្រើន ស្វាយផ្លែមិនសូវល្អ ។
អ្នកស្រីបន្ដថា ៖« ខ្ញុំមានស្វាយចំនួន១០០ដើម ដោយរៀងរាល់ឆ្នាំ ខ្ញុំប្រមូលផលបានពី៣ទៅ៥តោនក្នុង១រដូវ ហើយតម្លៃលក់បានពី១.៥០០ទៅ២.៥០០រៀលក្នុង១គីឡូក្រាម ប៉ុន្ដែឆ្នាំនេះ មិនត្រឹមតែទទួលបានទិន្នផលតិចទេ ថែមទាំងតម្លៃថោកទៀត » ។
ដំណាំស្វាយកែវរមៀត ជាដំណាំងាយស្រួលដាំ និងថែទាំ ពិសេសគឺមានហាងឆេងលក់ទាំងក្នុង និងក្រៅស្រុក ដែលរួមចំណែកផ្ដល់ចំណូលសម្រាប់ជួយបង្កើតសេដ្ឋកិច្ចគ្រួសារ ៕
ចែករំលែកព័តមាននេះ