ខេត្តបន្ទាយមានជ័យ ៖ អំណោយជាគ្រឿងឧបភោគបរិភោគ និងថវិកាមួយចំនួន ត្រូវបានប្រធានមន្ទីរសង្គមកិច្ច អតីតយុវជន និងយុវនីតិសម្បទា ខេត្តបន្ទាយមានជ័យ សហការជាមួយការិយាល័យសង្គមកិច្ច និងកិច្ចការនារី ក្រុងប៉ោយប៉ែត អាជ្ញាធរភូមិ នាំយកទៅចែកជូនស្ត្រីចំណាស់ និងចិញ្ចឹមចៅកំព្រា ដែលកាលពីពេលថ្មីៗនេះ អត់អង្ករ បានស្កាត់ជួបភ្នាក់ងារកោះសន្តិភាព ដល់ផ្ទះ ។
ពិធីចែកអំណោយនេះ ធ្វើឡើងនៅចំណុចដែលលោកយាយ ហាច ខឿប អាយុ៧៦ឆ្នាំ ស្នាក់នៅ នៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ។ អំណោយរួមមាន អង្ករ១ការុង ទម្ងន់៥០គីឡូក្រាម, មី១កេស, ទឹកសុទ្ធ៤យួរ, ប្រេងឆា២ដប, ទឹកស៊ីអ៊ីវ១យួរ, មុង១, ភួយ១ និងថវិកាចំនួន១០ម៉ឺនរៀល ។
លោក ឃុន វុទ្ធី ប្រធានមន្ទីរសង្គមកិច្ច អតីតយុវជន និងនីតិសម្បទា ខេត្តបន្ទាយមានជ័យ ប្រាប់កោះសន្តិភាពថា ជានិច្ចកាល ប្រមុខដឹកនាំរាជរដ្ឋាភិបាល ក្រោមការដឹកនាំរបស់ សម្តេចតេជោ ហ៊ុន សែន ពិសេសគណៈបក្សប្រជាជនកម្ពុជា តែងតែយកចិត្តទុកដាក់លើសុខទុក្ខពលរដ្ឋ ដោយមិនឲ្យពលរដ្ឋណាម្នាក់ដាច់បាយស្លាប់ឡើយ ។
លោកប្រធានមន្ទីរបន្តថា ក្រោយពីគេហទំព័រកាសែតកោះសន្តិភាព ចុះផ្សាយរឿងលោកយាយទីទ័លក្រខាងលើ ថ្នាក់ដឹកនាំបានឲ្យលោក និងក្រុមការងារចុះដល់កន្លែង ដើម្បីពិនិត្យស្ថានភាពជាក់ស្តែង កាលពីរសៀលថ្ងៃទី១១ ខែតុលា ឆ្នាំ២០១៧ និងនាំយកអំណោយចែកជូនគ្រួសារខាងលើតែម្តង ៕
ចែករំលែកព័តមាននេះ