មាន់រស់ជិត២ពាន់ក្បាល និងជើងមាន់ខូចគុណភាពជាង៧តោននាំចូលពីវៀតណាម
ខេត្តព្រៃវែង ៖ កម្លាំងកងរាជអាវុធហត្ថខេត្តព្រៃវែង សហការណ៍ជាមួយកម្លាំងជំនាញ
ខេត្តព្រៃវែង ៖ កម្លាំងកងរាជអាវុធហត្ថខេត្តព្រៃវែង សហការណ៍ជាមួយកម្លាំងជំនាញ បសុពេទ្យខេត្ត ស្ទាក់ចាប់បានជើងមាន់ជាង៧តោន និងសត្វមាន់រស់ជិត២ពាន់ក្បាល ដែលក្រុមឈ្មួញខិលខូចតែងតែលួចដឹកជញ្ជូនឆ្លងដែនពីវៀតណាមចូលមកលក់នៅរាជធានីភ្នំពេញ និងចែកចាយទៅតាមបណ្តាលខេត្តមួយចំនួន តាមច្រកម៉ឺនជ័យ ស្រុកកំចាយមារបានជាហូរហែរយៈពេលកន្លងមកនោះ។ ប្រតិបត្តិការបង្ក្រាបសាច់មាន់លោតឆ័ត្រពីប្រទេសវៀតណាមនេះបានធ្វើឡើងនៅវេលាម៉ោង១រសៀល ថ្ងៃទី១២ ខែតុលា ឆ្នាំ២០១៧ នៅចំណុចភូមិជោរទី២ ឃុំក្រញូង ស្រុកកំចាយមារ ខេត្តព្រៃវែង។
លោកវរសេនីយ៍ឯក ឈួន គឹមសាន មេបញ្ជាការកងរាជអាវុធហត្ថខេត្តព្រៃវែងបានឲ្យដឹងថា កម្លាំងរបស់លោកបានសហការណ៍ជាមួយមន្ត្រីជំនាញបសុពេទ្យខេត្ត ធ្វើការឃាត់រថយន្ត១គ្រឿង ដែលលួចដឹកសត្វមាន់រស់ និងជើងមាន់ឆ្លងដែនខុសច្បាប់ នៅចំណុចភូមិខាងលើ ដែលបានដឹកផលិតផលសត្វខុសច្បាប់ ចេញពីប្រទេសវៀត ណាម តាមច្រកម៉ឺនជ័យ ឆ្ពោះទៅភ្នំពេញ។ ក្រោយធ្វើការឃាត់សកម្មភាពនេះសមត្ថកិច្ចដកហូតវត្ថុតាងរួមមាន រថយន្តម៉ាកហ៊ីយ៉ាន់ដាយ១គ្រឿងពណ៌ស ពាក់ស្លាកលេខ ភ្នំពេញ 3C-5488 មាន់រស់ ចំនួន ១៦០០ក្បាល ជើងមាន់ចំនួន ៤៧០កេស មានទម្ងន់៧០៥០គីឡូក្រាម។
លោក ចិន វិសាល ប្រធានការិយាល័យពសុព្យាបាលនៃមន្ទីរកសិកម្មខេត្តព្រៃវែងបានឲ្យដឹងថា សាច់មាន់ជើងមានទាំងនោះត្រូវបានឈ្មួញនាំចូលឆ្លងដែនតាមច្រកម៉ឺនជ័យដោយមិនមានលិខិតស្នាមអីទេ។ ចំពោះគុណភាពវិញយើងនឹងធ្វើការពិនិត្យហើយបើឃើញថាខូចគុណភាពនោះនឹងកម្ទេចចោល តែបើមិនខូចគុណភាពទេយើងនឹងធ្វើការពិន័យតាមច្បាប់៕
ចែករំលែកព័តមាននេះ