អង្គការ WFP គម្រោងចំណាយជាង១៨០លានដុល្លារជួយដល់កម្ពុជា ២០១១-២០១៨
រាជធានីភ្នំពេញ៖ អង្គការស្បៀងអាហារពិភពលោក (WFP)
រាជធានីភ្នំពេញ៖ អង្គការស្បៀងអាហារពិភពលោក (WFP) មានកិច្ចសហប្រតិបត្តិការល្អជាមួយរាជរដ្ឋាភិបាលកម្ពុជាលើការជួយដល់កុមារក្រីក្រកម្ពុជានៅតាមសាលារៀននិងជួយដល់កាកបាទក្រហមកម្ពុជា ហើយអង្គការនេះនឹងបន្តជួយកម្ពុជាទៀត។ នេះជាការលើកឡើងរបស់ លោកស្រី ណាន់ស៊ី វ៉ល់តឺ (Nancy Walter) ប្រធានអង្គការ WFP ប្រចាំនៅកម្ពុជាក្នុងជំនួបពិភាក្សាការងារជាមួយលោកទេសរដ្ឋមន្ត្រីប្រាក់ សុខុន រដ្ឋមន្ត្រីក្រសួងការបរទេសនៅទីស្តីការក្រសួងនៅថ្ងៃទី ១០ ខែតុលានេះ។
លោកជុំ សុន្ទរី អ្នកនាំពាក្យក្រសួងការបរទេសបានបញ្ជាក់ប្រាប់អ្នកសារព័ត៌មានក្រោយជំនួបថា អង្គការ WFP បានចំណាយប្រមាណជាង១៨០លានដុល្លារ ពីឆ្នាំ២០១១ដល់២០១៨ ក្នុងការជួយដល់កម្ពុជា ហើយបានសន្យាបន្តជួយក្នុងឆ្នាំ២០១៩ទៀត។
លោកបន្តថា៖ «អង្គការនេះបានជួយដល់កុមារកម្ពុជាក្រីក្របានចូលរៀន និងមានអាហារបរិភោគ និងជួយដល់កាកបាទក្រហមកម្ពុជាទៀតផង។ លោកទេសរដ្ឋមន្ត្រីប្រាក់ សុខុន បានថ្លែងអំណរគុណដល់អង្គការ (WFP)នេះ ដែលបានចូលមកជួយកម្ពុជាតាំងពីឆ្នាំ១៩៧៩។ ស្ថាប័ននានារបស់កម្ពុជាមានទំនាក់ទំនងល្អជាមួយកម្មវិធីនៃអង្គការ(WFP) និងភាពជាដៃគួររវាងរដ្ឋាភិបាល និងអង្គការ (WFP)។ កម្មវីធីដែលអង្គការនេះសម្រេចបានដោយជោគជ័យការផ្តល់អាហារនៅតាមសាលារៀនក្នុងប្រទេសកម្ពុជាផ្តោតលើគ្រួសារក្រីក្រនៅជនបទនិងបានឲ្យកុមារក្រីក្របានចូលរៀន»។
លោកទេសរដ្ឋមន្ត្រីបានលើកឡើងថា អង្គការ(WFP)បានជួយកម្ពុជាក្នុងការស្តារអភិវឌ្ឍន៍ប្រកបដោយចីរភាព ពិសេសការលុបបំបាត់ភាពក្រីក្រ និងការលុបបំបាត់ទាំងស្រុងនូវភាពអត់ឃ្លាន។ ក្នុងនោះអង្គការនេះបានសហការជាមួយក្រុមប្រឹក្សាសម្រាប់វិស័យកសិកម្ម និងការអភិវឌ្ឍជនបទរបស់កម្ពុជា។ ដើម្បីឲ្យកម្ពុជាបានទទួលជោគជ័យនូវយុទ្ធសាស្ត្រជាតិស្តីពីបញ្ហាសន្តិសុខស្បៀង និងការផ្គត់ផ្គង់ម្ហូបអាហារ។ លោកទេសរដ្ឋមន្ត្រីបានលើកឡើងថាអង្គការ(WFP)បានធ្វើកិច្ចសហប្រតិបត្តិការជាមួយកាកបាទក្រហមកម្ពុជាសម្រាប់ធ្វើការឆ្លើយតបនៅពេលមានគ្រោះមហន្តរាយបន្ទាប់៕
ចែករំលែកព័តមាននេះ