ទីក្រុងហុងកុង, ប្រទេសចិន៖ ក្រុមហ៊ុនផលិតនាឡិកាល្បីឈ្មោះដែលមានម៉ាកយីហោប៉ាតិច ហ្វ៊ីលីព (Patek Philipe) គ្រោងដាក់លក់ដេញថ្លៃនូវនាឡិកាដ៏កម្រ ដែលជាព្រះរាជទ្រព្យរបស់ព្រះចៅអធិរាជចិនចុងក្រោយបង្អស់នៃរាជវង្សឆេង។ នាឡិកាម៉ាក Patek…
ទីក្រុងហុងកុង, ប្រទេសចិន៖ ក្រុមហ៊ុនផលិតនាឡិកាល្បីឈ្មោះដែលមានម៉ាកយីហោប៉ាតិច ហ្វ៊ីលីព (Patek Philipe) គ្រោងដាក់លក់ដេញថ្លៃនូវនាឡិកាដ៏កម្រ ដែលជាព្រះរាជទ្រព្យរបស់ព្រះចៅអធិរាជចិនចុងក្រោយបង្អស់នៃរាជវង្សឆេង។ នាឡិកាម៉ាក Patek Philippe Ref 96 Quantieme Lune ត្រូវព្រះចៅអធិរាជភូយីទ្រង់ពាក់។ នាឡិកានេះនៅរក្សាទុកទ្រង់ទ្រាយដើមទាំងស្រុងគ្មានការកែប្រែ ឬច្នៃប្រឌិតអ្វីទាំងអស់។
នាឡិកានេះកំពុងដាក់តាំងនៅទីក្រុងហុងកុងរហូតដល់ថ្ងៃទី៣១ ខែមីនា។ អមជាមួយនាឡិកានេះក៏មានវត្ថុអនុស្សាវរីយ៍មួយចំនួនរបស់ព្រះចៅអធិរាជភូយីផងដែរ ដូចជាផ្លិត, សៀវភៅកំណត់ហេតុ, រូបគំនូរដែលទ្រង់គូរដោយផ្ទាល់ព្រះហស្ថរបស់ព្រះអង្គ និងសៀវភៅប្រជុំទ្រឹស្ដីល្អៗរបស់អ្នកប្រាជ្ញខុងជឺ។ តាមគម្រោង, គេនឹងនាំយករបស់ទាំងនេះទៅដាក់តាំងនៅទីក្រុងមួយចំនួនដូចជា៖ ញូយ៉ក, សិង្ហបុរី, ឡុង, តៃប៉ិ និងហ្សឺណែវ។ បន្ទាប់មកនឹងឈានដល់ការប្រកាសលក់ដេញថ្លៃនាចុងឆ្នាំ២០២៣។
គេរំពឹងថារបស់ដ៏មានតម្លៃ និងដ៏កម្រទាំងនេះអាចនឹងមានគេហ៊ានឱ្យថ្លៃរហូតដល់ខ្ទង់លានដុល្លារឯណោះ។ នាឡិកាដែលទ្រង់ពាក់នេះ ចាប់តាំងពីផលិតដោយក្រុមហ៊ុនហ្វ៊ីលីពកាលពីអំឡុងឆ្នាំ១៩៣០ប្លាយ ក៏ស្រាប់តែបាត់ដំណឹងឈឹងរយៈពេលជាង៨០ឆ្នាំ។ ទើបតែលេចមុខជាថ្មីកាលពីឆ្នាំ២០១៩ នៅពេលគេបញ្ជូនត្រឡប់ទៅក្រុមហ៊ុនហ្វ៊ីលីពវិញ។
តើព្រះចៅអធិរាជភូយីមានប្រវត្តិសាវតារយ៉ាងដូចម្ដេចខ្លះ?
ឆ្នាំ១៩០៨ នៅពេលរាជបុត្រភូយីទើបតែមានព្រះជន្ម២វស្សា, នាហ្មឺនសព្វមុខមន្ត្រីចិនបានលើកព្រះអង្គជាក្សត្រគ្រប់គ្រងនគរឆេង។ សោយរាជ្យបានប៉ុន្មានឆ្នាំ, ព្រះអង្គក៏ដាក់រាជ្យសម្បត្តិនៅឆ្នាំ១៩១២ នៅពេលបដិវត្តបាន និងកំពុងតែផ្ទុះពេញទំហឹង។ ក្រុមបដិវត្តយល់ព្រមឱ្យព្រះអង្គរក្សាព្រះនាមជាព្រះចៅអធិរាជ និងបន្តគង់នៅក្នុងព្រះរាជដំណាក់។ រហូតដល់ឆ្នាំ១៩២៤ ក៏មានអំពើរដ្ឋប្រហារកើតឡើង។ ព្រះអង្គត្រូវភៀសព្រះកាយចេញពីរាជធានី។
ព្រះអង្គធ្លាប់សោយរាជ្យនៅនគរម៉ាន់ជូរីពីឆ្នាំ១៩៣៤-១៩៤៥។ ប៉ុន្តែមុខតំណែងនេះមានតែឈ្មោះតែប៉ុណ្ណោះ ព្រោះស្ថិតនៅក្រោមការត្រួតត្រារបស់កងទ័ពជប៉ុន។ ឆ្នាំ១៩៤៥ ជប៉ុនទម្លាក់អាវុធចុះចាញ់សង្គ្រាមលោកលើកទី២។ ព្រះអង្គភូយីត្រូវទាហានសូវៀតដែលលើកកងទ័ពចូលម៉ាន់ជូរីចាប់ឃុំរយៈពេល៥ឆ្នាំ រហូតដល់ឆ្នាំ១៩៥០ សូវៀតធ្វើបត្យាប័នបញ្ជូនព្រះអង្គត្រឡប់ទៅប្រទេសចិន និងគង់នៅទីនោះរហូតដល់អស់ព្រះជន្មនៅឆ្នាំ១៩៦៧។
មិនមានប្រភពច្បាស់ការណ៍បញ្ជាក់ថាតើព្រះអង្គទទួលបាននាឡិកាម៉ាកប៉ាតិចនោះយ៉ាងដូចម្ដេច។ ប៉ុន្តែគេដឹងថានៅអំឡុងពេលជាប់ឃុំ៥ឆ្នាំនោះ, ព្រះអង្គ និងអ្នកបកប្រែភាសាថ្វាយព្រះអង្គ មានទំនាក់ទំនងគ្នាល្អណាស់។ ដូច្នេះ នៅពេលសូវៀតបញ្ជូនព្រះអង្គត្រឡប់ទៅប្រទេសចិនវិញ, ព្រះអង្គក៏ប្រទាននាឡិកាដៃនេះទៅអ្នកបកប្រែដើម្បីទុកជាអនុស្សាវរីយ៍មុនពេលបែកគ្នា។
អ្នកបកប្រែបានរក្សាទុកនាឡិកានេះជាប់នឹងខ្លួនប្រៀបបាននឹងទ្រព្យសំណព្វចិត្តទៅទល់នឹងពេលដែលទទួលអនិច្ចកម្មនៅឆ្នាំ២០០៥។ ក្រោយមក, គេក៏ប្រគល់នាឡិកាទៅឱ្យអ្នកគ្រប់គ្រងគេហដ្ឋានជាអ្នកទុកដាក់បន្ត។ ក្រុមអ្នកជំនាញបានប្រើប្រាស់ពេលវេលាជិត៣ឆ្នាំដើម្បីស៊ើបពីប្រវត្តិសាវតារពិតរបស់នាឡិកានេះ និងដើម្បីបញ្ជាក់ឱ្យបានច្បាស់លាស់ថានេះពិតជានាឡិការបស់ព្រះចៅអធិរាជភូយីពិតប្រាកដមែន។
តើនាឡិកានេះមានអ្វីគួរឱ្យអស្ចារ្យ?
ប៉ាតិច ហ្វ៊ីលីព ជាប្រភេទនាឡិកាដែលផលិតចេញមួយស៊េរីៗតិចតួចជាទីបំផុត។ ពោលគឺផលិតត្រឹមតែបួនប្រាំគ្រឿងប៉ុណ្ណោះ។ ភាគច្រើន ច្រើនតែប្រមុខរដ្ឋ ឬប្រមុខរដ្ឋាភិបាលទើបមាននាឡិកាប្រភេទនេះពាក់។ នាឡិកាដៃរបស់លោកពូទីនក៏ម៉ាកប៉ាតិច ហ្វ៊ីលីពផងដែរ។ នាឡិកាប៉ាតិចរបស់ព្រះចៅអធិរាជភូយី គេរកឃើញតែ២គ្រឿងគត់កាលពីមុននេះ។
លក្ខណៈពិសេសមួយទៀតនៅត្រង់ថានាឡិកាម៉ាក Patek Philippe Ref 96 ធ្លាប់ជាព្រះរាជទ្រព្យរបស់ព្រះចៅអធិរាជចិនចុងក្រោយនៃរាជវង្សឆេង។ បើគិតមើលទៅ, នាឡិកាដែលក្រុមហ៊ុនហ្វ៊ីលីពបានចេញស៊េរីជាមួយគ្នានឹងនាឡិការបស់ព្រះចៅអធិរាជភូយី នៅសល់តែបីគ្រឿងគត់នៅក្នុងពិភពលោក។
មានប្រវត្តិតំណាលថាថ្ងៃមួយព្រះអង្គបញ្ជាឱ្យអ្នកបម្រើកោសផ្ទៃនាឡិកាដើម្បីចង់ដឹងថាតើនាឡិកានេះផលិតពីផ្លាទីនសមែន ឬមិនមែន។ នៅពេលកោសចុះកោសឡើងក៏របកទឹកប្រាក់ដែលស្រោបពីក្រៅ ហើយចេញស្ពាន់ទៅវិញ។ ព្រះអង្គក៏ប្រាប់ឱ្យអ្នកបម្រើឈប់កោសតទៅទៀត។ នាឡិកានេះត្រូវគេចាត់ទុកជារបស់ដ៏កម្រ និងដ៏មានតម្លៃជាប្រវត្តិសាស្ត្រ៕
ប្រភព៖ Channel News Asia, Financial Times
ចែករំលែកព័តមាននេះ